NÚMEROS 18 - Quichua Chimborazo Bible

Curacunapish levitacunapish imallata rurana cashcami

1Mandaj Diosca Aarontaca cashnami nirca: “Diospajlla huasipi pilla imata rurana cashcacunalla mana rurashpaca canpish, cambaj churicunapish, tucui levitacunapishmi juchayuj tucunguichij. Curacuna rurana cashca shinataj mana rurashpapish canhuan, cambaj churicunahuanmi juchayuj tucunguichij.

2Cambaj huauquicunaca canhuan tandalla Diospajta rurajcuna cachun churangui. Chaipimi cambaj yayamanta Levi ailluca cancuna mandashcata rurangacuna. Chashnami canpish cambaj churicunapish Dios chaipi ricurina carpa huasi ñaupajpi cancuna rurana cashcata ruranguichij.

3Levitacunaca can mandashcallata rurachuncuna. Diospaj carpa huasitapish tucuita cuidachun. Shina cashpapish Diospajta ruranapaj caj imalla charinacunaman, altarmanpish ama c'uchuyachun. Cancunapish, paicunapish ama huañungapajmi chashna rurana canguichij.

4Levitacunaca Dioshuan tupanacuna carpa huasipica paicuna imata rurana cashcallata rurashpa canta ayudachun. Diospajlla carpa huasipica paicuna imallata rurana cashcata tucuita rurachun. Manapish Levita cajca cancunapajmanca ama c'uchuyachun.

5Israelcunapaj jahuaman Dios p'iñarishpa llaquichina ama shamuchunca, Diospajlla ucupi imalla rurana cashcatapish, altarpi imalla rurana cashcatapish cancunalla rurashpami cuidana canguichij.

6Cancunapaj huauqui levitacunataca israelcunapuramanta ch'icanchishpami japircani. Paicunataca Mandaj Dios cancunaman cushca cachunmi cancunaman curcani. Paicunaca Dioshuan tupanacuna carpa huasipimi Diospajta rurangacuna.

7Ashtahuanpish curacuna imalla rurana cashcata rurashpa Mandaj Diospajta ruranataca altarpipish, linsohuan jarcachishca ucupipish canhuan, cambaj churicunallahuanmi rurana canguichij. Curacuna imalla rurana cashcata ruranataca ñucami curcani. Manapish cura caj chaiman c'uchuyashpaca huañungami” nircami.

Curacunapish levitacunapish paicuna imata rurashcamanta causana cashcami

8Mandaj Diosca Aarontaca cashnami nirca: “Ñucaman cushca ofrendacunata cuidachunca canmanmi cuni. Diospajlla cachun ch'icanchishpa israelcuna tucui imata cushcacunataca canman, cambaj churicunamanmi Diospajta rurashcamanta japina cashcata japichun cuni. Chaicunataca cambaj huahua huahuacunapish chai shinallataj japicuchunlla mandashcami.

9Diospajlla ch'icanchishpa cushcacunata Diosman cushpa rupachijpi saquirishcacunataca: Diosman cushca granocunapish, juchamanta cushcacunapish, rurangui nishcata mana rurashpa juchallishcamanta cushcacunapish ñucapajlla ch'icanchishcami. Chaicunataca canmanpish, cambaj churicunamanpishmi cuni.

10Diospajlla ch'icanchishca cashcamanta chaicunataca Diospajlla huasipi micungui. Tucui chaipi cajcunapish micuchuncuna.

11Caicunapishmi cambaj canga: Cuj cashcamanta cushcacunata huichi ricuchishpa cushcacunataca canman, cambaj churicunaman, cambaj ushushicunamanmi cuni. Chaicunataca cambaj huahua huahuacunapish chai shinallataj japicuchunlla mandashcami. Chaicunataca cambaj huasipi cajcuna cashpapish ima mapa illajcunalla micuchun.

12Israelcunapaj chagracunapi punta p'ucushca ashtahuan allicunata Mandaj Diosman cushcacunamantaca aceitetapish, llullu vinotapish, trigotapish canmanmi cuni.

13Chagrapi punta p'ucushca granocunamanta Mandaj Diosman cushcacunaca cambajmi canga. Chaicunataca cambaj huasipi cajcuna cashpapish ima mapa illajcunalla micuchun.

14Cuna tucushcamanta Diospajlla ch'icanchishpa israelcuna tucui imalla cushcacunapish cambajmi canga.

15Israelcunapaj punta churi cashpapish, paicunapaj animalcuna huachashca punta c'ari huahua cashpapish punta huacharishcacunata Mandaj Diosman cushcacunaca cambajmi canga. Shina cajpipish israelcunapaj punta churicunapaj randica cullquita pagashpa llujshichichun mandangui. Mana ñucaman cuna caj animalcunapaj randipish cullquita pagashpa llujshichichun mandangui.

