1Efrainpaj ailluca tucuicuna tandanacushpami, janaj ladoman pasashpa Jeftetaca:
–Amonitacunahuan macanacugricushpaca ñucanchijpish canhuan ringapaj ¿ima nishpataj mana cayarcangui? Chaimantami cunanca cantaca cambaj huasi ucullapitaj huasindij rupachigrinchij– nircacuna.
2Chaimi Jefteca:
–Ñucapish, ñuca llajtapi causajcunapish amonitacunahuan jatunta p'iñanacushpaca cancunatapish cayaj cacharcanimi. Ashtahuanpish cancunamari paicunahuan macanacucujpica mana ayudaj shamurcanguichij.
3Cancuna ayudanaman mana shamujta ricushpami, huañushpapish huañushatajchari nishpa amonitacunahuanca macanacurcani. Mandaj Dios paicunata ñuca maquipi churajpimi misharcani. Cunanca ¿ima nishpataj ñucahuan macanacunaman huichiyamurcanguichij?– nircami.
4Jefteca, Galaadpi causajcunata tandachishpami, Efrainpaj ailluhuan macanacurca. Galaadpi causajcunami Efrainpaj aillutaca misharcacuna. Efrainpaj ailluca Galaadpi causajcunataca: “Efraín aillupaj, Manasés aillupaj chaupipi causacuj galaaditacunaca Efrainpaj aillumanta chaupirimushcacunallami canguichij” nishcamantami chashna macanacushcacuna.
5Galaadpi causajcunaca Jordán yacuta ch'imbanapimi, Efraín aillupura cajcuna miticushpa saquirishcacunata chapacurcacuna. Chai saquirishcapuramanta maijan shamushpa yacuta ch'imbachun saquihuaichij nijpica: “¿Efrainpaj aillupurachu cangui?” nishpami tapurcacuna. “Mana chaipurachu cani” nijpica:
6“Shinashpaca Shibolet ni” nircacuna. Chai shimita mana rimai tucushpa “Sibolet” nijpica, japishcahuan chai yacu c'uchullapitajmi cungata p'itishpa huañuchircacuna. Chai punllaca Efraín aillupura cajcunataca, 42.000 runacunatami huañuchircacuna.
7Jefteca israelcunataca sujta huatatami mandarca. Pai huañujpica Galaadpi caj shuj pueblopimi pambarcacuna.
Israelcunataca Ibzán, Elón, Abdón mandashcami8Jeftepaj q'uipaca israelcunataca Belenmanta caj Ibzán runami mandarca.
9Paica quimsa chunga churicunata, quimsa chunga ushushicunatami charirca. Paicunataca tucuicunatami caishuj llajtamanta cajcunahuan cazarachirca. Ibzanca, canchis huatatami israelcunataca mandarca.
10Pai huañujpica, Belenpimi pambarcacuna.
11Ibzanpaj q'uipaca, Zabulón aillupaj Elón runami israelcunataca chunga huatacunata mandarca.
12Pai huañujpica Zabulonpaj llajtallapitaj caj Ajalón pueblopimi pambarcacuna.
13Elonpaj q'uipaca Piratón pueblomanta caj Hilel runapaj churi Abdonmi israelcunataca mandarca.
14Paica chuscu chunga churicunata, quimsa chunga nietocunatami charirca. Paicunaca tucuicunami tiyarishpa puringapajca shuj shuj burrota charircacuna. Abdonca israelcunataca pusaj huatatami mandarca.
15Piratón pueblomanta caj Hilelpaj churi Abdón huañujpica, Amalecpaj urcupi caj Efrainpaj allpa Piratón pueblopimi pambarcacuna.
Who We AreWhat We EelieveWhat We Do
2025 by iamachristian.org,Inc All rights reserved.
