ÉXODO 27 - Quichua Chimborazo Bible

Bronce altarta rurachun mandashcami(Ex 38.1-7)

1Acacia caspihuan shuj altartapish rurangui. Chaica sunimanca ishqui metro ishqui chunga pichca centímetro, anchomanca ishqui metro ishqui chunga pichca centimetrollataj cachun. Chai altarca chuscundij lado chai medidallataj cachun. Altomanca shuj metro quimsa chunga pichca centímetro cachun.

2Altarpaj chuscu esquinacunapica, gachucunata rurangui. Chai gachucunaca altarmanta shuj shinallata rurashca cachun. Tucui chaicunaca broncehuan pilluchishca cachun.

3Chaipi imallata ruranacunatapish ushpata tandana mangacunata, palacunata, tasacunata, garfio nishca quimsa puntayujcunata, braserocunatapish tucuita broncemanta rurangui.

4Broncemanta shuj parrillata rurangui. Chai parrillapaj chuscu esquinacunapica chuscu bronce argollacunata churangui.

5Chai parrillataca altar cajón chaupicama uriman cacharijpimi, chai parrillaca altar chaupi quinripi saquiringa.

6Chai altarpajca acacia caspimanta suni caspicunata rurashpa chai jahuataca broncehuan llihuingui.

7Maimanpish apacujpi huandunalla cachun chai caspicunataca altar ishqui ladopi churashca argollacunapi pasachishpa churashca cachun.

8Chai altartaca Sinaí urcupi canman ima shina ricuchishca shinallataj tablacunahuan rurangui. Ucu siquimanca ama tablacunata churashpa jutcuta saquingui.

Diospaj carpa huasi canlla pambata rurachun mandashcami(Ex 38.9-20)

9Diospaj carpa huasi canllatapish rurangui. Chai ura lado quinrica lino puchcata ahuashca chuscu chunga pichca metro cortinahuan churashca cachun.

10Chai cortinata churanapajca ishqui chunga pilarcunata, ishqui chunga basacunata broncemanta rurashca cachun. Pilarpaj capitelcunapish, molduracunapish cullquimanta rurashca cachun.

11Chai janaj lado quinrica chuscu chunga pichca metro cortinahuan churashca cachun. Chai cortinata churanapajca ishqui chunga pilarcunata, chai pilarcunata shayachina ishqui chunga basacunata broncemanta rurashca cachun. Pilarpaj capitelcunapish, molduracunapish cullquimanta rurashca cachun.

12Inti huashicun lado huasi canllaca ishqui chunga ishqui metro chaupi metro cortinahuan churashca cachun. Chai cortinata churanapajca chunga pilarcunata, chai pilarcunata shayachinapaj chunga basacuna cachun.

13Inti llujshin lado chai huasi canllaca ishqui chunga ishqui metro chaupihuan cachun.

14Huasi canllaman yaicuna ladopaj chulla lado cortinaca sujta metro canchis chunga pichca centímetro cachun. Chai cortinata churanapajpish quimsa pilarcuna, chai pilarcunata shayachinapajpish quimsa basacuna cachun.

15Caishuj ladopajpish sujta metro canchis chunga pichca centímetro cortinallatataj churashca cachun. Chai cortinata churanapajpish quimsa pilarcuna, chai pilarcunata shayachinapajpish quimsa basacuna cachun.

16Chai huasi canllaman yaicuna pungu cortinaca iscun metro cachun. Chai cortinaca azul, morado, amsa puca caupushca lino puchcahuan ahuashpa rurashca cachun. Chai cortinapica chuscu pilartajllacunata, pilarta shayachinapaj chuscu basacunatajllata sumajta bordashca cachun.

17Chai huasi canlla muyundijpi caj pilarcunaca tucuicuna cullquihuan chumbillichishca cachun. Chai pilarcuna umapi churanaca cullqui capitelcuna cachun. Chai pilarcunata shayachina basacunaca bronce cachun.

18Huasi canllaca sunimanca chuscu chunga pichca metro cachun. Anchoca ishqui chunga ishqui metro chaupi cachun. Caishuj lado anchopish chaillataj cachun. Altoca ishqui metro ishqui chunga pichca centímetro cachun. Chai muyundijpaj cortinacunaca caupushca lino puchcata ahuashca cachun. Pilarcunata shayachina basacunapish bronce cachun.

19Diospaj carpa huasipi imalla rurana cashcata ruranacunaca broncemanta rurashca cachun. Carpa huasita charichinapaj ishtacacunapish, huasi canlla muyundij cortinacunata charichinapaj ishtacacunapish broncellamantataj rurashca cachun.

Lamparacunapaj aceiteta rurachun mandashcami(Lv 24.1-4)

20Lamparacunaca cada tuta japichishca cachun. Chaipajca olivocunata tacashpa llujshichishca ashtahuan alli aceiteta apamuchun israelcunata mandai.

21Mandaj Dioshuan cancunahuan shujlla yuyai tucushcata ricuchij quillcata huaquichishca arcata jarcachishca cortina ñaupajpi caj lamparacunaca Mandaj Diospaj ñaupajpi chishimantaca pacaringacama japichishca cachun. Chaicunataca Aarón paipaj churicunandijmi cuidangacuna. Chaicunataca tucui israelcuna huahua huahua ruracuchunmi chashna mandani.