PROVERBIOS 11 - Quichua Chimborazo Bible

1Mana alli pezanapi pezashpa shuhuajtaca,

Mandaj Diosca manataj ricunachinchu.

Alli pezashpa c'atujmantaca cushicunmi.

2Jatun tucushcacunaca pingachishcami

canga.

Ashtahuanpish alli yachaica mana jatun

tucushcacunahuanmi tiyan.

3Alli runacunataca ima pandata mana rurashpa causashcallatajmi alli

ñanta pushanga.

Ashtahuanpish juchata rurajcunataca,

paicuna millai cashcallatajmi tucuchinga.

4Taita Dios p'iñarishpa llaquichi punllapica,

imata charishcapish mana quishpichingachu.

Ashtahuanpish cashcata rurashcaca,

huañuimanta quishpichingami.

5Ima pandata mana rurajtaca, cashcata

pai rurashcallatajmi causaipica alli pushan.

Ashtahuanpish Diosta mana manchaj runaca, paillataj mana manchashcamantami urmanga.

6Alli runacunataca cashcata rurashcallatajmi

llaquimanta huaquichinga.

Ashtahuanpish juchata rurajcunaca,

juchapi japi tucungatajmi.

7Millai runa huañujpica, pai

shuyacushcapish tucurinmi.

Millai runacuna yuyacushcapish chingarinmi.

8Cashcata rurajtaca ima llaquimantapish,

Taita Diosmi huaquichin.

Ashtahuanpish paita mana manchajmi,

paipaj randi chai llaquipi japi tucun.

9Mishqui shimi jayaj shungu runaca,

shujtajcunata llaquipi churangapajmi

imatapish ninlla.

Ashtahuanpish cashcata rurajcunaca, alli

yuyaiyuj cashpami quishpirinllacuna.

10Cashcata rurajcuna charij tucujpica,

pueblopi causajcunaca tucuicunami cushicuncuna.

Diosta mana manchajcuna huañujpicarin,

jatun micuita rurashpami cushicuncuna.

11Allita rurajcunamanta bendiciajpimi,

pueblopish ashtahuan jatunyachishca canga.

Ashtahuanpish mana manchajcunapaj shimica,

llaquipimi churan.

12Yuyaita mana japijcunallami, pitapish

mana alli nishpa rimancuna.

Ashtahuanpish alli yuyaiyuj runaca,

ima cajpipish shungupi chingachinllami.

13Parlarishpa purijca, mana parlana

cashcatapish tucui parlanllami.

Ashtahuanpish shunguta churaipaj runaca,

ima cajpipish quiquin shungupimi chingachin.

14Alli yachaj pushaj mana tiyajpica,

llajtaca urmanllami.

Ashtahuanpish achca cunajcuna tiyajpica,

ima llaquipish mana japinchu.

15Mana rijsishca runapaj garante tucujca,

llaqui tucuntajmi.

Ashtahuanpish diviyanata mana munajca,

manchai illajmi causanga.

16Alli shungu huarmica, alli nishcami

canga.

Sinchi sinchita trabajajcunaca

charijyangami.

17Pitapish llaquij runaca quiquin

causaipajmari allita ruran.

Ashtahuanpish p'iñashpa llaquichij runaca,

paillatajmi llaquipi yaicun.

18Diosta mana manchaj runaca,

umarishpami causan.

Ashtahuanpish allita tarpucujca,

mana tucurij allicunatami japinga.

19Cashcata ruraj canaca, alli

causaimanmi pushacun.

Millai cajcunatapish millaita ruranallatajmi,

huañuiman chayachin.

20Mandaj Diosca millai shungucunataca,

manataj ricunachinchu.

Ashtahuanpish ima pandata mana rurajcunatami,

cushicuihuan ricucun.

21Millai runaca caya cashpa, mincha

cashpa llaquichishca cangatajmi.

Ashtahuanpish cashcata rurajcunaca,

huahua huahuacunapish quishpichishca cangami.

22Sumaj ñahui cashpapish,

yuyai illaj huarmica,

curi sarcillota c'uchi singapi

apachishca shinallami.

23Cashcata rurajcunaca allita

rurana yuyaillami.

Ashtahuanpish mana manchajcunaca,

p'iñanacuillatami shuyancuna.

24Imatapish mana mitsashpa cuj alli

shungucunaca, ashtahuanmi charijyancuna.

Maijancunaca aticujpipish quiquinpajlla

charishpapish, huajcha tucunllacunami.

25Shujtajcunapaj allita rurajcunaca

charijyancunami.

Shujtajcunaman carajcunaca, paicunapish

chasquincunami.

26Granocunata quiquinlla tucui japishpa

huaquichijtaca, tucuicunami llaqui

tucushpa alli canman nincuna.

Ashtahuanpish mana huaquichishpa

c'atujcunataca, alli nincunami.

27Shujtajcunapaj allita rurajtaca,

paitapish c'uyashpa alli nincunami.

Ashtahuanpish pitapish llaquichina

yuyailla purijtaca, paitarajmi ima

llaquipish japinga.

28Ima charishcacunallapi shunguta

churajcunaca, yura p'anga chaquirishca

shinami urmangacuna.

Ashtahuanpish cashcata rurajcunaca, yura ramapi p'anga jundarij shinami

jataringacuna.

29Quiquin huasipaj imata mana yuyarijca,

imata mana charinchu.

Chashna rumi shungucunaca,

yachaisapacunapajta rurajcunami tucuncuna.

30Cashcata rurajcuna ima rurashcacunaca,

causaita cuj yura shinami.

Yachaisapa cashpamari, shujtajcunatapish

alli ñanpi churancuna.

31Cashcata rurajcunapajpish, cai pachapi japina tiyanmi.

¡Diosta mana manchashpa juchata

rurajcunapajcarin, jatun japinamari tiyan!