EZEQUIEL 33 - Quichua Chimborazo Bible

Chapaj runa imallata rurana cashcamanta(Ez. 3.16-21)

1Mandaj Diosca ñucataca cashnami nirca:

2“Huañujlla aichayuj runalla, cambaj llajtapuracunamanca cashna nishpa huillai: Shuj llajtapi causajcunaca, paicunapuramanta shujta agllashpami, ñuca espada shamucujta chapachun churangacuna.

3Chai runaca, ñuca espada chai llajtaman shamucujta ricushpaca, tocashpami huillanga.

4Maijanpish chai trompeta tocashcata uyashca jahua, mana cazushcamanta espada shamushpa paita chugrichijpica, paipaj jahuallatajmi canga.

5Chai trompeta tocashcata uyashca jahua mana miticushpaca, paipaj jahuallatajmi canga. Ashtahuanpish imapaj tocashcata maijanpish yachashpaca, paipaj causaitaca quishpichingami.

6Ashtahuanpish cai llajtapi causajcunata espada chugrichinaman shamucujta ricushca jahua, chai chapaj runa mana trompetapi tocashpa yachaj chayachishcamantaca, maijanta chai espada huañuchijpica, paipaj yahuarca chai chapaj runapaj jahuami canga.

7Huañujlla aichayuj runalla, cantaca israelcunata ricuj cachunmi churarcani. Cunanca ñuca imalla nishcata alli uyangui, paicunamanca ñuca imalla nishcata huillashpa cunangui.

8Ñucata mana manchaj runataca: Ñucata mana manchashcamantaca huañunatajmi cangui nishachari. Shina nijpipish canca ñucata mana manchaj runa millaita ruranata saquichun, mana rimanguichari. Chashna mana rimajpica, paipaj juchamantaca huañungatajmi. Shina cajpipish paipaj yahuarca, cambaj jahuami canga.

9Ashtahuanpish ñucata mana manchaj runataca, millai causaimanta saquirichun rimanguichari. Can rimashca jahua mana saquirishpa, paipaj juchamanta huañushpaca, paipaj jahuallatajmi canga. Ashtahuanpish canca cambaj causaitaca quishpichinguimi ninmi ni.

Mandaj Diosca cashcata ruraj cashcamanta(Ez. 18.21-32)

10Huañujlla aichayuj runalla, israelcunataca cashna ni: Cancunaca cashnami ninguichij: Ñucanchij mana cazushpa c'ariyashcapish, ñucanchij juchacunapish ñucanchij jahuallapitajmari. Chashna mana allita rurashcamantamari, ñucanchijca tucuricunchij. Chashnaca ¿ima shinataj causashunri? ninguichijmi ni.

11Cashnapish ningui: Mandaj Jatun Diosca cashnami nin: Ñucaca causacunimi. Ñucata mana manchaj runataca, mana huañuchun munanichu. Ashtahuanpish pai ima shina causacushcata saquishpa causaita charichunmi munani. Chashna cashcamantaca israelcunalla, cancuna millaita ruracushcata saquishpa, ñucapajman cutirichigari, cutirichigari. ¿Maitataj yangamantaca huañunguichigari? ninmi ni.

12Huañujlla aichayuj runalla, cambaj llajtapuracunataca cashna ni: Maijanpish cashcata ruracushcata saquishpa ñucata c'ariyajpica, ñaupaman cashcata rurashcacunaca mana quishpichingachu. Shinallataj ñucata mana manchaj runa millaita ruranata saquishpa cutirijpica, ñaupaman pai millaita rurashcacunaca mana jarcangachu. Cashcata ruraj runaca allita ruracushca cashpapish, juchata rurashpaca, huañungatajmi.

13Ñucaca cashcata ruraj runataca: Causanguitajmi nishachari. Shina nijpica, paica cashcata rurajmi cani, causashallami yuyashpa millaita rurangachari. Chashna rurajpica ñaupaman cashcata pai rurashcacunataca manataj yuyarishachu, ashtahuanpish millaita rurashcamantaca huañungatajmi.

14Shinallataj ñucata mana manchaj runataca: Huañunatajmi cangui nishachari. Shina nijpipish millaita ruranata saquishpa, ñucapajman cutirishpa ima pandata mana rurashpa, cashcata rurangachari.

15Prendata quichushcatapish tigrachingachari, imallata shuhuashcatapish cutichingachari. Causanata yachachun quillcachishcapi nishca shina causashpa, millaita mana rurashpaca causangatajmi, manataj huañungachu.

