ROMANOS 7 - Quichua Chimborazo Bible

Cazarashcacunahuan ch'imbapurashcami

1Huauquicuna, (Mandashcata yachajcunatami rimani). Mandashcaca, maijanpish causacujllapi mandacushcataca yachanguichijmari.

2Cazarashca huarmica cusa causacujpirajca, mandashcapi nishca shinaca cusapi huatashcami. Ashtahuanpish cusa huañujpica, cusapi huataj mandashcamantaca cacharirishcami saquirin.

3Cusa causacujpiraj shujtaj c'arihuan cazarajca, huainayajmi nishcami canga. Ashtahuanpish paipaj cusa huañujpica, chai mandashcamantaca cacharirishcami. Chaipica shujtaj c'arihuan cazarashpapish, mana huainayajchu canga.

4Chashnallataj ñuca huauquicunalla, cancunaca Cristopaj cuerpomantaca, Mandashcata ama rurangapajca huañushcami carcanguichij. Huañushcacunapaj chaupimanta causarijpaj cashcamanta, Diospajca alli granota p'ucuna yuyailla causashunchij.

5Aicha munaipiraj causacujpica, Mandashcami rijchachij shina ñucanchij cuerpopi caj miembrocunataca, millaita rurachishpa huañuiman apaj granota p'ucuchicurca.

6Ashtahuanpish cunanca huatashcata charicuj Mandashcapajta ama rurangapajca, huañushcami canchij. Chaimantami quillcashca mauca Mandashcaca ña mana mandacun. Cunanca Espíritu cushca mushuj causaihuanmi servicunchij.

Ñucapi causacuj juchami mandasha ninlla nishcami

7Shina cajpica ¿imatataj nishun? ¿Mandashcaca juchachu? ¡Manataj chashnachu! Ashtahuanpish Mandashca mana tiyashca cajpica, imalla jucha cashcataca mana yachaimanchu carcani. “Shujtajpajta ama munangui” nishpa Mandashca mana yachachishca cajpica, shujtajpajta munana jucha cashcataca mana yachaimanchu carcani.

8Ashtahuanpish juchaca mandashcahuan tucushpami, ñucapica shujtajpajta munanata callarichirca. Mandashca illajllaca, juchaca huañushcami.

9Mandashca manaraj tiyajpica ñucaca causacurcanimi. Ashtahuanpish mandashca shamujpica juchaca causarircami, ñucaca huañurcanimi.

10Causaiman pushaj mandashcallatajmi, ñucataca huañuiman chayachicushca carca.

11Juchaca mandashcahuan tucushpami, ñucataca umarca. Chai Mandashcami huañuchirca.

12Mandashcaca jucha illajtajmi. Chai Mandashcapi imalla nishcacunapish jucha illajmi, cashcata rurajmi, allimi.

13Shina cajpica ¿chai alli cashcachu ñucataca huañuchij tucurca? ¡Manataj chashnachu! Ashtahuanpish juchallatajmi jucha cashcata ricuchingapajca, chai alli mandashcahuan tucushpa ñucataca huañuchirca. Chashnami juchaca, yallitaj millaiman chayachicuj cashcata Diosca mandashcahuan ricuchin.

14Mandashcaca Espiritumanta cashcatami yachanchij. Ashtahuanpish ñucaca ñuca munaita ruracuj cashcamanta juchaman c'atushcami cani.

15Imata ruracushcatapish mana entendinichu. Rurasha nishcataca mana ruranichu, ashtahuanpish p'iñacushcatarajmi rurani.

16Mana rurasha nicushcataraj rurashpami, Mandashcataca alli cashcata entendini.

17Ñuca mana rurasha nicushcataca, mana ñucallatajchu rurani, ashtahuanpish ñucapi tiyaj juchami chaitaca rurachicun.

18Ñuca aichapica, ima alli mana causashcatami yachani. Chaimantami allita rurana munai ñucapi tiyajpipish, mana rurai tucuni.

19Allita ruranata ñuca munacushcataca mana ruranichu. Ashtahuanpish mana munacushca millaitarajmari rurani.

20Ñuca mana munacushcataraj rurashpaca ña mana ñucachu rurani, ashtahuanpish ñucapi tiyaj juchami chaitaca rurachicun.

21Chashna cajpimi allita ñuca rurasha nicushpapish mana rurashpaca, mandashcapi nishca shinaca millaita ruranaca ñucallapitaj tiyashcata yachani.

22Ñuca ucu yuyaipica, Dios mandashcallahuanmi cushicuni.

23Ashtahuanpish ñuca cuerpopi caj miembrocunapica, shujtaj mandashcatami ricuni. Paimi ñuca yuyaita mandajhuan macanacucun. Chaica ñuca cuerpopi caj miembrocunatami juchapaj mandashcata rurachun huatashpa apacun.

24¡Aij, ñuca huajchalla! ¿Pitaj ñucataca, cai huañuj cuerpomantaca cacharichingari?

25¡Ñucanchij Mandaj Jesucristomantaca, Taita Diostami pagui nini! Ñuca yuyaihuanca Dios mandashcatami rurani. Shina cajpipish aichamari juchapajta rurachinlla.