NÚMEROS 11 - Quichua Chimborazo Bible

Mandaj Diosca codornizcunata cachashcami

1Chaipimi israelcunaca Mandaj Dios uyajta paita juchachishpa rimajpi, Mandaj Dios chaita uyashpa nina sindirij shina yallitaj p'iñarirca. Chaimi Mandaj Diosca nina sindirishpa israelcunapaj carpa huasicuna shuj ladota rupachishpa tucuchirca.

2Israelcunaca Moisestami caparirca. Moisesca Mandaj Diostami mañarca. Chaipimi ninaca huañurca.

3Mandaj Diospaj nina paicunapaj carpa huasicunata rupachishcamantami chai pambataca Tabera shutita shutichircacuna.

4Israelcunahuanca mana israelcunapishmi chagru carca. Paicunaca micunallatami yuyarcacuna. Chaimantami israelcunapish micunallata yuyashpa cashna nishpa huacarcacuna: “Caipica ¿pitaj aichata micuchun cungari?

5Egiptopica chalhuatapish japishpa micujllami carcanchij. Pepinocunatapish, meloncunatapish, puerros nishcacunatapish, cebollacunatapish, ajostapish micujllamari carcanchij.

6¡Cunanca ñucanchijca yaricaihuanmari huañucunchij. Caipica ima mana tiyanchu. Maná shuti granollatami ricunchij!” nircacuna.

7Maná shuti granoca culantro muyu shinami carca. Colorca bedeliotajllami carca.

8Israelcunaca chai granota japinaman caita chaita llujshishpa japishpaca, molinocunapimi cutaj carca. Mana cashpaca rumicunapimi tacashpa ñutujcuna carca. Chaitaca mangapimi yanujcuna carca. Mana cashpaca tortacunata rurashpami cusashpa micujcuna carca. Chaica mushuj aceite sabortami charirca.

9Chai maná shuti granoca israelcuna tiyacun pambata tuta garhuajpimi urmaj carca.

10Israelcunaca paicunapaj carpa huasi pungucunapi, cada quiquin paicunapaj familiacunahuan huacacujtami Moisesca uyarca. Mandaj Diospish nina sindirij shinami yallitaj p'iñarirca. Moisespipish mana alli ricurijpimi,

11Mandaj Diostaca cashna nirca:

–Cambajta rurajtaca ¿ima nishpataj llaquichihuanguiyari? Cambaj ñahuipica ¿imapi mana alli ricurijpitaj israelcunahuan llaquita apachun churahuanguiyari?

12¿Cai tucui israelcunataca ñucachari chichushcaniyari? Israelcunataca paicunapaj ñaupa yayacunaman cusha nishca allpaman chuchucuj huahuata marcashpa apaj shina apachun ninguimi. ¿Ñucata quiquin chashna nichunca paicunataca ñucachari huacharcaniyari?

13Tucui israelcunaman aichata carangapajca ñucaca ¿maimantataj japishari? Paicunaca huacaihuan ñucapajman shamushpami: “Ñucanchijman aichata carai” nincuna.

14Cai tucuicunataca ñucallaca mana pushai tucunichu. Caica ñucapajca yallitaj sinchi cargamari.

15Quiquin ñucata chashna ruracunalla cashpaca, ñucamanca huañuita cuhuailla. Quiquinpaj ñahuipi ñuca alli ricurishca cajpi, cai laya llaquita ñuca ama ricuchunmi chashna rurana cangui– nircami.

16Chaimi Mandaj Diosca, Moisestaca:

–Israelcunata cunaj yuyajcunapuramanta canchis chungata tandachi. Paicunataca alli cunajcunata, alli pushajcunata canmi yachangui, chaicunata tandachi. Paicunataca Dioshuan tupanacuna carpa huasi punguman pushamushpa chaipi candij shuyanguichij.

17Chaipi uriyamushpa ñuca canhuan rimashpami, canpi tiyaj Espirituta japishpa paicunapi ñuca churasha. Israelcuna llaquichishca cargata canhuan apachunmi chashna rurasha. Chaipica ña mana canlla apanguichu.

18Israelcunataca cashna ningui: Cayapajca tucuicuna chuyayaichij. Aichata micunguichijmi. Cancunaca Mandaj Dios uyajtami cashna nishpa huacashcanguichij. ¿Pitaj ñucanchijmanca aichata carangari? Egiptopirajmari alli carca nishcanguichijmi. Mandaj Diosmi cancunamanca aichata cunga. Chaitami micunguichij.

