1Ñuca Dioslla, ñuca Dioslla, ¿ima nishpataj ñucallata shitashcata saquingui?
Ñucata mana quishpichingapajmari caruyashcangui. Ñuca caparishcatapish mana uyangapajmari caruyashcangui.
2Ñuca Dioslla, punlla mañajpipish, mana cutichinguica.
Tuta mañajpipish, mana samachinguica.
3Ashtahuanpish quiquinca jucha illajmari cangui.
Israelcuna alabacun chaupipimi causangui.
4Ñucanchij yayacunaca quiquinpimi shunguta churarcacuna.
Quiquinca shunguta churajpica quishpichircanguimi.
5Quiquinta mañashpaca quishpichishcami carcacuna.
Quiquinpi shunguta churashpaca manataj pingachishca carcacunachu.
6Ashtahuanpish ñucaca mana runa shinachu cani.
C'uru shinallami cani.
Runacuna chanzata rurashcami cani.
Llajtapi causajcuna p'iñashcami cani.
7Ñucata ricujcunaca tucuicunami ñucataca chanzata rurashpa ricuncuna.
Shimita huishtushpa umata cuyuchishpami, cashna nincuna:
8“Cai runaca Mandaj Diosmanmi mingarij carca.
Pai quishpichinaman shamuchun.
Paipi shunguta churajtaca paillataj quishpichichunyari” nincunami.
9Ashtahuanpish ñuca mamapaj huijsamantaca quiquinmari llujshichircangui.
Ñuca mama marcashca huiñachicujpirajmi canpi shunguta churanata yachachircangui.
10Manaraj huacharijpimi quiquinman mingashca carcani.
Ñuca mamapaj huijsapi cai pachamantami ñuca Dios cangui.
11Ñucamantaca amataj caruyangui, jatun llaquica c'uchullapimi.
Pi shujtaj ayudajca mana tiyanchu.
12Ñucataca achca huagracunamari muyunchishca.
Basán llajta p'iña huagracunami ñucataca muyunchishca.
13Paicunaca shimita pascashpami ñucata p'iñashpa c'amincuna.
Millpunachicuj león huacarishpa saltanalla shinami tucuncuna.
14Yacu shinami talliricuni.
Ñuca tullucunapish mucucunamanta llujshishca shinami.
Ñuca shungupish ñuca ucupica huira shinami yacuyacun.
15Ñuca shimipish callana shinami chaquishca.
Ñuca c'allupish palagrapimi llutarishca.
Huañushpa allpa tucuchunmari saquigringui.
16Allcucunami ñucataca muyunchishca.
Mirga millai runacunami ñucataca muyunchishca.
Ñuca maquicunatapish, ñuca chaquicunatapish chugrichincunami.
17Ñuca tullucunapish yupanallami.
Chashna rurashpaca, paicunaca ricuracuncunami.
Ima tucujta chaparacuncunami.
18Ñuca churanataca paicunapurami chaupircacuna.
Ñuca churanataca sorteashpami japircacuna.
19Shina cajpipish Mandaj Dioslla, quiquinca ama caruyapaichu.
Quiquinca ñucapajca muyundij pircami cangui.
Ñucata quishpichingapaj utca shamuyari.
20Ñuca almataca espadamanta quishpichihuai.
Allcucuna huañuchicunmanta ñuca causaita quishpichihuai.
21Leonpaj shimimanta quishpichihuayari.
Búfalo huagracunapaj gachucunamanta huaquichihuayari.
22Ñuca huauquicunaman quiquinpaj shutita huillashami.
Tandanacushcacunapaj chaupipi quiquinta alabashami.
23Mandaj Diosta manchajcunaca paita alabaichigari.
Jacobpaj huahua huahuacuna paitaca jatunyachichigari.
Cancunaca Mandaj Diosta manchaichij.
Israelpaj huahua huahuacunami canguichij.
24Llaquihuan huañucujpipish yangata shina mana saquircachu, mana shitarcachu.
Paipaj ñahuitapish mana shujman churarcachu.
Ashtahuanpish paita caparijpica uyarcami.
25Jatun tandanacuicunapica, canmi ñuca alabana cangui.
Quiquinta manchajcunapaj ñaupajpimi, ñuca imalla cusha nishcacunataca pajtachisha.
26Mana jatun tucushcacunaca
micungacunami. Mana nijtami micungacuna.
Mandaj Diosta mashcajcunaca paita alabangacunami.
Paicunaca unitami causangacuna.
27Tucui pachapi causajcunami, Mandaj Diosta yuyarishpa paiman cutiringacuna.
Tucui laya aillucunami, paipaj ñaupajpi adorangacuna.
28Mandanaca Mandaj Diospajmi.
Paimi tucui llajtacunata mandanga.
29Cai allpapi tucui jatuncunami, micungacuna paita adorangacuna.
Huañushpa ñutu allpa tucunallacunapish, paipaj ñaupajpimi cunguringacuna.
Pipish quiquinllatajca mana causaita charinchu.
30Ñuca huahua huahuacunapish
quiquinpajtami rurangacuna.
Tucui paicunami Mandaj Diosmanta huillangacuna.
Huahua huahua huillacungallacunami.
31Q'uipata huacharijcunamanpish pai imalla rurashcataca huillacungallacunami.
Pai cashcata ruraj cashcahuan, chashna rurashcataca huahua huahuacunaman huillacungallacunami.
Who We AreWhat We EelieveWhat We Do
2025 by iamachristian.org,Inc All rights reserved.
