ECLESIASTÉS 3 - Quichua Chimborazo Bible

Tucui imapajpish Taita Diosllataj shuj punllata churashcamanta

1Cai pachapica, tucui imapish chashnataj tucuna chayamujpimi, imapish tucun. Imapajpish shuj punllami chayamun.

2Huacharinapajpish, huañunapajpish, tarpunapajpish, tarpushcata aisashpa shitangapajpish shuj punllami chayan.

3Huañuchingapajpish, jambingapajpish, imata shayachingapajpish, imata urmachingapajpish punllami chayan.

4Huacanapajpish, asingapajpish, llaquilla cangapajpish, bailangapajpish punllami chayan.

5Rumicunata shitangapajpish, cutin pallangapajpish, ugllaringapajpish, ch'icanyaringapajpish punllami chayan.

6Imata mashcangapajpish, imata chingachingapajpish, imata huaquichingapajpish, imata shitangapajpish punllami chayan.

7Churanata lliquingapajpish, sirangapajpish, upalla cangapajpish, rimanacungapajpish punllami chayan.

8C'uyanacungapajpish, p'iñanacungapajpish, jatun macanacuipajpish, alli tucungapajpish punllami chayan.

9Cai pachapi causaj runacunaca, shaicuita imatapish rurashcamantaca, imata mana japinchu.

10Diosca, cai pachapi causajcunataca tucui imalla ruranacunata cushpaca, cumurichingapaj chashna rurashcatami ricuni.

11Diosca, tucui imapajpish shuj punlla tiyachunmi churashca. Cai pachapi causajcunapaj yuyaipica, callarimantapacha huiñaita Diosca imalla ruracushcata yachana munaiyujtami rurashca.

12Ñucaca, cai pachapi causajcunapajca, paicuna imallata rurashcacunamantaca caipi cushicuna, allita rurana alli cashcatami ricuni.

13Dios cushcallamantami ñucanchij imata rurashcamantaca micunchij, ubyanchij, ñucanchij imallata rurashcata ricushpapish cushicunchijmi.

14Shinallataj caitapishmi ricurcani: Pai rurashcacunapica imata mana mirachina tiyanchu, imata anchuchinapish mana tiyanchu. Diosca paipaj ñaupajpi manchaihuan ñucanchij cumurichunmi, chashna tucuita alli rurashca.

15Tucui imapish ñaupaman tiyashcallatajmi tiyan. Q'uipatapish, cunan mana tiyashca mushujca mana tiyangachu. Taita Diosca, ñaupaman tiyashcallatatajmi tigrachishpa mushujyachicun.

Allipaj randica millaitami rurancuna nishcamanta

16Inti achijyachicun cai pachatapishmi ricurcani. Pipaj allita ricunapaj randica, Diosta mana manchancunachu. Cashcata ruranapaj randica, millaicunami tucuncuna.

17Chaimantami ñuca shungupica cashna yuyarcani: “Ima munashcata rurangapajpish shuj punlla tiyanmi. Chaicunamantaca cashcata rurajcunatapish, paita mana manchajcunatapish Diosmi ricunga” yuyarcanimi.

18Cashnatapishmi yuyarcani: “Paicunallataj chashna cashcamantachu, Diosca cai pachapi causajcunataca animalcuna shinallataj cashcata paicunallamantaj ricuchicun. Gentecuna imami tucun, animalcunapish chashnallatajmi tucun”.

19Gentecunapish, animalcunapish chai shinallatajmi tucurincuna. Causaipaj cushca samaipish, tucuipaj chai samaillatajmi. Ima shina causashcapish yangallami. Chashna cashcamantaca gentecunaca, animalcunataca imamanta mana yalli canchu.

20Tucuillataj allpamanta rurashcami. Tucuicunallatajmi chaillamantaj tigran. Animalcuna cashpa, gentecuna cashpapish allpallatajmi tucun.

21Gentecunapaj almaca, jahua pachaman rij cashcatapish ¿pitaj alli huillai tucungari? Animalcunapaj almaca, allpa ucuman rij cashcatapish, pi mana chashnataj cashcata huillai tucunchu.

22Cai pachapi causajcunamanca, huañushca q'uipa ima tucuna cashcataca pi mana huillai tucunchu. Chashna cashcamantaca, quiquin trabajomanta alli cushicushpa causanami alli. Ñucanchijpajca caipica, chailla tiyashcatami ricuni.