DEUTERONOMIO 9 - Quichua Chimborazo Bible

Canaanpi caj llajtacunata Taita Dios chingachinami

1Israelcuna uyaichij, cancunaca cunanmi cancunata yalli achca, sinchi sinchi llajtacunata, jahuacama pircashca jatun pueblocunata cancunapaj cachun japingapaj Jordán yacuta ch'imbagringuichij.

2Chai pueblocunapi causajcunaca yallitaj jatun runacunami. Paicunaca anaceocunami. Paicunatami: Anacpaj huahua huahuacunahuanca ¿pitaj shayari tucungari? nishcata uyashpa chashna cashcata yachanguichij.

3Chashna cajpipish Mandaj Dios cancunapaj Taita Dios rupachij nina shina cancunata ñaupashpa ricushcata cunanca alli entendichij. Chaicunataca paimi chingachishpa cancunapaj ñaupajpi cumurichinga. Chaimi cancunaca Mandaj Dios nishca shinallataj paicunataca utca anchuchishpa chingachinguichij.

4Mandaj Dios cancunapaj Taita Dios chai llajtapi causajcunata cancunapaj ñaupajmanta anchuchijpica ñataj cancunapaj shungupica: Ñucanchijtaca cashcata rurajcuna cajpimi, Mandaj Diosca cai llajtata japichun pushamushca niringuichijman. Mandaj Diosca chai llajtapi causajcunaca millaita ruraj cajpimi cancunapaj ñaupajmantaca llujshichinga.

5Cancuna cashcata ruraj cashcamanta, ima pandata mana yuyajcuna cashcamantaca chaicunapaj llajtataca cancunapaj cachun japinamanca mana yaicunguichijchu. Ashtahuanpish Mandaj Diosca chai llajtapi causajcunataca Diosta mana rijsij millaicuna cajpimi cancunapaj ñaupajmanta llujshichinga. Mandaj Diosca cancunapaj ñaupa yaya Abrahamman, Isaacman, Jacobman chashna rurashami nishcata pajtachingapajmi chashna ruranga.

6Mandaj Diosca chai sumaj llajtataca mana cancuna cashcata rurajcuna cashcamantachu, cancunapaj cachun cun. Ashtahuanpish cancunaca mana cazujcunamari canguichij. Chaitaca allimi yachana canguichij.

Israelcuna Horeb urcupi Taita Diosta c'ariyashcata yuyachishcami(Ex 31.18–32.35)

7Shitashca pambapi Mandaj Diosta c'ariyashpa ima tucushcataca cancunaca manataj cungarinachu canguichij. Cancunaca Egiptomanta llujshimui pachamanta cai llajtaman chayamungacamami Mandaj Diostaca c'ariyajcuna canguichij.

8Cancunaca ña Horeb urcupi cashpa, Mandaj Diostaca yallitaj c'ariyashpa p'iñachijpimi, Mandaj Diosca yallitaj p'iñarishpa, ña cancunataca tucuchina tucurca.

9Cancunaca Mandaj Dios cancunahuan ari ninacushcata quillcashca tablajlla ishqui rumicunata chasquingapaj chai urcuman ñuca huichiyajpimari chashna tucushca carcanguichij. Chaipica micunata mana micushpa, yacuta mana ubyashpami, ñucaca chuscu chunga punllata chuscu chunga tutata carcani.

10Mandaj Diosca paipaj dedohuan quillcashca ishqui tablajlla rumicunatami ñucamanca curca. Chai rumicunapica urcupi Mandaj Dios nina rupacuj chaupimanta ñucanchij tandanacushca punllapi rimashca shimicunata quillcashcami carca.

11Mandaj Diosca ari ninacushcata quillcashca tablajlla ishqui rumicunataca ña chuscu chunga punlla, chuscu chunga tuta tucujpimi ñucamanca curca.

12Chaipimi: Jatari, caimanta uriyashpa utca ri. Egiptomanta can llujshichimushca gentecunaca millaitami ruracuncuna. Paicunaca ñuca mandashca ñanmanta utca anchurishpamari curita yacuyachishpa imamanpish rijchaj diosta rurashcacuna nirca.

