DANIEL 3 - Quichua Chimborazo Bible

Rupacuj hornomi

1Jatun mandaj Nabucodonosorca, curimantami imamanpish rijchajta rurachirca. Chaica altomanca ishqui chunga canchis metromi carca. Anchomanca ishqui metro canchis chunga centimetromi carca. Chaitaca, Babilonia llajtapi caj Dura shuti pambapimi shayachirca.

2Chai q'uipaca, jatun mandaj Nabucodonosorca satrapacunapish, q'uipa mandajcunapish, soldadocunata mandajcunapish, uyajcunapish, cullquita huaquichijcunapish, cunajcunapish, juezcunapish, llajtacunapi mandajcunapish tucuicuna tandanacuchunmi mandarca. Jatun mandaj Nabucodonosorca pai shayachishca imamanpish rijchajta caica diosmi ningapajmi tandanacuchun mandarca.

3Chaimi satrapacunapish, q'uipa mandajcunapish, soldadocunata mandajcunapish, uyajcunapish, cullquita huaquichijcunapish, cunajcunapish, juezcunapish, llajtacunapi mandajcunapish tucuicuna tandanacurca. Paicunaca jatun mandaj Nabucodonosor shayachishca imamanpish rijchajta caimi dios nishpa ricuchi tandanacuimanmi shamurcacuna. Chai ñaupajpimi paicunaca shayacurcacuna.

4Chaipi shayacujpimi, huillaj runaca sinchita caparishpa cashna nirca: “Caipi caj shujtaj shujtaj gentecuna, shujtaj shujtaj llajtacuna, ch'ican ch'ican rimaita rimajcuna cancunataca cashnami mandan.

5Bocinapi, flautapi, citarapi, arpapi, salteriopi, zampoñapi, tucui shujtaj tocanacunapipish tocashca uyarijpica, jatun mandaj Nabucodonosor shayachishca curimanta rurashca imamanpish rijchajpaj ñaupajpi cungurishpa adorachunmi mandan.

6Maijanpish cungurishpa mana adorajtaca, chai ratollatajmi nina lunyacuj hornopi shitashca canga” nircami.

7Shina nijpimi bocinapi, flautapi, citarapi, arpapi, salteriopi, zampoñapi, tucui shujtaj tocanacunapi tocashca uyarijpica, shujtaj shujtaj gentecunapish, shujtaj shujtaj llajtacunapish, ch'ican ch'ican rimaita rimajcunapish jatun mandaj Nabucodonosor shayachishca curimanta rurashca imamanpish rijchajpaj ñaupajpi cungurishpa adorarcacuna.

8Chai punllacunallatajmi, caldeocunapuramanta maijancunaca, judiocunata llaquichingapaj juchachishpa huillanaman shamurcacuna.

9Jatun mandaj Nabucodonosorhuan paicuna rimashpaca cashnami nirca:

–¡Jatun mandaj, cambaj causaica huiñaita cashca cachun!

10Jatun mandajlla, canca tucuicunatami bocinapi, flautapi, citarapi, arpapi, salteriopi, zampoñapi, tucui shujtaj tocanacunapipish tocashcata uyashpaca, curimanta rurashca imamanpish rijchajta cungurishpa adorachun nishpa mandashcangui.

11Maijanpish cungurishpa mana adorajtaca nina lunyacuj hornopi shitashcami canga nircanguimi.

12Cai Babilonia llajtata ñaupajman pushanata mandajcuna cachun can churashca Sadrac, Mesac, Abed-nego nishca Judá runacunaca can mandashcataca manamari cazuncunachu. Cambaj dioscunatapish manamari adorancunachu. Curimanta can rurashca imamanpish rijchajtapish mana adorancunachu– nircami.

13Chaita uyashpaca, Nabucodonosorca yallitaj jatunta p'iñarishpami Sadractapish, Mesactapish, Abed-negotapish paipajman pushamuchun cacharca. Paicunataca chashna nincami jatun mandajpajman pusharcacuna.

14Paicunataca Nabucodonosorca cashnami nirca:

–Sadrac, Mesac, Abed-nego cancunaca ñuca diostaca mana adoranchu nincunami. Curimanta rurashpa ñuca shayachishca imamanpish rijchajtapish mana adoranchu nincunami. ¿Chaica chashnatajchu imatagari?

15Cunanca bocinapi, flautapi, citarapi, arpapi, salteriopi, zampoñapi, tucui shujtaj tocanacunapipish tocashca uyarijpica, ¿ñuca shayachishca curimanta rurashca imamanpish rijchajta cungurishpa adoranallachu canguichij? Mana chaita adorajpica, chai ratollatajmi nina lunyacuj hornopi shitashca canguichij. Ñuca maquimantaca ima dios mana quishpichingachu– nircami.

