1Chaimantami Temán llajtamanta Elifazca cashna nishpa rimarca:
2Canca ñucanchij rimajpica, llaquiringuimi.
Shina cajpipish, pitaj mana imata rimangari.
3Riqui, canca achcacunata yachachijmari
carcangui,
irquicunatapish sinchiyachijmari carcangui.
4Pandarijcunatapish cunashpa
allichijmari carcangui.
Cunguri mucucuna quihuiricujpipish,
derechajmari carcangui.
5Ashtahuanpish cunan canta jatun
llaqui japijpica, yallitajmari llaquiringui.
Chai jatun llaquicuna canta japijpica,
yallitajmari musparingui.
6¿Manachu canca Taita Diosta manchanapi
shunguta churaj carcangui?
¿Manachu ima pandata mana ruranapi
shunguta churaj carcangui?
7Cunanca alli yuyariyari, ima mana
allita mana rurajcunaca, ¿maijan
huañushcachu imatagari?
Alli runacunaca maijan
¿chingarincunachu imatagari?
8Ashtahuanpish millaita ruranata yapushpa,
millaita ruranallatataj tarpushpaca,
chaillatatajmi tandajta ricushcani.
9Diospaj samaillahuanmi huañuncuna, pai
p'iñarishpa p'ucujllapimi chingarincuna.
10Huacaricuj leonpish, p'iña leonpish,
huahua leoncunapish quirucunamari
p'aquirishcacuna.
11Yuyaj leonca micuna aichata
mana charishcamantami huañun.
Micuna illajllapitajmi mama leonpaj
churicunaca, caita chaita rincuna.
12Chaitaca ñucapish mana yacharcanichu.
Shina cajpipish, ñuca rinrinllapimi
huillahuarca.
13Tuta muscui shina ricurishpami,
tucui runacuna dormicujpi,
14ñucataca manchachishpa chujchuchirca.
Chaimantami ñuca tullucunapish
tucui cuyurirca.
15Ñuca ñaupajta huaira p'ucuj shinalla
aya pasajpimi, ñuca aicha millmacunapish
shayarirca.
16Ñuca ricucunpimi ñuca ñaupajpi
shuj aya shayarirca, ashtahuanpish
paipaj ñahuitaca manamari rijsircanichu.
Pai chaipi shayacushpaca, cashna nijtami
upajlla uyarcani:
17¿Runaca Diostapish yalli cashcata
rurajchu canga?
¿Runaca paita rurajtapish yalli ima
mapa illajchu canga? nircami.
18Riqui, paita servijcunapipish Diosca,
paipaj shungutaca mana churanchu.
Paipaj angelcunatapish pandarijlla
cashcata yachanmi.
19Allpa jahuallapi lodohuan shayachishca
huasicunapi causajcunapicarin
¿maitataj shunguta churangari?
Paicunaca allpalla cashcamantaca,
polilla c'uru micushpa tucuchinallami.
20Paicunaca tutamanta alli cashpapish,
chishipajca huañushpa, huiñaipaj
chingarinllami.
Ima tucushcatapish pi mana yachanchu.
21Paicuna chingarijpica, paicuna
sumaj cashcapish chingarinllami.
Ima alli yachaitapish mana
yachashpami huañuncuna.
Who We AreWhat We EelieveWhat We Do
2025 by iamachristian.org,Inc All rights reserved.