PROVERBIOS 15 - Quichua Chimborazo Bible

1Sumajta cutichishca shimica,

p'iñarishcatapish anchuchinmi.

Ashtahuanpish maipish cachun rimashca

shimica ashtahuan p'iñachinllami.

2Yachaisapacunapaj shimica alli

yachaicunatami sumajta riman.

Ashtahuanpish rumi shungucunaca,

manapish canatami rimancuna.

3Mandaj Diosca allicunatapish,

millaicunatapish maipi imata

ruracujta ricuracunmi.

4C'uyaihuan sumajta rimashca shimicunaca,

causaita cuj yura shinami.

Ashtahuanpish millai shimicunaca,

shungutami chugrichin.

5Rumi shungu churica, yaya

cunashcatapish p'iñashpa mana

chasquinchu.

Ashtahuanpish jarcashcata cazujca,

alli yuyaiyujmi tucunga.

6Cashcata ruraj runapaj huasipica,

achca charinacunami tiyan.

Ashtahuanpish mana manchaj runa imata

charishcaca paillatatajmi muspachin.

7Yachaisapacunaca, alli yachaitami muyuta shina tarpuncuna.

Ashtahuanpish rumi shungucunaca,

mana chashna yuyanchu.

8Mandaj Diosca, paita mana manchajcuna

cushpa rupachishcataca manataj

ricunachinchu.

Ashtahuanpish alli runacuna mañashcataca,

cushicushpami uyan.

9Mandaj Diosca, paita mana manchaj

runa imata rurashcataca manataj

ricunachinchu.

Ashtahuanpish cashcata rurashpa

causajtaca c'uyanmi.

10Alli ñanta saquijpajca, alli tucuchun rimashcaca, sinchita

llaquichishca shinami.

Alli tucuchun rimashcata mana munashpa

p'iñajca huañungatajmi.

11Seolpish, Abadonpish Mandaj Diospaj ñahuipimi.

¡Cai pachapi causajcunatacarin shungupi

imata yuyashcatapish callarishpami

ricucun!

12Mana cazushpa asijca, imata jarcajtaca

p'iñanmi.

Yachaisapacunahuanca mana

tandanacunallapishchu.

13Cushijlla shunguyuj runaca,

ñahuipish cushijllami purin.

Ashtahuanpish shungutaj llaquilla

cajpica, yuyaipish llaquillami tucun.

14Yuyaisapa runaca, ashtahuan alli

yachanatami munan.

Ashtahuanpish rumi shungucunaca, rumi

shungu cashcahuanmi sajsajta micuj

shina saquirincuna.

15Llaquilla caj runapaj causaica,

punllanta sinchillatajmi.

Ashtahuanpish cushicui shunguhuan

causajpajca, punllanta jatun micuita

rurashca shinami.

16Charishcacunahuan musparinapaj randica,

ashallata charishpapish, Mandaj Diosta

cazushpa causanamari alli.

17Yuyu calditollata micushpapish,

c'uyanacushpa causanamari alli.

Ashtahuanpish huirayashca huagra aicha

cusashcallata micushpapish,

p'iñanacushpalla causashpaca ima

allitaj cangari.

18Imamantapish jahualla p'iñarijca,

macanacuitarajmi callarichin.

Ashtahuanpish mana utca p'iñarij runaca,

p'iñanacuitapish allichinmi.

19Allita ruracujpaj ñanca, rumihuan

llambujllata rurashca ñan shinami.

Ashtahuanpish q'uilla runapajca,

ñanpish casha jundashca shinami.

20Yachaisapa churica, paipaj yayatami

cushichin.

Ashtahuanpish rumi shungu runaca,

mamata p'iñanmi.

21Yuyaita mana japijpajca, rumi

shungu canaca cushicunami.

Ashtahuanpish yuyaisapa runaca,

pandarishpapish allichirinmi.

22Imapish alli cachunca taucapura

yuyarinacushpami callarina.

Pita mana tapushpalla alli ruranata

yuyashpaca, llaqui tucunllami.

23Alli yuyaicunata cuj runaca,

allita rimashcamantami cushicun.

Alli punllapitaj yuyaita cushcaca

sumajmari.

24Yuyaisapa runaca causaiman apaj

ñantami huichiman catin.

Chaimantami Seolman apaj uri ñanmanta anchurin.

25Viuda huarmicuna imalla

charishcacunataca, Mandaj Diosmari

huaquichin.

Ashtahuanpish jatun tucujcunapajtaca,

Mandaj Diosllatajmi chingachicun.

26Millai runa yuyarishcataca, Mandaj

Diosca manataj ricunachinchu.

Ashtahuanpish ima millai yuyaita mana

charij runa rimashca shimicunaca chuyami.

27Umashpa charijyanata mana munajcunallami,

causaita japingacuna.

Ashtahuanpish jahuanpi jahuanpi charijyana

yuyaihuan millaita rurajcunaca, paipaj

tucui huasitatajmi jatun pingaipi churan.

28Cashcata ruraj runaca imata tapujpipish, shungupiraj alli

yuyarishpami cutichin.

Ashtahuanpish Diosta mana manchajcunaca,

shimita cacharishpa millaita rimanllami.

29Mandaj Diosca, paita mana

manchajcunamantaca carupimi.

Ashtahuanpish cashcata rurajcunataca,

mañashcata cutichingapaj uyaracunmi.

30Cushijlla ñahuihuan ricujpica,

shungupish cushicunmi.

Cushicunata huillashcacarin shaicushca

cajpipish, mushuj yuyaita cunmi.

31Causanata yachachun cunashcata

chasquijcunaca, yachaisapacunahuanmi causanga.

32Cazuchun rimashcata yangata ruraj

runaca, quiquin causaillatatajmi

p'iñan.

Ashtahuanpish yuyaita japishca runaca,

alli tucuchun rimashcatapish cazunmi.

33Mandaj Diosta manchanaca, alli

yachajta ruraj yachanami.

Alli nishca cangapajca, mana jatun

tucushca canachu.