GÁLATAS 2 - Quichua Chimborazo Bible

1Chunga chuscu huatacuna q'uipami, Bernabehuan Jerusalenman cutin huichiyarcani. Titotapish ñucahuanmi pusharcani.

2Chaimanca, Dios ricuchijpimi huichiyarcani. Ñuca huillashca ama yanga cachunmi, mana judiocunaman huillacushcataca, alli nishcacunallaman huillarcani.

3Chaimi ñucahuan caj Titotaca griego cajpipish, circuncisionta rurachichuntajca, mana ni tucurcacuna.

4Ashtahuanpish crijmi canchij nij tucujcunami, Mandashcapi huatashca cachun tigrachingapaj Cristo Jesús cacharichishcacuna ima shina cajta ricunga raiculla, ñucanchijpurapi pacalla yaicushca carcacuna.

5Mana llulla alli huillaipi caticushcata cancuna ama pandarichunmi, paicuna yachachichunca ashallatapish manataj saquircanchij.

6Ashtahuanpish ñaupa imamanta alli nishcacuna cashca cashpapish (ñucapajca ima mana canchu. Diosca pita ñahuita ricushpalla mana alli ninchu). Alli nishcacuna cashpapish ñucamanca, ima mushujta mana huillarcacunachu.

7Chaipaj randica, circuncisionta rurashcacunaman alli huillaita huillachun Pedroman mingashca shinallataj, ñucatapish circuncisionta mana rurashcacunaman huillachun mingashca cashcatami yuyarcacuna.

8(Circuncisionta rurashcacunaman apóstol Pedrota huillachijllatajmi, ñucatapish mana judiocunaman huillachirca).

9Jacobo, Cefas, Juanpish pilarcuna nishca cashcamantami, mana c'uyaipajta c'uyaj canata ñucamanpish cushca cashcata yachashpaca ñucaman, Bernabemanpish chaillatataj rurajcuna cashcata ricuchingapaj alli maquita curcacuna. Paicunaca circuncisionta rurashcacunaman, ñucanchijca mana judiocunaman huillagrichunmi chashna ricuchircacuna.

10Huajchacunata yuyarichunllami ñucanchijtaca mañarcacuna. Chaitaca, chai yuyaillami pajtachij carcani.

Pabloca Antioquiapi Pedrota sinchita rimashcami

11Ashtahuanpish Antioquiaman Pedro shamujpica, llaqui tucunapaj ruracujta ricushpami, ñahui ñahui sinchita rimarcani.

12Jacobo cachashcacuna manaraj chayajpica, Pedroca mana judiocunahuanmi micuj cashca carca. Ashtahuanpish paicuna chayashca q'uipaca, circuncisionta rurashcacunata manchashcamantami asha asha anchurirca.

13Pai mana micucushca shina tucujpica, caishuj judiocunapish chashnallatajmi rurarcacuna. Paicuna chashna mishqui shimi jayaj shungu cajta ricushpaca, Bernabecamami chashna tucurca.

14Ashtahuanpish mana llulla alli huillai nishca shinataj mana catijta ricushpami, tucuicunapaj ñaupajpi Pedrotaca: “Canca judío cashca jahuachu, mana judiocuna shina causangui. ¿Ima nishpataj mana judiocunataca, judío tucuchun ningui?” nircanimi.

15Ñucanchijca (huacharimantami judiocuna canchij. Mana judiocunapuramanta juchayujcunaca mana canchijchu).

16Runaca Mandashcapi nishcata rurashcamantaca, mana justificashca cashcataca yachanchijmi. Ashtahuanpish Jesucristota crishcamantami justificashca tucun. Ñucanchijpish Cristota crishpa justificashca cangapajmi, Jesucristopi crircanchij. Mana, Mandashcapi nishcata rurashcamantachu, justificashca canchij. Mandashcapi nishcata rurashcamantaca, pi mana justificashca cangachu.

17Cristopi justificashca canata mashcashpaca, ñucanchijpish juchayujmari tucunchijman. ¿Chashna cajpica, Cristoca juchapajta rurajchu? ¡Manataj chashnachu!

18Imatapish ñutushca jahua, chaillatataj cutin shayachishpaca, Mandashcata p'aquijmi tucuni.

19Ñucaca, Mandashcapi ama cangapajmi, Diospaj causangapaj Mandashcapi nishcata ruranamantaca huañurcani.

20Ñucaca, Cristohuan shuj shinalla chacatashcami cani. Ña mana ñucachu causani, ashtahuanpish Cristomi ñucapica causan. Cunan aichahuan causacushpapish Diospaj Churita crishpami causani. Paimi ñucata c'uyashpa, paillataj curishpa ñucamanta huañurca.

21Mana c'uyaipajta Dios c'uyashcataca, mana huahuayanichu. Mandashcata rurashcamanta justificana cajpica, Cristoca yangami huañushca canman.