16Huacharishcamanta shuj quillayuj cajpi pagashpa llujshichichun mandangui. Mashnata cuna cashca shinallatataj ricushpa pichca siclota pagachichun. Chaitaca Diospaj carpa huasipi tiyaj cullquita pezanapi pezashca cachun. Shuj sicloca ishqui chunga gerami.

17Punta huacharishca animalcuna, huagracuna, ovejacuna, chivocuna cajpica ama cullquita japingui. Chaicunaca ñucapajlla ch'icanchishca cashcamanta paicunapaj yahuartaca altar jahuapi tsirapangui. Huirataca Diosman cushpa rupachingui. Rupachishpa cujpimi, Mandaj Diospajca mishquijlla ashnacuj canga.

18Chai aichaca, Diosman ricuchishpa cuyuchishpa cushca pecho aichapish, alli lado changa aichapish cambajmi canga.

19Israelcuna Mandaj Diospaj ch'icanchishpa paiman cushcacunataca tucui imatapish canman, cambaj churicunaman, cambaj ushushicunamanmi cuni. Chaicunataca cambaj huahua huahuacunapish chai shinallataj japicuchunlla mandashcami. Chaica Mandaj Diospaj ñaupajpica cambajpish, cambaj huahua huahuacunapajpish huiñaipaj Dioshuan ari nishcata ricuchij cachi shinami canga” nircami.

20Mandaj Diosca Aarontaca cashnami nirca: “Canca israelpurapica caishuj israelcuna shina quiquin allpa cachun japina allpataca mana japinguichu. Can japina cashca allpa shinaca israelcunapaj chaupipi caj ñucami cani.

21Levipaj huahua huahuacunamanca, Dioshuan tupanacuna carpa huasipi Diospajta imalla rurana cashcata rurashcamanta japina cashcataca israelcuna chungamanta shujta cushcacunatami cuni.

22Israelcunaca Dioshuan tupanacuna carpa huasimanca ama c'uchuyachun. Chaiman c'uchuyashpa juchayuj tucushpa ama huañungapajmi mana c'uchuyana can.

23Dioshuan tupanacuna carpa huasipica levitacunallami Diospajta rurangacuna. Chaipi imalla rurana cashcata mana paicunalla rurashpaca, paicunallatajmi juchayuj tucungacuna. Chai ruranataca cambaj huahua huahuacunapish paicunalla ruracuchunlla mandashcami. Levitacunaca israelcunapurapica allpataca mana japingacunachu.

24Levitacuna japina allpa shina cachunca israelcuna tucui imamantapish chungamanta shujta ñucaman cushcacunatami cuni. Chaita cushpami, paicunataca Israelpica quiquinpajtaj caj allpataca mana charinguichijchu nircani” nircami.

25Mandaj Diosca Moisestaca cashnami nirca:

26“Levitacunataca cashna nishpa mandai: Israelcuna chungamanta shujta cushcacunaca cancuna japina allpapaj randi ñuca cancunaman cushcami. Chungamanta shujta paicuna cushcacunata japishpaca chai japishcallamantatajmi cancunapish chungamanta shujta Mandaj Diosman huichi ricuchishpa cuyuchishpa cuna canguichij.

27Chaicunata cancuna cushcaca quiquin allpamanta trigota trillashpa cushca shinallataj, quiquin uvata capishpa vinota cushca shinallatajmi canga.

28Israelcuna chungamanta shujta cushcacunata japishpaca, levitacunapish chashnami Mandaj Diosman cuna can. Chaicunataca quiquin granota ch'icanchishpa Mandaj Diosman cushca shinallataj cachun, Aarón curaman cuchun.

29Cuj cashcamanta tucui imallata cushcacunata chasquishcacunamantaca, Mandaj Diosman cungapaj ch'icanchichun. Chaicunataca tucuimanta ashtahuan yalli allicunata ñucapaj ch'icanchishpa cuchun mandai” nircami.

30“Levitacunataca cashnapish ni: Cushcacunamanta japishcacunataca ashtahuan allicunata Mandaj Diospajlla ch'icanchijpica, chai saquirishcacunaca quiquin allpamanta trigo, quiquin allpamanta uva shinallatajmi tucun.

31Chaicunataca Dioshuan tupanacuna carpa huasipi cancuna imalla rurana cashcata rurashcamanta japina cashcamanta japishpa cancunapish, cancunapaj familiacunapish maipi cashpapish micunguichijlla.

32Japishcacunamanta ashtahuan yalli allicunataca ñucamanraj cushpaca, mana juchayuj tucunguichijchu. Chaipica, ñucapajlla ch'icanchishpa israelcuna cushcacunataca mana yangata rurashpa mana huañunguichij” nircami.