13Mandaj Diosca cashnapishmi nirca: Paicunataca ch'ahuanyashca mana cazujcuna cashcatami ricuni.

14Shuyai, paicunataca cunanmi tucuita tucuchishpa, paicunapaj shutitaca cai pachamantaca tucuita anchuchigrini. Ashtahuanpish canmantami paicunatapish yalli c'ari c'ari llajtata achcacunata mirachisha nircami.

15Chai nina rupacuj urcumantaca, ari ninacushcata quillcashca tablajlla ishqui rumicunata ñuca maquipi apashcami uriyamurcani.

16Ashtahuanpish cancunaca Mandaj Dios cancunapaj Taita Diosta p'iñachishpa juchallishcatami ricurcani. Cancunaca curita yacuyachishpami bizi diosta rurashpa Mandaj Dios cancunaman ricuchishca ñanmanta utca anchurishca carcanguichij.

17Ñuca apamushca tablajlla ishqui rumicunataca maquimantami cancunapaj ñaupajpi cacharishpa shitarcani.

18Chai q'uipaca ñaupaman rurashca shinallatajmi chuscu chunga punllata, chuscu chunga tutata micunata mana micushpa yacuta mana ubyashpa Mandaj Diospaj ñaupajpi cungurishpa mañarcani. Mandaj Diospaj ñaupajpi millaita rurashpa, paita p'iñachishpa cancuna juchallishcamantami chashna mañarcani.

19Mandaj Diosca nina sindirij shina yallitaj p'iñarishpa tucuitaj chingachigrijpimi achcata mancharcani. Chashna cajpipish Mandaj Diosca, ñuca mañashcataca shuj cutinhuanmi uyarca.

20Mandaj Diosca Aaronhuanpish yallitaj p'iñarishpami, chingachina tucuncama p'iñarirca. Shina cajpipish, paimantapishmi chai punllacunapica mañarcani.

21Chai q'uipaca ñucaca cancuna rurashpa juchallishca bizi diosta japishpa rupachishpa tucui ñutushpami ñutu allpa tucungacama cutarcani. Chai ñutu allpataca urcumanta uriyacuj jatun yacupimi shitarcani.

22Cancunaca Tabera, Masah, Kibrot-hataava shuti pueblocunapi cashpapish Mandaj Diostaca yallitajmi p'iñachircanguichij.

23Mandaj Diosca cancunataca Cades-barnea pueblopi cajpimi: Ñuca cancunaman cusha nishca llajtata japigrichij nishpa cacharca. Ashtahuanpish Mandaj Dios cancunapaj Taita Dios mandashcataca c'ariyashpami paitaca mana crishpa pai rimashcataca mana cazurcanguichij.

24Cancunaca ñuca rijsishca punllamanta pachami Mandaj Diosta c'ariyajcuna cashcata ricuni.

25Ñucaca Mandaj Diospaj ñaupajpimi cungurircani. Mandaj Dios cancunata chingachisha nijpimi chuscu chunga punllata, chuscu chunga tutata chashna cungurircani.

26Mandaj Diostaca cashnami mañarcani: Mandaj Jatun Dioslla, cambaj cajcunataca amataj chingachihuaichu. Egiptomantaca cambaj cashcamantamari can jatun cashcahuan, cambaj tucuita rurai tucuj maquihuan cacharichishpa llujshichimurcangui.

27Cambajta ruraj Abrahamta, Isaacta, Jacobtaca amataj cungaripaichu. Cai runacuna rumi shungu cashcata, Diosta mana risijcuna tucushcata, paicuna juchallishcataca amataj yuyaipi charihuaichu.

28Ñucanchijta can llujshichimushca llajtapi causajcunaca cashnami ningacuna: Mandaj Diosca paicunaman cushatajmi nishca llajtamanca manapish yaicuchi tucunchu, ashtahuanpish paicunata p'iñashcamantami caimanta llujshichishpaca, shitashca pambapi huañuchigrishca ningacunami.

29Paicunaca cambajmari. Cambaj cashcamantami can tucuita rurai tucuj cashcahuan, cambaj rigrata chutashpa llujshichimurcangui nishpami mañarcani.