2 SAMUEL 18 - Quichua Chimborazo Bible

Absalón huañushcami

1Davidca tucui paihuan caj runacunata yupashpa ricushpaca, 1.000 runacunata, 100 runacunata pushachunmi churarca.

2Chai q'uipaca Davidca paicunata cachangapajca quimsapi chaupishpami, shuj mirgataca Joab pushachun churarca. Caishuj mirgataca, Abisai pushachunmi churarca. Abisaica Sarviapaj churi, Joabpaj huauquimi carca. Chaishuj mirgataca, Geteo Itai runa pushachunmi churarca. Chashna rurashpaca jatun mandajca:

–Ñucapish macanacunaman cancunahuanmi llujshigrini– nirca.

3Chaimi paicunaca:

–Jatun mandajlla. Canca mana rinachu cangui. Canta p'iñajcunaca ñucanchij miticushpa rijpipish, ñucanchijllataca mana catingacunachu. Chaupi yalli ñucanchij huañujpipish paicunapajca mana ima cangachu. Canta huañuchijpica ñucanchijpura 10.000 runacunata huañuchishcata yallimari canga. Canca ñucanchijtaca cai pueblollamanta ayudai– nircacuna.

4Shina nijpi jatun mandajca: –Ñucaca ima shinami cancunapi alli chaita rurashallami– nishpaca, jatun mandajca puebloman yaicuna pungu c'uchuman tucushpami shayarirca. Chaimi patsajpi, patsajpi, huarangapi, huarangapi chaupishcacunaca huashan huashan llujshishpa rircacuna.

5Jatun mandajca chai macanacuiman cachacushpaca Joabtapish, Abisaitapish, Itaitapish:

–Ñucata c'uyashpaca, Absalón huambrataca ama llaquichinguichijchu– nircami.

Absalonta ama llaquichinguichij nishpa jatun mandaj soldadocunata pushajcunata mandacujtaca tucuicunami uyarcacuna.

6Paicunaca israelcunahuan macanacungapaj rishpaca, Efrainpaj yuracuna tiyanpimi macanacurcacuna.

7Chaipimi israelcunaca Davidpajta rurajcunapaj maquipi urmarcacuna. Chai punllaca chaipica jatun huañui tiyajpimi 20.000 runacuna huañurca.

8Chai macanacuica, tucui llajtapimi mirarirca. Chai macanacuipica, sachami espadahuan huañuchishcacunatapish yalli huañuchirca.

9Absalonca Davidpajta rurajcunahuanmi tuparca. Paica mulapi montashca ricushcamantami chai mulaca ramacuna junda encina yura ucuta rijpi, Absalonca yura ramapi cunga churarishpa huarcurishca saquirirca. Mulaca callpashpa rircallami.

10Chaitaca shuj runa ricushpami, Joabmanca:

–Ñucaca, Absalontaca shuj encina yurapi huarcurishcatami ricumuni– nijpi,

11Joabca chai huillaj runataca:

–Chaita can ricushpaca ¿ima nishpataj huañuchishpa pambaman mana shitamurcangui? Can chashna rurashca cajpica, ñucaca cushicushpami canmanca chunga siclo cullquita, shuj chumbillirina caratapish cuiman carcani– nirca.

12Chaimi chai runaca Joabtaca:

–Can ñucaman 1.000 siclo cullquita cuna cajpipish, jatun mandajpaj churitaca ñuca maquihuanca mana huañuchishachu. Ñucanchijca cantapish, Abisaitapish, Itaitapish, jatun mandaj mandashpa cachacushpaca, Absalón huambrataca ama tuparinguichij nijtami uyarcanchij.

13Absalonta huañuchishca cashpaca ñuca causaita chingachingapajllami chashna ruraiman carcani. Ima rurashcapish jatun mandajpaj ñaupajpica mana pacalla saquirinchu. Ashtahuanpish canllatajpish ñucata llaquichijmi canguiman carca– nircami.

14Shina nijpi Joabca:

–Ñucaca mana canhuan yanga shayacushalla ninichu– nishcahuan quimsa flechacunata japishpa rishpami, Absalonpaj shungupi satirca.

Absalonca encina yurapi huarcurishcalla manaraj huañushca cajpimi chashna rurarca.

15Chai q'uipaca Joabpaj chunga escuderocunapish muyujta shayarishpami Absalontaca tucui huañuchircacuna.

16Chai q'uipaca trompetapi Joab tocashpa jarcajpica, israelcunata catinataca saquircallacunami.

17Absalonpaj cuerpota japishpaca, sacha chaupipi tiyaj shuj jatun jutcupi shitashpami, chai jahuapica rumicunata jatun montón tucujta shitarcacuna. Israelcunaca tucuicunami paicunapaj carpa huasicunaman miticushpa callparcacuna.

