JEREMÍAS 44 - Quichua Chimborazo Bible

Jeremiasca Egiptopi caj Judá runacunaman huillashcamanta

1Judá runacuna Egipto llajtaman rishpaca Migdol shuti, Tafnes shuti, Menfis shuti pueblocunapipish, Patros llajtapipishmi causacurcacuna. Tucui paicunaman Dios imallata huillachun nishcatami Jeremiasca paicunaman cashna huillarca:

2“Tucuita Mandaj, israelcunapaj Diosca cashnami nin: Jerusalenpi causajcunatapish, Judá llajtallapitaj tucui caishuj pueblocunapi causajcunatapish, ñuca ima shinalla llaquichijtaca cancunallataj ricurcanguichijmi. Cunanca tucui chai pueblocuna urmachishca, pi mana causaipaj shitashca saquirishcataca ricurcanguichijllatajmi.

3Chai pueblocunapi causajcunamari paicunapish, cancunapish, cancunapaj ñaupa yayacunapish mana rijsishca, shujtajcunapaj dioscunaman inciensota cushpa adorarcacuna. Chashna millaita rurashpami, ñucataca yallitaj p'iñachircacuna. Chaimantami chai jatun llaquicunata cacharcani.

4Ñucaca ñaupa huatacunamantapachami, ñuca ima nishcata huillaj, ñucata servijcunataca huashan huashan cacharcani. Chashna cachashpaca: Cancuna cashna millaita rurachunca mana ricunanchu. Cashna millanacunataca ama ruraichijchu nishpami, huillachij carcani.

5Shina cajpipish, cancunaca manataj cazurcanguichijchu. Ñuca rimashcata uyashpa, cancuna millaita ruracushcata saquishpa cutirinapaj randica, ashtahuanmi chai shujtajcunapaj dioscunaman inciensota cushpa rupachircanguichij.

6Chaimantami ñucaca jatunta p'iñarircani. Chashna yallitaj p'iñarishpami, tucui Judá llajta pueblocunapipish, Jerusalén callecunapipish ninata japichircani. Cunan punllacamami chai pueblocunaca tucuita rupachishpa tucuchishca, shitashca siricun ninmi.

7Tucuita Mandaj, israelcunapaj Diosca cancunataca cashnami nin: ¿Imamantataj cancunapaj llaquipajllataj cai jatun mana allita rurarcanguichigari? Caita rurashcamantaca cancunaca Judá runacunapuramanta shujllapish mana saquirishpamari c'aripish, huarmipish, huambracunapish, chuchucuj huahuacunapish huañushpa chingaringuichij.

8Cancunaca cai Egipto llajtapi causanaman shamushpapish, cai llajta dioscunamanmari inciensota cushpa rupachinguichij. ¿Imamantataj chashna rurashpa ashtahuan p'iñachinguichigari? Chaimantamari cancunaca tucui shujtaj llajtacunapi causajcuna p'iñashpa mana ricusha nishca tucugringuichij. Yangamantamari chashna llaquipi yaicunguichij.

9Cancunapaj ñaupa yayacunapish, Judá llajtata jatun mandajcunapish, paicunapaj huarmicunapish, cancunapish, cancunapaj huarmicunapish tucui Judá llajtapi, Jerusalén pueblo callecunapica, yallitaj millaitami rurashpa causarcanguichij. Chai tucui millaita rurashpa causashcataca ¿ñachari cungaringuichigari?

10Cancuna chashna causashcataca cunancama manamari llaquiringuichijchu, mana manchanguichijllapishchu. Cancunapaj yayacunapish, cancunapish pajtachishpa causachun ñuca cushca mandashcacunataca, shujllatapish mana pajtachishcanguichijchu ninmi.

11Tucuita Mandaj, israelcunapaj Diosca cashnapishmi nin: Chaimantami ñucaca can Judá runacunataca, tucuicunata tucuchingapaj chaparacuni. Cancunataca jatuntami llaquichigrini.

12Ashacunalla saquirishca tucui Judá runacunami cai Egipto llajtaman shamunata munarcacuna. Chashna mana cazushpa caipi causanaman shamushcacunaca tucuicunami cai llajtapica espadapipish, jatun yaricaihuanpish huañushpa tucuringacuna. Jatuncunamanta uchilla huahuacunacamami espadapipish, jatun yaricaihuanpish huañushpa tucuringacuna. Saquirijcunaca tucui ricujcunapajmi millananapish, mancharinapish, shujtajcunatapish paicuna shina tucushca alli canman ninapish, chanzata rurashpa asinapish cangacuna.

13Cai Egipto llajtapi causanaman shamujcunataca, Jerusalenpi causajcunata shinallataj espadahuan, yaricaihuan, ungüicunahuanpishmi jatunta llaquichisha.

14Cai ashacunalla saquirishpa, Egipto llajtaman shamushca Judá runacunamantaca, pi mana causaj saquiringachu. Judá llajtamanca tigrashpa causagrina munaihuan huañucushpapish, ña mana tigrangacunachu. Maijancuna miticushpa llujshishpallami, Judá llajtamanca tigrangacuna ninmi” nircami.

15Chaita huillajpica c'ariyarcacunami. Paicunapaj huarmicuna shujtaj dioscunaman inciensota cushpa rupachij cashcata yachaj runacunapish, chaipi caj tucui huarmicunapish, Egipto llajtallapitaj caj Patros llajtapi causaj tucui Judá runacunapishmi chaipi tandalla carcacuna. Tucui chaicunami Jeremiastaca cashna nircacuna:

16–Mandaj Diosmi huillanaman cachan nishpa, can huillashcataca manataj uyashunchu.