16Chashna rurajpica, pai ñaupaman juchata rurashcacunataca shujllatapish manataj yuyarishachu. Ashtahuanpish imata mana pandarishpa, cashcata rurashcamantaca causangatajmi.

17Chaicunata rurajta ricushpaca, cambaj llajtapuracunaca: Jatun Diosca manamari allita ruranchu ningacunami. Ashtahuanpish paicunarajmi mana allita rurancuna.

18Cashcata ruraj runa cashpapish, cashcata ruranata saquishpa millaita rurashpaca, huañungatajmi.

19Shinallataj ñucata mana manchaj runa cashpapish millaita ruranata saquishpa, ima pandata mana rurashpa, cashcata rurashpaca causangatajmi.

20Chaita ricushpami cancunaca: Jatun Diosca manamari allita ruranchu ninacunguichij. Israelcunalla, cancuna ima shinalla causashcataca ñucami ricuchisha” nircami.

Jerusalén urmanamanta

21Ñucanchijca ñami chunga ishqui huatata prezu tiyarcanchij. Chunga ishqui huata chunga quillapaj pichca punllapimi, ñapish shuj runaca Jerusalenmanta miticushpa ñucapajman shamurca. Chai runaca: “Pueblotaca shujtajcuna quichunmi” nishpami huillarca.

22Chai runa manaraj ñucapajman shamujpimi, Mandaj Diosca chishiman paipaj maquita ñuca jahuapi churashpa cutin rimachirca. Cayandij tutamanta chai runa chayanapajca, ñami cutin rimacurcani.

23Chaimantami Mandaj Diosca ñucata cashna nirca:

24“Huañujlla aichayuj runalla, chai llaquinayaj llajtapi causaj israelcunaca cashnami rimancuna: Abrahamca pailla cashca jahuami cai llajtataca japirca, ñucanchijcarin achcacunamari canchij. Maitataj cai llajtataca mana japishunri nincunami.

25Chashna nijcunamanca cashna niyari: Mandaj Jatun Diosca cashnami nin: Cancunaca aichatapish yahuarndijmi micunguichij, rurashcalla dioscunata adorajcunapishmi canguichij, huañuchijcunami canguichij. Chashna mana allita rurajcunaca ¿maitataj cai llajtataca japinguichigari?

26Cancunaca espadahuan huañuchijcuna, millananata rurajcuna, shujtajpaj huarmihuan huainayashpa mapayachijcunami canguichij. Chashna mana allita rurajcunaca ¿maitataj cai llajtataca japinguichigari? ninmi ningui.

27Paicunamanca cashnapish ningui: Mandaj Jatun Diosca cashnami nin: Ñucaca causacunimi, chai llaquinayaj llajtapi causacujcunataca espadahuanmi huañuchichisha, urcucunapi causacujcunataca p'iña animalcunamanmi carasha, jatun patacunayuj pueblocunapi, jatun jutcucunapi causajcunataca jatun ungüihuanmi huañuchisha.

28Chashna rurashpami, chai llajtataca llaquinayaj shitashcata saquisha. Jatun tucushpa mandana Israel llajtaca chingaringami. Israel llajtapi tiyaj urcucunapish shitashcami saquiringa, pipish chai urcucunataca mana puringachu.

29Chai tucui laya millananacunata rurashcamanta, chai llajtata llaquinayaj shitashcata saquijta ricushpami, ñucataca Mandaj Diostaj cashcataca yachangacuna ninmi ningui.

30Huañujlla aichayuj runalla, cambaj llajtapi causajcunaca pata c'uchucunapi, huasi pungucunapi shayarishpami, can rimashcataca chanzata rurashpa asincuna. Paicunapura caishuj chaishujmi: Jacuchij Mandaj Dios imallata huillachishcata uyashunchij ninacucuncuna.

31Can rimashcata uyana cashcallamantami, ñuca agllashcacuna cashca shina uyanaman shamuj tucungacuna. Paicunaca can imalla rimashcata uyashpapish, chaitaca mana pajtachincunachu. Ashtahuanpish mishquijlla shimicunahuan rimashpapish, charina yuyaillami purincuna.

32Riqui, canca paicunapajca c'uyaimanta cantaj runa shinamari cangui. Cantaca sumaj cungata charishcamanta alli cantashcata uyanachij shina, can imalla nishcata uyashpapish, chaitaca mana pajtachingacunachu

33Chashna cashcamanta tucui chaicunaca pajtangatajmi, tucui chaicuna pajtajpimi, paicunapurapi Dios ima nishcata huillaj tiyashcataca yachangacuna” nircami.