18Absalonca pai causacushparajmi, jatun mandajpaj nishca pambapi shuj jatun pircata rurachirca. Chaipica paica ñucaca churita mana charinichu. Ñuca shuti ama chingarichun nishpami paipaj quiquin shutita chai pircapica churarca. Chai pircataca cunan punllacamami “Absalonpaj pirca” nincuna.

19Chai q'uipami Sadocpaj churi Ahimaasca Joabtaca:

–Jatun mandajmanca canta p'iñajpaj maquimantaca Mandaj Diosca ñami quishpichishca nishpa huillanaman callpasha– nirca.

20Chaimi Joabca:

–Cunanca ama huillanaman richu. Shujtaj punllacuna shujtaj imata huillanaman ringuillami. Cunanca jatun mandajpaj churi huañushcataca maitataj huillanaman ringuiyari– nircami.

21Shina nishpaca, Joabca etiope runatami:

–Tucui imalla ricushcata jatun mandajman can huillamugri– nijpi, etiope runaca Joabta alli nishcata ricuchingapaj paipaj ñaupajpi cumurishpaca callpashpa huillanaman rirca.

22Sadocpaj churi Ahimaasca cutinllatajmi Joabtaca:

–Ima tucungapajpish etiope runapaj cati catillapish huillanaman risha ninitajmi– nijpipish, Joabca:

–Ñuca huahualla maitataj yangaca huillanaman callpanguiyari. Huillashcamanta japinataca imata mana japinguichu– nircami.

23Shina nijpipish Ahimaasca:

–Ima mana tiyana cajpipish, ñucaca huillanaman callpagrinitajmi– nijpimi Joabca:

–Shinashpaca callpailla– nirca.

Shina nijpi Ahimaasca, pambacunallata caj ñanta callpashpa rishpami, etíope runata mishashpa rirca.

24Davidca, puebloman yaicuna pungupimi tiyacurca. Torremanta chapaj runaca pungu jahuapi caj torreman huichiyashpa huichilla ricushpaca, shujlla callpashpa shamucujtami ricurca.

25Chaimi chapaj runaca caparishpa jatun mandajman huillajpi, jatun mandajca:

–Shujlla shamushpaca alli huillaitami apamucunga– nirca.

Chai runa ñalla c'uchuyamucujpimi,

26chapaj runaca shujtaj runapish callpashpa shamucujta ricurca. Chaimi chapaj runaca, pungupi chapaj runamanca:

–Shujtaj runapishmari shujlla callpashpa shamun– nijpi, jatun mandajca:

–Chai runapish huillaj runallatajmi canga– nirca.

27Chai chapaj runaca cutinmi:

–Callpashpa ña chayamucujca, Sadocpaj churi Ahimaaspaj callpaitami callpamucun– nijpi jatun mandajca:

–Chai cashpaca alli runami, alli huillaihuanmi shamucunga– nirca.

28Ahimaas c'uchuyamushpaca, caparishpami jatun mandajtaca: Sumaj causaimi tiyan nishpa, jatun mandajpaj ñaupajpi pambacama cumurishpaca: –Jatun mandaj ñuca amota c'ariyajcunata cambaj maquipi entregaj cambaj Taita Diosta alli nishca cachun– nirca.

29Shina nijpi jatun mandajca:

–¿Absalón huambraca allillachu?– nijpi, Ahimaasca:

–Can jatun mandajpajta ruraj Joab paipajta ruraj ñucata cambajman mandashpa cachacujpimi, jatun bullata uyarcani. Ima tucushcataca mana yachanichu– nircami.

30Chaimi jatun mandajca:

–Chaiman tucushpa chaillapi shayari– nijpi Ahimaasca, chainijman tucushpa chaipi shayarirca.

31Chai q'uipaca etíope runa chayamushpami:

–Jatun mandaj ñuca amopajca alli huillaitami apamuni. Mandaj Diosca canta p'iñashpa jatarij tucuicunapaj maquimantaca ñami quishpichin– nirca.

32Shina nijpi jatun mandajca, etíope runataca:

–¿Absalón huambraca allillachu?– nijpi etíope runaca:

–Can jatun mandaj ñuca amota p'iñajcunaca, p'iñajcunapish, llaquichingapaj jatarijcunatapish tucuicuna chai huambra shinallataj tucushpaca allimi canman– nircami.

33Chashna nishcata uyashpami, jatun mandajca musparijta llaquirishpa puebloman yaicuna pungu jahuapi caj huasi ucuman huichiyashpa, achcata huacarca. Pai ña huichiyacushpaca: “Ñuca huahua Absalonlla, ñuca huahualla ñuca huahua Absalonlla, cambaj randica ñucata huañuchishca cashparajchari alli canman carca. Ñuca huahua Absalonlla, ñuca huahua Absalonlla” nishpami huacarca.