ESDRAS 5 - Quichua Chimborazo Bible

Diospaj huasita cutin shayachicushcata cutin callarishcami

1Profeta Hageopish, Iddopaj churi profeta Zacariaspish Judapi, Jerusalenpi causaj judiocunamanca judiocunallahuantaj caj israelcunapaj Dios huillachijpimi paicunaman huillarcacuna.

2Chaimi Salatielpaj churi Zorobabelpish, Josadacpaj churi Jesuapish Jerusalenpi caj Diospaj huasita cutin shayachicushcata cutinllataj shayachingapaj jatarishpa shayachi callarircacuna. Paicunahuan caj Diospaj profetacunapish ayudarcacunami.

3Chai punllacunallatajmi, jatun yacu ch'imbanij llajtacunata mandaj Tatnaipish, Setar-boznaipish, paicunahuan cajcunandij shamushpaca: “Cai huasita cutin shayachichun, cai pircacunata cutin pircachunca ¿pitaj mandarca?” nishpa tapurcacuna.

4“Cai huasita cutin shayachicuj runacunapaj shuticunaca ¿ima shutillataj?” nishpapishmi tapurcacuna.

5Ashtahuanpish judiocunata cunaj yuyajcunataca Taita Dios ricuracujpimi, quillcashpa tapushpa cachashca jatun mandaj Dariopajman chayangacama, pai quillcashpa cutichishca paicunapajman chayamungacama chai huasita shayachicushcataca mana jarcai tucurcacuna.

6Jatun yacu ch'imbanij llajtata mandaj Tatnaipish, Setar-boznaipish, paihuan caj mandajcunapish jatun mandaj Darioman quillcashpa cachangapaj quillcashcata copiashcaca cashnami:

7“Chai quillcapica, jatun mandaj Darío sumaj causai tiyachun.

8Judá llajtaman rishpa Jatun Diospaj huasita ricumushcatami yachana cangui. Chai huasitaca jatun rumicunahuanmi shayachicuncuna. Pata quinricunapipish ñami tablacunata churacuncuna. Paicuna yallitaj trabajajpimi chai trabajoca ashtahuan utca ruraricun.

9Chaimi chaipi caj cunaj yuyajcunataca: Cai huasita cutin shayachichun, pircacunatapish cutin pircachunca ¿pitaj mandarca? nishpa tapurcanchij.

10Chaita rurachicujcunapaj shuticunata can jatun mandajman quillcashpa yachaj cachangapajpishmi paicunapaj shuticunata tapurcanchij.

11Chaipi paicunaca: Ñucanchijca jahua pachapaj, cai pachapaj Diospajta rurajcunami canchij. Ñaupa huatacunaman rurashca huasita urmachishcatami cutin shayachicunchij. Chaitaca israelcunata jatun mandajmi shayachishca carca.

12Ñucanchij ñaupa yayacunallataj yallitaj millaita rurashpa jahua pachapi causaj Diosta jatunta p'iñachijpimi, paica Babilonia llajtata jatun mandaj Nabucodonosor caldeopaj maquipi churarca. Chaimi paica cai huasita urmachishpa, cai llajtapi causajcunataca Babiloniaman prezu apashca.

13Babilonia llajtata jatun mandaj Ciro mandai callari huatami, pai quiquinllataj cai Diospaj huasitaca cutin shayachichij nishpa mandarca.

14Jerusalenpi caj Diospaj huasimantami curimanta, cullquimanta rurashca Diospajta rurana charinacunata Nabucodonosor llujshichishpa Babiloniapi caj paipaj dioscunapaj huasiman aparca. Jatun mandaj Ciro chai llajtata mandai callarishpami, chai charinacunata chai huasimanta llujshichishpa pai churashca mandaj Sesbasarman cushpaca,

15cashna nirca: Jerusalenman rishpa, Diospaj huasi maipi cashcallapitaj huasita shayachishpa Diospajta rurana caicunataca chaipi churangui nishpa curca.

16Chaimi Jerusalenman Sesbasar shamushpaca, Diospaj huasi ñaupaman maipi cashcallapitaj cutin shayachingapaj callari rumita churarca. Chai punllamantapacha rurai callarishpapish manaraj tucuchinchijchu nircacunami.

17Cunanca can jatun mandajpaj yuyaipi alli cajpica, Babiloniapi caj mandana huasipi tiyacuj quillcacunapi mashcachipai. Chashna mashcachishpami cai Jerusalenpi caj Diospaj huasita cutin shayachichunca jatun mandaj Ciro mandashcata, mana mandashcata yachaj chayangui. Chaita ricushpaca can jatun mandaj imata yuyarishcata ñucanchijman huillanaman cachapangui” nishpami quillcashpa cacharcacuna.