NEHEMÍAS 4 - Quichua Chimborazo Bible

Israelcunaca p'iñajcuna llaquichishun nicujpipish pircacushcataca mana saquishcacunachu

1Jerusalén muyundij pircata ñucanchij cutin pircacushcata Sanbalat yachashpami, yallitaj p'iñarishpa ñucanchij judiocunata chanzata rurashpa,

2paipuracunapaj, Samaria soldadocunapaj ñaupajpi cashna nirca: “Cai mana valij judiocunaca ¿imatashi ruracuncuna? Sacrificiocunata Diosman cuchun saquingami yuyancunachu. Chai jatun pircataca ¿shuj punllallapi tucuchinatachu yuyancuna? ¿Rumicuna rupashpa allpa montonlla saquirishcataca cutin causachinatachu yuyancuna?” nircami.

3Sanbalathuan caj amonitapuramanta caj Tobiaspish: “Paicuna muyundijta pircashcataca shuj zorra huichiyashpallapish urmachinallamari” nircami.

4“Ñucanchij Taita Dioslla, uyahuayari. Ñucanchijca paicuna p'iñashpa yanganchishcacunamari canchij. Paicuna p'iñashpa c'amishcaca paicunapaj jahuallamantaj tigrachun. Paicunataca paicunata p'iñajcunapaj maquipi churahuayari.

5Muyundijta pircajcunata paicuna c'amishcamantaca, paicuna millaita rurashcataca ama perdonaichu. Paicuna juchallishcata quillcashcatapish cambaj ñaupajmantaca ama anchuchipaichu” nishpami mañarcani.

6Tucuicuna tucui munaihuan trabajacushcamantaca pircataca muyundijta tucui tucuchishpami, altomanca chaupicama pircarcanchij.

7Jerusalén muyundij pircataca, pircana cashcataca pircashpa, allichina cashcata allichishpa ña tucuchigrishcata yachashpami Sanbalatpish, Tobiaspish, arabecunapish, amonitacunapish, Asdodpi causajcunapish yallitaj p'iñarircacuna.

8Chaimi tucuicuna shuj shinalla tucushpa, Jerusalenpi cajcunata llaquichinata yuyarircacuna.

9Chaita yachashpami ñucanchij Taita Diosta mañarcanchij. Paicuna chashna ruranata yuyarishcamantami tutapish punllapish cuidachun cuidajcunata churarcanchij.

10Judacunaca: “Cai pircacunataca, caipi chaipi urmachishca maita mana allichipaj cashcamanta, ñucanchijca shaicushpamari mana ashtahuan allichi tucunchij” nircacunami.

11Ñucanchijta p'iñajcunaca: “Paicunapajman yaicushpa paicunata huañuchishpa llujshimungacama manapishchari pi ricunga. Chashna rurashpaca paicuna ruracushcataca saquichishunllami” nircacunami.

12Ñucanchijta p'iñajcunahuan causaj judiocunaca cashnami nijcuna carca: Tucui ñucanchijta p'iñajcunamari cancunataca llapigrin nishpami, chunga cutin huillacurcalla.

13Chaimi ñucaca cada familia tandanacushcata pircata manaraj altota pircashcacunapi, maipi manaraj pircashcacunapi paicunapaj espadacunahuan, lanzacunahuan, arcocunahuan cuidachun churarcani.

14Chashna mana rurai tucunchijchu nicujta ricushpami, ñucaca jatuncunatapish, mandajcunatapish, tucui chaipi cajcunatapish: “Ama manchaichijchu. Tucuita rurai tucuj, manchana, Jatun Diosta yuyarichij. Tucui caishujcunamanta, cancunapaj churicunamanta, cancunapaj ushushicunamanta, cancunapaj huarmicunamanta, cancunapaj huasicunamanta macanacuichij” nircanimi.

15Ñucanchijta p'iñajcunaca paicuna ñucanchijta llaquichingapaj yuyarinacushcata ñucanchij yachaj chayashcatami paicunapish yachaj chayarcacuna. Taita Diospish paicuna yuyarinacushcata yangapi churashcatapishmi paicunaca yachaj chayarcacuna. Chaimi ñucanchijca maillapi pircacushcaman tucuicuna tigrarcanchij.

16Chai punllamanta pachami ñucapajta rurajcunaca chaupica pircacurcacuna, chaupica lanzacunahuan, escudocunahuan, arcocunahuan, fierro churanacunata churashca macanacunalla chapacurcacuna. Tucui Judacunataca mandajcunami paicunapaj huashapi cuidacurcacuna.

17Chai pircata pircacuipica pasachijcunapish, aparijcunapish, shuj maquihuanca trabajacurcacunami, shuj maquihuanca espadata aisashcacunami carca.

18Pircajcunaca tucuicunami quiquin espadata chumbillinapi huarcuchishcacuna pircacurcacuna. Trompetapi tocajca ñuca c'uchupimi carca.

19Chaipimi jatuncunatapish, mandajcunatapish, tucui chaipi cajcunatapish: “Cai ñucanchij allichicun pircacunaca yallitaj achca cashcamanta caishuj chaishuj caru carupimi trabajacunchij.

20Chashna cajpipish trompetapi tocashca uyarijpica, cancuna maipi trabajacushpapish tucuicuna ñucanchijhuan tandanacunguichij. Ñucanchij Taita Diosmi ñucanchijmantaca macanacunga” nircanimi.

21Chashnami ñucanchijca, inti llujshinca trabajai callarishpaca, chishi luzerocuna ricuringacama trabajarcanchij. Ñucanchijmanta chaupica lanzacuna aisashcami chapacurcacuna.

22Tucuicunatami ñucaca: “Tucuicunami cancunapajta rurajcunandij tutacunaca, cai Jerusalenpi saquirina canguichij. Chashnami tutacunaca cuidashpa, punllacunaca trabajashpa alli cashun” nircanimi.

23Ñucapish, ñucahuan cajcunapish, ñucahuan caj q'uipa huiñaicunapish, ñucahuan caj cuidajcunapish churanacunataca dormingapajpish mana llujshichircanchijchu. Armangapajllami llujshichircanchij.