GÉNESIS 46 - Quichua Chimborazo Bible

Yaya Jacobpish paipaj familiacunapish Egiptopi cashcami

1Yaya Israelca tucui pai imalla charishcacunandijmi llujshirca. Beersebaman ña chayashpaca paipaj yaya Isaacpaj Taita Diosmanmi animalcunata cushpa huañuchirca.

2Chai tutami Taita Diosca yaya Israelman muscuipi shina ricurishpaca:

–Jacob, Jacob– nijpi paica:

–Caipimi cani– nirca.

3Chaipimi Taita Diosca:

–Ñucaca cambaj yayapaj Taita Diosmi cani. Egiptoman uriyanataca ama manchaichu. Chaipimi canmantaca jatun llajtata rurasha.

4Egiptomanca canhuanmi uriyasha. Ñucallatajmi tigrachimusha. Cambaj ñahuicunataca Josepaj maquimi huichcanga– nirca.

5Jacob, Beersebamanta llujshigrijpica, paipaj churicunaca yaya Jacobtapish paicunapaj huahuacunatapish, paicunapaj huarmicunatapish faraón apanaman cachashca carrocunapimi huichiyachirca.

6Canaanpi charishcacunataca animalcunatapish, charinacunatapish tucuita apashpami rircacuna. Jacobca paipaj huahua huahuacunahuanca Egiptomanca caicunahuanmi rirca:

7Paipaj churicunahuan, paipaj nietocunahuan, paipaj ushushicunahuan, paipaj nietacunahuanmi rirca. Jacobca paipaj huahua huahuacunataca tucuicunatami Egiptoman pushashpa rirca.

8Israelpaj huahua huahuacuna Jacobhuan paipaj churicunandij Egiptoman yaicujcunapaj shuticunaca caicunami:

Jacobpaj punta churica Rubenmi carca.

9Rubenpaj churicunaca: Hanoc, Falú, Hezrón, Carmi shuticunami carca.

10Simeonpaj churicunaca: Jemuel, Jamín, Ohad, Jaquín, Zohar, Saúl shuticunami carca. Saulca Canaanmanta caj huarmipi huacharishcami carca.

11Levipaj churicunaca: Gersón, Coat, Merari shuticunami carca.

12Judapaj churicunaca: Er, Onán, Sela, Fares, Zara shuticunami carca. Er, Onán runacunaca Canaanllapitajmi huañurcacuna. Farespaj churicunaca Hezrón, Hamul shuticunami carca.

13Isacarpaj churicunaca: Tola, Fúa, Job, Simrón shuticunami carca.

14Zabulonpaj churicunaca: Sered, Elón, Jahleel shuticunami carca.

15Paicunaca Padan-arampi Jacob causacushpa Lea huarmihuan charishca churicunami carca. Dina shuti ushushitapishmi charirca. Churicunatapish ushushicunatapish tucuita yupajpica quimsa chunga quimsami carca.

16Gadpaj churicunaca: Zifión, Hagui, Ezbón, Suni, Eri, Arodi, Areli shuticunami carca.

17Aserpaj churicunaca: Imna, Isúa, Isúi, Bería shuticunami carca. Paicunapaj panica Sera shutimi carca. Beriapaj churicunaca: Heber, Malquiel shuticunami carca.

18Chaicunaca Zilpa huarmihuan Jacob charishca huahuacunami carca. Zilpaca Labanpajta rurajmi carca. Paitaca Labanllatajmi paipaj ushushi Leapajta rurachun curca. Tucui paicunata yupajpica chunga sujtami carca.

19Jacobpaj huarmi Raquelpaj huahuacunaca: José, Benjamín shuticunami carca.

20Joseca Egiptopi cashpami Asenat paipaj huarmipica Manasés, Efraín shuti churicunata charirca. Asenatca On pueblopi causaj Potifera curapaj ushushimi carca.

21Benjaminpaj churicunaca: Bela, Bequer, Asbel, Gera, Naamán, Ehi, Ros, Mupim, Hupim, Ard shuticunami carca.

22Tucui chaicunami Jacobpaj huarmi Raquelpaj huahuacuna carca. Paicunata tucuita yupajpica, chunga chuscumi carca.

23Danca Husim shuti churillatami charirca.

24Neftalipaj churicunaca: Jahzeel, Guni, Jezer, Silem shuticunami carca.

25Paicunaca Labán paipaj ushushi Raquelpajta rurachun cushca Bilha huarmihuan Jacob charishca churicuna. Chai churicunapaj huahua huahuacunami carca. Tucui paicunaca canchismi carca.

26Jacobpaj huahua huahuacunaca, paicunapaj huarmicunata mana yupashcami sujta chunga sujta carcacuna. Tucui paicunami Egiptoman Jacobhuan rircacuna.

27Josepaj ishqui churicunaca, Egiptopimi huacharircacuna. Paicunandij Jacobpaj huasi ucupuracunata tucuita yupajpica, canchis chungami Egiptoman yaicurcacuna.

28Jacobca paipaj churi José Gosenpi tupanaman shamuchunmi Judata ñaupachishpa cacharca. Paicunaca Gosenmanmi chayarca.

29Joseca paipaj carropi rishpami, paipaj yaya Israeltaca Gosenpi tupagrirca. Yayata ricushpaca, cungapi ugllarishpami unicama huacarca.

30Israelca Josetaca:

–Canca causacushcanguitajmi. Cunanca ñahui ñahuimi ricuni. Cunantajca ña huañunallami cani– nirca.

31Chaipimi Joseca paipaj huauquicunatapish, paipaj yayapaj huasi ucupuracunatapish:

–Cunanca faraonpajman huichiyashpami yachaj chayachigrini. Paimanca: Canaanpi caj ñuca huauquicunapish, ñuca yayapaj tucui huasi ucupuracunapishmi ñucapajman shamushcacuna.

32Paicunaca animalcunata michishpa causajcunallami. Chashna cashpami vacacunatapish, ovejacunatapish pushashpa, tucui imalla charishcacunatapish apashpa shamushcacuna nishpami yachaj chayachigrini.

33Faraón cancunata cayashpa: Imata rurajcunataj canguichij nishpa tapujpica,

34cancunaca: Cambajta ruraj ñucanchijca ñucanchij ñaupa yayacuna shinallataj huambramantapacha animalcunata michishpa huiñachishpa causajcunami canchij nishpa huillanguichij. Chashna nishpallami, Gosenpica causai tucunguichij. Egipciocunapajca ovejacunata michij canaca yallitaj millananami– nishpami yachachirca.