ESDRAS 8 - Quichua Chimborazo Bible

Quiquin llajtaman Esdrashuan tigrajcunami

1Jatun mandaj Artajerjes mandacui punllacunapi Babiloniamanta Jerusalenman ñucahuan huichiyaj ñaupa yayacunamanta mirarishcacunaca, paicunata pushajcunandijca caicunami:

2Fineespaj huahua huahuapuramantaca Gersón. Itamarpaj huahua huahuapuramantaca Daniel. Davidpaj huahua huahuapuramantaca Hatusmi shamurca.

3Secaniaspaj, Parospaj huahua huahuacunapuramantaca Zacariasmi, 150 paicunapurata pushashca shamurca.

4Pahat-moabpaj huahua huahuapuramantaca, Zeraiaspaj churi Elioenaimi, 200 paicunapurata pushashca shamurca.

5Secaniaspaj huahua huahuapuramantaca Jahazielpaj churimi 300 paicunapurata pushashca shamurca.

6Adinpaj huahua huahuapuramantaca, Jonatanpaj churi Ebedmi, pichca chunga paicunapurata pushashca shamurca.

7Elampaj huahua huahuapuramantaca, Ataliaspaj churi Jesaiasmi, canchis chunga paicunapurata pushashca shamurca.

8Sefatiaspaj huahua huahuapuramantaca, Micaelpaj churi Zebadiasmi, pusaj chunga paicunapurata pushashca shamurca.

9Joabpaj huahua huahuapuramantaca, Jehielpaj churi Obadiasmi, 218 paicunapurata pushashca shamurca.

10Selomitpaj huahua huahuapuramantaca Josifiaspaj churimi 160 paicunapurata pushashca shamurca.

11Bebaipaj huahua huahuapuramantaca, Bebaipaj churi Zacariasmi, ishqui chunga pusaj paicunapurata pushashca shamurca.

12Azgadpaj huahua huahuapuramantaca, Hacatanpaj churi Johananmi, 110 paicunapurata pushashca shamurca.

13Adonicampaj huahua huahuapuramanta q'uipata shamuj Elifelet, Jeiel, Semaías shuti runacunami sujta chunga paicunapurata pushashca shamurcacuna.

14Bigvaipaj huahua huahuapuramantaca Utai, Zabud shuti runacunami sujta chunga paicunapurata pushashca shamurcacuna.

15Paicunata Ahava puebloman shamuj jatun yacu c'uchupi tandachishpami, carpa huasicunata shayachishpa, quimsa punllata chaipi tiyarcanchij. Pilla chaipi cashcata ricungapaj tucui tandanacushcatapish, curacunatapish ricujpica, levitacunaca shujllapish mana ricurircachu.

16Chaimantami Eliezer, Ariel, Semaías, Elnatán, Jarib, Elnatán, Natán, Zacarías, Mesulam shuti pushajcunata, Joiarib, Elnatán yachachijcunatapish tandachishpa,

17Casifia llajtapi causajcunata pushaj Iddopajman cacharcani. Casifiaman chayashpaca Iddomanpish, chaipi Diospajta ruracuj caishujcunamanpish ñucanchij Diospaj huasipi Diospajta rurajcunata cachachun imallata nina cashcata cutin cutin yachachishpami cacharcani.

18Ñucanchij Diospaj maqui ñucanchij jahuapi cajpimi, yaya Israelpaj churi Levipaj nieto Mahlipaj huahua huahuapuramanta caj alli yachaj Serebías levitata cacharcacuna. Paihuanca paipaj churicunapish, paipaj huauquicunapish tucuimantaca chunga pusajmi shamurcacuna.

19Meraripaj huahua huahuacunamantapish Hasabías, Jesaías shuti runacunatami paicunapaj churicunandij, paicunapura cajcunandij tucuimantaca ishqui chunga pushamurcacuna.

20Diospaj huasipi levitacunata ayudashpa imalla rurana cashcata rurachun, Davidpish paihuan caj mandajcunapish churashcacunapaj huahua huahuacunatapish 220tami pushamurcacuna. Paicunaca tucuicunami imalla ruranapi shuticunata quillcashcacuna carca.

21Ahava jatun yacu c'uchullapitaj cashpami, ñucanchijtapish, ñucanchij huahuacunatapish, ñucanchij imalla charishcacunandij ñanta Dios alli pushachun, paipaj ñaupajpi llaquirishca shunguhuan paita mañangapaj ayunashunchij nishpa mandarcani.