17Ashtahuanpish ñucanchij shimihuan imatami rimanchij, chaitatajmi rurashpa causashun. Ñucanchij ñaupa yayacunapish, ñucanchijta jatun mandajcunapish, ñucanchijta mandajcunapish Judá llajta pueblocunapi, Jerusalén plaza pambacunapica, jahua pachata jatun mandaj huarmi dioshuanmi inciensota cushpa rupachij carcanchij. Vinotapish cushpami, tallij carcanchij. Chai shinallatajmi rurashpa catishun. Chashna rurashpami ñucanchijca achca granocunayuj causarcanchij. Ima llaquita mana apashpa, cushicushpami causarcanchij.

18Ashtahuanpish jahua pachata mandaj huarmi diosman inciensota cushpa rupachinatapish, vinota cushpa tallinatapish saquishca punllamantamari tucui imapish tucuri callarirca. Shinallataj espadapish, jatun yaricaipish huañuchijpimari, cai ashacunalla saquirinchij– nircacunami.

19Huarmicunacarin cashnami nircacuna:

–Ñucanchijca jahua pachata mandaj huarmi diosmanca ñucanchij cusacunaman huillashpa, paicunallataj ruraichijlla nijpica, inciensotapish cushpa rupachinchij, vinotapish cushpa tallinchij, tortillacunatapish rurashpa paiman cunchij. Imata mana ñucanchij cusacunapaj pacalla ruracunchijchu– nircacunami.

20Chashna nishpa c'ariyaj tucui c'aricunata, huarmicunata, tucui chaipi cajcunatapishmi Jeremiasca cashna nirca:

21–Cancunapaj ñaupa yayacunapish, cancunata jatun mandajcunapish, cancunata mandajcunapish, tucui Judá runacunallatajpish Judá llajta pueblocunapi, Jerusalén pueblo callecunapi shujtajcunapaj dioscunaman inciensota cushpa rupachicujtaca ¿Mandaj Diosca manami ricushca yuyanguichijchu? ¿Mana cashpaca ricushca cashpapish, cungarishcami yuyanguichijchu?

22Ashtahuanpish Mandaj Diosca cancuna yallitaj millaita rurajpimi, cancunata ña manataj chari tucurca. Chai millananacunata rurashpa causajpimari, ña manataj ricusha nirca. Chaimantami cancunapaj llajtataca tucui ima tiyashcata tucuchishpa, jatun mancharinata rurarca. Chaimantami chai llajtaca, cunan punllacunacama Dios mana alli nishpa shitashca, shuj runallapish illaj siricun.

23Cancunami shujtajcunapaj dioscunaman inciensota cushpa, Mandaj Diostaca yallitaj p'iñachircanguichij. Mandaj Dios mandashcataca manataj cazurcanguichijchu. Ima shinalla causanata yachachishcacunatapish manataj pajtachircanguichijchu. Chaimantami cancunataca cai tucui llaquicuna japishca. Cunan punllacamallatajmi chashna llaquipi causacunguichij– nircami.

24Jeremiasca tucui chaipi cajcunatapish, tucui huarmicunatapishmi cashnapish nirca:

–Cai Egipto llajtapi caj tucui Judá runacuna, Mandaj Dios ima nishcata uyaichij.

25Tucuita Mandaj, israelcunapaj Diosca cashnami nin: Cancunapish, cancunapaj huarmicunapish cancunapaj shimihuan rimashcataca cancunapaj maquihuanmi ruranguichij. Cancunaca: Jahua pachata mandaj huarmi diosmanmi inciensota cushpa rupachishun, vinotapish cushpa tallishun. Chaitaca pajtachishuntajmi nishpaca, chaitatajmi ruranguichij. Paiman imata cusha nishcataca cunguichijtajmi ninmi.

26Cai Egipto llajtapi causacuj tucui Judá runacuna, uyaichij. Mandaj Diosca cashnapishmi nin: Chaimanta cunantajca Mandaj Diostajmi cashna nini: Cai tucui Egipto llajtapi caj Judá runacunataca: Causaj Mandaj Jatun Diospish ricucunmi nishpa ñucata mañachunca, ña manataj saquishachu.

27Ñuca paicunapaj ima allita ruranapaj randica, jatun llaquita rurangapajmi paicunataca chaparacuni. Cai Egipto llajtapi caj Judá runacunaca tucuicunami espadahuanpish, yaricaihuanpish chingachishca cangacuna.

28Espadapi huañunamanta quishpirijcunallami cai Egipto llajtamantaca, ashacunalla Judá llajtaman tigrangacuna. Chashnami cai Egipto llajtaman shamushca tucui runacunaca ñuca rimashca shimicuna, mana cashpaca paicuna rimashca shimicuna pajtashcata quiquin ñahuihuantaj ricungacuna.

29Cancunata llaquichishami nishcataca pajtachishatajmi. Ñucaca cai llajtapitajmi cancunataca llaquichigrini. Chaipimi ñucataca imata nishpapish, chaitataj pajtachij cashcata ricunguichij ninmi Mandaj Diosca.

30Mandaj Diosca cashnapishmi nin: Judá llajtata jatun mandaj Sedequiastaca, ñucatajmi paita p'iñashpa huañuchisha nicuj Babilonia llajtata jatun mandaj Nabucodonosorpaj maquipi churarcani. Cai Egipto llajtata jatun mandaj Hofra shuti faraontapish chashnallatajmi paita p'iñashpa huañuchisha nicuj Nabucodonosorpaj maquipi churasha ninmi– nircami.