1Moab llajta ima tucuna cashcata huillachishcami.
Shuj tutami Moabpi caj Ar pueblota chingachishpa chulunllata saquirca.
Chaica chashnatajmi canga.
Shuj tutami Moabpi caj Kir pueblotaca chingachishpa chulunllata saquirca.
Chaica chashnatajmi canga.
2Bayit, Dibón pueblocunapaj jatun urcucunapi caj altarcunapi huacanamanmi huichiyangacuna.
Nebo, Medeba pueblocunata tucuchishcamantapishmi, Moabpi causajcunaca caparishpa huacangacuna.
Tucuicunami umata rutushca, barbasta anchuchishca cangacuna.
3Cañamazuta churarishcami, pueblo ñancunata puringacuna.
Huasi jahuacunapipish,
plaza pambacunapipish, tucuicunami caparishpa huacangacuna.
Tucuicunami jatun llaquihuan cangacuna.
4Hesboncunapish, Elealecunapish caparingacunami.
Paicuna caparishcaca Jahaza pueblocamami uyaringa.
Chaimi Moabpaj alli macanacuj soldadocunapish caparingacuna.
Paicunapaj almapish chujchucungami.
5Chaipica Moabmantaca caparishpami huacasha.
Chai llajtamanta llujshishpa rijcunaca, Zoarcamami miticushpa ringacuna.
Paicunaca quimsa huatayuj huagra shinami ringacuna.
Luhit huichitami huacaihuan huichiyangacuna.
Horonaimman rina ñantaca llaquichishcamanta huacanata huacaihuanmi ringacuna.
6Nimrimpi tiyaj yacucunapish chaquishcami canga.
Q'uihuapish chaquiringami.
Retoñacuj q'uihuacunapish chaquiringami.
Tucui verdijlla cajcunami chingaringa.
7Chaimantami Moabcunaca paicunapaj munashca charinacunata, huaquichishcacunata apashpa sauce yuracuna tiyan yacu huaicuman ringacuna.
8Paicuna llaquihuan cashpa caparishcaca Moab lindecunacamami uyarirca.
Eglaimcamami paicuna sinchita caparishcaca uyarirca.
Beer-elimcamami paicuna aij nishpa caparishcaca uyarirca.
9Dimón pueblo yacucunapish yahuarhuan jundami canga.
Dimón pueblomanca ashtahuan jatun cai llaquicunatami ñucaca cachasha.
Moabmanta miticushpa rij moabitacunata tucuchichunca leoncunatami cachasha.
Mana huañushpa saquirijcunata tucuchichunpish leoncunatami cachasha.
Who We AreWhat We EelieveWhat We Do
2025 by iamachristian.org,Inc All rights reserved.