22Jatun mandajtaca ñaupamanmi: “Ñucanchij Diospaj maquica tucui paita mashcajcunapaj allipaj paicunapaj jahuapimi. Ashtahuanpish paimanta anchurijcunataca paipaj poderhuan, pai jatunta p'iñarishcahuanmi llaquichin” nishcamantami, ñanpi ñucanchijta p'iñajcunamanta cuidachun soldadocunata, caballocunapi tiyarishca soldadocunata ñucanchijhuan cachachun jatun mandajta mañanataca pinganarca.

23Ashtahuanpish ñucanchijca ñanpi alli pushachunca Diostami ayunashpa mañarcanchij. Paica ñucanchij mañashcata uyarcami.

24Chai q'uipaca, curacunata pushajcunapuramantami chunga ishqui curacunata agllarcani. Paicunaca Serebías, Hasabías, paicunapuramanta caj chungacunapishmi carca.

25Jatun mandajpish, paiman yuyaita cujcunapish, shujtaj mandajcunapish, tucui chaipi caj israelcunapish Diospaj huasipaj cushca cullquita, curita, Diospaj huasipi imallata ruranapaj cajcunata cushcacunatapish paicunapaj ñaupajpimi pizarcani.

26Chashna pizashpaca paicunapaj maquipica, 650 talento cullquita, Diospaj huasipi imallata ruranapaj cajcunatapish patsaj talento cullquimanta rurashcacunata, patsaj talento curitapishmi curcani.

271.000 dracmata pizaj curi tazacunatapish ishqui chungatami curcani. Broncemanta rurashca ishqui alli tazacunatapishmi curcani. Chaicunaca curi shinallataj sumajmi carca.

28Chai curacunataca: “Cancunaca Mandaj Diospajlla ch'icanchishcacunami canguichij. Ñucanchij ñaupa yayacunapaj Mandaj Diosman cushcacunapish, Diospaj huasipi imallata ruranapaj charinacunapish, cullquipish, curipish Mandaj Diosman cusha nishcamanta cushcacunapish Diospajllami.

29Chaimanta curacunata mandajcunapaj, levitacunapaj, Israel familiacunata mandaj yayacunapaj ñaupajpi pizashpa Jerusalenpi caj Mandaj Diospaj huasipi caj altibajo ucucunapi churangacama ricurashca cuidarashca ringuichij” nircanimi.

30Chaipimi curacunapish, levitacunapish pizashca cullquitapish, curitapish, Diospaj huasipi imalla rurana cashcacunatapish Jerusalenpi caj Diospaj huasiman apamungapaj chasquircacuna.

31Huata callari quillapaj chunga ishqui punllapimi chai Ahava shuti yacu c'uchumantaca Jerusalenman shamui callarircanchij. Mandaj Diospaj maqui ñucanchij jahuapi cashpami, ñanta shamucujpi ñucanchijta p'iñajcunapaj maquimantapish, chapashpa shuhuajcunamantapish huaquichishpa alli pushamurca.

32Jerusalenman chayamushpaca, quimsa punllatami samarircanchij.

33Chuscu punllapica, ñucanchij Diospaj huasipimi cullquitapish, curitapish, Diospaj huasipi imallata ruranapaj cajcunatapish pizashpa Uriaspaj churi Meremot curaman, Fineespaj churi Eleazar curaman tucuita curcanchij. Paicunahuanca Jesuapaj churi Jozabad, Binuipaj churi Noadías levitacunapishmi carca.

34Yupashcata, pizashcata mashna cashcata quillcashcatami tucuita paicunaman curcanchij.

35Prezu apashcacunapaj huahua huahuacuna prezumanta tigramushcacunaca israelcunapaj Diosman cushpa tucui rupachina cashcataca: Tucui israelcunapaj juchacunamantaca chunga ishqui malta huagracunata, iscun chunga sujta carnerocunata, canchis chunga canchis malta ovejacunata, chunga ishqui c'ari chivocunatami curcacuna.

36Jatun mandaj quillcashpa mandashcacunata jatun yacu ch'imba ladoman caj satrapacunamanpish, caishuj mandajcunamanpish cujpica, paicunami Diospaj huasita ruranapica israelcunata ayudarcacuna.