ISAÍAS 8 - Quichua Chimborazo Bible

Mandaj Diosca cancuna manchana cachun nishcami

1Mandaj Diosca ñucataca: “Shuj jatun tablata japishpa Maher-salal-hasbaz nishca shimicuna ima nisha nishcata alli rezanallata quillcai nircami.

2Chashna nijpica, Urías curata, Jeberequiaspaj churi Zacariastami chaicunata ricushpa ima shina cashcata huillachun ñucahuan tandachircani”

3Chai q'uipaca profeta caj ñuca huarmipi ñuca chayarijpica, paica chichushpami shuj c'ari huahuata huacharca. Chaimi Mandaj Diosca ñucataca: “Cai huahuataca Maher-salal-hasbazta shutichi.

4Huahua manaraj ñuca yayito, ñuca mamita ninata yachajpimi, Asiria llajtata jatun mandajca Damasco pueblopi achca charishcacunata, Samariapi causajcuna imalla charishcacunata quichunaman shamunga” nircami.

5Mandaj Diosca cutinmi ñucataca:

6“Cai runacunaca, casijllata ricuj Siloé yacucunata yanganchishpami Rezinhuanpish, Remaliapaj churihuanpish cushicurcacuna.

7Chaimantami Jatun Diosca, paicunapaj llajtamanca manchanana chai Éufrates jatun yacuta cachagrin.

Asiria llajtata jatun mandajmi, chai jatun yacu jundashpa, tucui lado uri pambacunata tallirij shina cai tucui llajtacunata pai imallata rurai tucuj cashcahuan llaquichinga.

8Chai jatun yacuca, Judacama rishpa ashtahuan ashtahuan mirarishpami, cungacama millpunga.

Paica cambaj llajtataca paipaj alasta pascashpami tucui tapanga.

Emanuel-lla” nircami.

9Llajtacunapi causajcuna tandanacuichijllatagari.

Urmanguichijllatajmi.

Mai caru llajtacunapi causajcunapish, tucuicuna caita uyaichij:

Alli chumbilliricuichijllatagari.

Chingachishcallatajmi canguichij.

Macanacuipaj alli allichirichijllatagari.

Chingachishcallatajmi canguichij.

10Imalla ruranacunata yuyarinacucuichijllatagari.

Chaicunatapish chingachishcami canga.

Alli parlanacucuichijllatagari, chaipish yangallami canga.

Diosca ñucanchijhuanmari.

Jatun Diosllatami manchana nishcami

11Mandaj Diosca ñucataca, paipaj tucuita rurai tucuj maquihuanmi, caipi causajcunapaj ñanpi amataj purichun nishpa cashna nirca:

12“Caipi causajcuna huashalla alli yuyarinacushcahuantajca ña imatapish ruranatajmi nincunami. Paicuna yuyashca shinaca ama yuyaichijchu. Paicuna manchacushcacunatapish ama manchaichijchu. Manchanami canchij nishpallapish ama yuyaichijchu.

13Cancunaca tucuita Mandaj Diosta manchaichij. Paillata jucha illajmi cangui nichij. Cancuna manchana, cancuna chujchunaca Mandaj Dioslla cachun.

14Chashna cajpica, paica Diospajlla huasimi canga. Ashtahuanpish israelcunapaj, judacunapajca ñitcana rumimi canga. Paicuna urmanapajca ñitcana rumi shina, lazyana angu shinami canga. Jerusalenpi causajcuna urmanapajca linchi shinami canga.

15Paicunapuramantaca achcacunami ñitcangacuna, urmangacuna, ñuturingacuna. Maijancunaca tsagnarishpami urmangacuna. Prezu apashcami cangacuna.

16Dios ima shina cashca shina causanataca charirangui.

Ñuca yachachishcacunataca ñucata catijcunapaj chaupipica chaitataj pajtachingui” nircami.

Isaías ashtahuan cunashcami

17Mandaj Diosca Jacobpaj huahua huahuacunamanta paipaj ñahuita pacajpipish ñuca Mandaj Diosllatami shuyasha.

Paillapimi shunguta churasha.

18Ñucapish, Mandaj Dios ñucaman cushca ñuca churicunapish, israelcuna ima tucunata ricuchijcunami canchij.

Sión urcupi causaj, tucuita Mandaj Dios churashcacunami canchij.

19Cancunata maijancuna:

“Muspachij yumbucunata, adivinocunata, manapish entendipajta rimarijcunata tapuichigari” nijpica, cancunaca:

Cai gentecunaca ¿manachari paicunapaj Diosta tapunari?

¿Causajcunamantaca huañushcacunatachu tapunari? nishpa cutichinguichij.

20Mandashcapish, Dios ima shina cashca shina causachun nishcapish tiyanmi.

Mandashcacunapi nishca shina mana nishpaca, paipica manaraj pacarishcachu.

21Paicunaca cai allpapica shaicushcacuna, yaricaihuanmi caiman chaiman puringacuna.

Yaricaihuan cashpami p'iñarishpa jahua pachata huichilla ricushpa paicunata jatun mandajtapish, paicunapaj Diostapish mana alli nishpa rimangacuna.

22Allpata ricushpaca llaquicunata, yallitaj amsatami ricungacuna.

Paicunaca chai yallitaj amsapimi shitashca cangacuna.