19Cancunaca shuj punllallata, ishqui punllallata, pichca punllallata, mana cashpaca chunga punllallata, ishqui chunga punllallataca mana micugringuichijchu.

20Ashtahuanpish shuj quilla jundacama, cancunapaj singacunaman llujshingacama, mana micunachishpa millanachingacamami micugringuichij. Cancunapaj chaupipi caj Mandaj Diosta yanganchishpa paipaj ñaupajpi huacashpa: Egiptomantaca imapajchari caimanca llujshimurcanchij nishcamantami chashna micugringuichij ningui– nircami.

21Chaimi Moisesca:

–Israelcunaca chaquillahuan purimucujcunallamari, 600.000 runacuna. Ñucaca chaicunapaj chaupipimari cani. ¿Quiquinca tucui chaicunamanchu aichata carasha ningui? Quilla jundacamami micungacuna ninguipishmari.

22Paicunaman carangapaj ovejacunata, huagracunata huañuchijpipish chai tucuicunapajca ¿maitataj pajtangari? Mana cashpaca, mama cuchapi tiyaj chalhuacunata tucui apamushpa carajpipish, ¿maitataj pajtangari?– nirca.

23Mandaj Diosca Moisestaca:

–Mandaj Diospaj maquitaca pi mana p'itishcachu. Ñuca nishca chashnataj pajtajta mana pajtajtaca cunanmi ricungui– nircami.

Canchis chunga yuyajcunapish Diosmanta huillaj tucushcami

24Moisés llujshishpaca, Mandaj Dios imallata nishcatami israelcunaman huillarca. Chai q'uipaca israelcunata cunaj yuyajcunapuramanta canchis chungacunata tandachishpami, Diospaj carpa huasi muyundijpi shayarircacuna.

25Chaipimi Mandaj Diosca, p'uyupi uriyamushpa Moiseshuan rimarca. Mandaj Diosca Moisespi caj Espirituta japishpami, canchis chunga cunaj yuyajcunapi churarca. Chai Espirituta paicunapaj jahuapi churajpica, Dios huillachishcatami huillarcacuna. Cai shina ruranataca cutinca mana rurarcachu.

26Eldad shuti, Medad shuti ishqui runacunaca paicunapaj carpa huasicunallapitajmi saquirishca carca. Paicunapaj jahuapipish Diospaj Espirituca tiyarircami. Paicunapish canchis chungacunata agllashcapurami carca. Paicunaca Diospaj carpa huasiman mana shamushca cashpapish, carpa huasicunapimi Dios huillachishcata huillacurcacuna.

27Chaimi shuj mosoca Moisespajman callpashpa rishpaca:

–Eldad shuti, Medad shuti runacunaca carpa huasicunapimari Dios huillachishcata huillacuncuna– nirca.

28Shina nijpimi Moisesta ayudaj mosocunapuramanta Nunpaj churi Josueca:

–Ñuca amito Moisés, chashna rimacujcunataca jarcapai– nirca.

29Chaimi Moisesca:

–¿Canca Dios huillachishcata huillajca ñucalla cachun nishpachu huañuricungui? Tucui israelcuna Mandaj Dios huillachishcata huillaj cashpapish allichari canman. Mandaj Diosca tucui paicunapaj jahuapipish paipaj Espirituta churashpachari alli canman– nircami.

30Chai q'uipaca Moisespish, israelcunapaj cunaj yuyajcunapish paicunapaj carpa huasicunaman tigrarcallami.

31Mandaj Dios cachashca huairami, mama cuchamanta codornizcunata apamushpa israelcunapaj carpa huasicuna maipi canman apamushpa chaipi saquirca. Carpa huasicuna muyundijtaca shuj punlla puri carucamami urmarca. Altomanpish shuj metro shinacamami montonarirca.

32Chaimi israelcuna llujshishpaca, tucui punlla, tucui tuta, chai cayandij punllapish tucui punlla codornizcunata tandarcacuna. Mana achcata japin nishcacunami chunga montonta japijcuna carca. Chaicunataca carpa huasicuna muyundijpimi chaquichircacuna.

33Israelcuna chai aichata shimipi churashpa manaraj cashtujpimi, Mandaj Diosca nina sindirij shina paicunahuan yallitaj p'iñarishpa, jatun llaquita cachashpa achcacunata huañuchirca.

34Micushpapish mana amijcunata chaipi pambashcamantami, chai pambataca Kibrot-hataava shutita shutichirca.

35Kibrot-hataavamantaca israelcunaca Hazerot pueblomanmi rircacuna. Hazerotpimi saquirircacuna.