16Shina nijpimi Sadracpish, Mesacpish, Abed-negopish jatun mandaj Nabucodonosortaca cashna nircacuna:

–Can chashna nishcataca ñucanchijllatajca imata mana cutichi tucunchijchu.

17Ñucanchij Taita Diosmi, paipajta rurajcunataca nina lunyacuj hornomantapish, jatun mandajpaj maquimantapish quishpichinga.

18Pai mana quishpichijpipish jatun mandajlla, caitaca ñami yachana cangui. Ñucanchijca cambaj dioscunapajtaca mana rurashunchu. Curimanta rurashpa can shayachishca imamanpish rijchajtapish mana adorashunchu– nircami.

19Shina nijpi Nabucodonosorca yallitaj p'iñarishpami, paipaj ñahuipish shujtajyarishpa, Sadracta, Mesacta, Abed-negota rupachina tucurca. Paicunata rupachingapajca hornotaca rupajyachij cashcamanta canchis cutihuan yalli rupajyachichunmi mandarca.

20Chaimantaca Sadracta, Mesacta, Abed-negota huatashpa nina lunyacuj hornopi shitachunca paipaj soldadocunapuramanta ashtahuan c'ari c'aricunatami mandarca.

21Chaimi quimsa runacunataca paicunapaj churanacunandijta, pargatecunandijta, turbantecunandijta tucui churarishcata huatashpa nina lunyacuj hornopi shitarca.

22Jatun mandajca hornota utca rupajyachichun nishpa mandajpimi, hornotaca yallitaj rupajyachishcacuna carca. Chaimi lunyacuj ninaca Sadracta, Mesacta, Abed-negota shitajcunataraj huañuchirca.

23Sadrac, Mesac, Abed-nego quimsa runacunaca huatashcallatajmi lunyacuj nina horno ucuman urmarcacuna.

24Chaimi jatun mandaj Nabucodonosorca, mancharishpa saltashpa jatarishpa, paihuan mandajcunataca cashna nirca:

–¿Manachu quimsa runacunallata huatashpa nina lunyacunpi shitarca?– nijpimi paicunaca:

–Ari jatun mandajlla, quimsallami carca– nircacuna.

25Shina nijpimi jatun mandajca:

–Ñucaca, chuscu runacuna nina chaupipi huatashcapish cacharirishca ima mana tucushpa puricujtamari ricuni. Chai chuscumanta shujca dioscunapaj churiman rijchajmari– nirca.

26Shina nishpaca Nabucodonosorca, lunyacuj nina horno punguman c'uchuyashpami:

–Jahua pacha Taita Diospajta ruraj Sadrac, Mesac, Abed-nego llujshishpa shamuichij– nirca.

Chaimi Sadrac, Mesac, Abed-negoca nina chaupimanta llujshircacuna.

27Chaimi satrapacunapish, llajtacunata mandajcunapish, soldadocunata mandajcunapish, jatun mandajman yuyaita cujcunapish paicunata ricungapaj tandanacurcacuna. Ricunaman c'uchuyashpaca, paicunapaj cuerpopica ninaca mana chayashcallapish cajta, shuj ajchallapish mana rupashca cajta, paicunapaj churanacunapish mana ch'urvarishcallapish cashcatami ricurcacuna. Paicunaca ninallamanpish mana ashnacurcacunachu.

28Nabucodonosorca cashnami nirca: “Sadracpaj, Mesacpaj, Abed-negopaj Taita Dios cantaca alli nishca cachun. Paimari paipaj angelta cachashpa paipi shunguta churaj paipajta rurajcunataca quishpichirca. Paicunaca jatun mandaj ñuca mandashcata mana cazushpami, manapish paicunapaj diosta adoranapaj randica huañungapaj paicunapaj quiquin causaita curijpi paicunataca chashna quishpichishca.

29Chashna cashcamanta cunanca cai mandashcatami churani. Maijan llajta cashpa, maijan rimaita rimajcuna cashpapish Sadrac, Mesac, Abed-negopaj Taita Diosta p'iñashpa c'amijtaca changacunata, rigracunata p'itishca cachun. Paicunapaj huasipish mapacunata shitana cashca cachun. Cai Dios shina quishpichijca, shujtaj diosca mana tiyanchu” nircami.

30Jatun mandajca Sadractapish, Mesactapish, Abed-negotapish jatun canapi churashpami, Babiloniapi mandaj cachun churarca.