1Chai punllacunapica, cambaj israelcunata cuidaj jatun mandaj Miguel shuti angelmi jataringa.
Chai punllacunapica jatun llaquimi tiyanga.
Gentecuna cai pachapi tiyai callari pachamanta chai punllacama, manataj tiyashca jatun llaquimi tiyanga.
Shina cajpipish chai punllacunapica, cambaj israelcunaca quishpichishcami canga.
Libropi paicunapaj shuti quillcashcacunaca tucuicunami quishpirishca canga.
2Chai punllacunapica huañushcacunapish causachishcami canga.
Shujcunaca huiñai causaipajmi causachishca canga.
Caishujcunaca huiñaita pingaichishca, muspachishca cangapajmi causachishca canga.
3Yachaisapa cajcunaca, jahua pacha shina lamyacujmi canga.
Cashcata ruranata achcacunata yachachijcunaca, luzerocuna shina huiñai huiñaita lamyacungallami.
4Ashtahuanpish Daniel canca, cai shimicunata quillcashca librotaca, tucuri punllacunacama huichcashpa sellailla. Achcacunami caiman chaiman callpangacuna. Ima jatun yachaipish ashtahuanmi miranga nircami.
5Chai q'uipaca Daniel ñucaca, shujtaj ishqui shayacujtami ricurcani. Shujca jatun yacu cai ladoman, caishujca ch'imba ladomanmi shayacurca.
6Chaicunamanta shujca lino churanata churashca jatun yacu jahuapi shayacujtaca: “Cashna jatun mancharinacuna tucurica ¿ima horataj canga?” nirca.
7Shina nijpica lino churanata churashca jatun yacu jahuapi shayacujca alli maquitapish, lluqui maquitapish jahua pachaman chutashpami, huiñaita causaj Taita Diospaj shutipi cashna nirca: “Quimsa huata chaupitami chashna llaqui tiyanga. Diospajlla cajcunata urata janajta cachashcacuna tucui tigrajpimi, chaicunaca pajtanga” nijtami uyarcani.
8Chaita uyashpapish, ñucaca imata mana entendishpami: “Ñuca amito, tucui chaicunaca ¿ima shinataj tucuringa?” nircani.
9Shina nijpi paica cashnami nirca: “Daniel, cunanca rilla. Cai shimicunaca tucuri punllacunacama huichcashpa sellashcami.
10Tucui chaicunahuanca achcacunami yurajllata, mapa illajllata rurashpa chuyajllata rurashca cangacuna. Diosta mana rijsijcunaca, Diosta mana rijsij shinallatajmi rurangacuna. Diosta mana rijsijcunaca, pi mana entendingacunachu. Ashtahuanpish entendijcunallami, caicunataca entendingacuna.
11Punllanta Diosman cushpa rupachinata anchuchishcapachamanta millanana chingachijta Diospaj altarpi churangacamaca 1.290 punllacunami canga.
12Taita Diospi shunguta churashpa 1.335 punllacunacama chayajtaca cushichishcami canga.
13Daniel canca, huañungacamami ima manchai illajlla causangui. Canca samaringuimi. Tucuri punllacuna pajtajpimi can japina cashcata chasquingapaj jataringui” nircami.
Who We AreWhat We EelieveWhat We Do
2025 by iamachristian.org,Inc All rights reserved.
