HECHOS 12 - Quichua Chimborazo Bible

Jacobotaca huañuchishca Pedrotaca carcelashcami

1Chai punllacunallatajmi jatun mandaj Herodesca, tandanacushca crijcunata llaquichisha nishpa maijan crijcunata japichirca.

2Juanpaj huauqui Jacobotaca, espadahuanmi huañuchirca.

3Chashna rurajta ricushpa, judiocunaca achcata cushicujpimi Pedrotapish japichirca. Chai punllacunaca, levadura illaj tandata micuna punllacunami carca.

4Herodesca Pedrota japichishpaca, punllapi chuscu cutin chuscu chuscu soldadocuna cuidacun carcelpimi churarca. Pascua pasajpi tucuicunapaj ñaupajman llujshichinatami yuyarirca.

5Chaimi Pedrotaca, carcelpica alli cuidaracurcacuna. Chashna cajpipish tandanacushca crijcunaca mana samarishpami, Pedromantaca Taita Diosta mañacurcacuna.

Pedrota carcelmanta llujshichishcami

6Cayami gentecunaman ricuchingapaj llujshichisha nishpa Herodes yuyacui tutaca Pedroca ishqui cadenahuan huatashcami, ishqui soldadocunapaj chaupipi dormicurca. Shujtaj soldadocunapish cárcel pungupimi cuidashpa shayacurca.

7Chashna cajpipish Jatun Diospaj shuj ángel ñapish ricurishpami, cárcel ucutaca achijyachirca. Pedrotaca, costillapi tuparishpa rijchachishpaca: “Utca jatari” nircami. Chashna nincami huatashca cadenacunaca Pedropaj maquicunamantaca cacharirishpa urmarca.

8Chai angelca: “Alli chumbilliri, cambaj pargatetapish churarishpa huatari” nircami. Pedro chashna rurajpica cutin chai angelca: “Jahua churanata pillurishpa, ñucata cati” nircami.

9Pedroca angelta catishpa llujshicushpaca, ángel chashnataj ruracushcataca mana yuyarcachu. Ashtahuanpish muscuipi shina ricucushcallatami yuyarca.

10Ña llujshicushpaca punta cuidaj, q'uipa cuidaj soldadocunata pasashpami, canllaman llujshina fierro punguman chayarcacuna. Chai punguca paillataj pascarijpimi, llujshishpa shuj ñanta ch'imbashca q'uipaca, chai angelca chingarircalla.

11Chaimi Pedro yuyaita japishpaca: “Herodespaj maquimantapish, ñucata huañuchichun chapacuj judiocunamantapish quishpichichunca, Jatun Diosmi paipaj angelta cachashca. Chaitaca cunanmari allitaj entendini” nirca.

12Chaita yuyarihuan ricushpaca, Marcos nishca Juanpaj mama Mariapaj huasimanmi chayarca. Chaipica achcacunami tandanacushpa, Taita Diosta mañacurcacuna.

13Huasi canllaman yaicuna pungupi Pedro huajtajpica, Rode shuti huambrami pi cashcata ricunaman llujshirca.

14Chai huambraca Pedropaj rimaita rijsishpaca, cushicushcamanta punguta mana pascashpami:

–Pedromari cashca– nishpa huillanaman callpashpa rirca.

15Chaita huillajpimi paicunaca:

–¿Musparinguichu, imamí?– nijpi chai huambraca:

–¡Pedrotajmari mana musparicunichu!– nijpi paicunaca:

–¡Shinashpaca paipaj angelmi canga!– nircacuna.

16Chaicamaca Pedroca pungupi ashtahuan huajtacurcallami. Punguta pascashpa paita ricushpaca, yallitajmi mancharircacuna.

17Paica maquihuan upalla caichij nishpami, carcelmanta Mandaj Jesús ima shina llujshichishcata parlarca. Chaipica:

–Caitaca Jacoboman, caishuj crijcunamanpish yachaj chayachinguichij– nishpa, llujshishpaca shujtajmanmi rirca.

18Ña pacarijpica soldadocunapurami:

–Pedroca imashi tucurca– nishpa yallitaj bullacurcacuna.

19Ashtahuanpish Herodesca, Pedrota mashcashpa mana japishpami, soldadocunata juchachishpa, paicunata huañuchichun mandarca. Chai q'uipami, Herodesca Judeamanta Cesareaman uriyashpa chaipi causarca.

Herodes huañushcami

20Herodesca Tiropi, Sidonpi causajcunahuanmi p'iñarirca. Chashna p'iñarishpami chai llajtapi causajcunamanca Herodesca paicuna imalla randina cashcata ña mana c'aturca. Chaimantami chai pueblopi causajcunaca Herodes churashca mandaj Blastohuan shuj yuyailla tucushpa, sumajlla causanata Herodestaca mañarcacuna.

21Herodesca paicunahuan parlanacungapajca shuj punllatami agllarca. Chai punllapimi paica mandangapaj churanata churarishpa jatun tiyanapi tiyarishpa sumajta rimarca.

22Chashna rimajta tucui chaipi cajcuna uyashpaca: “¡Canca diosmi cangui, mana runachu cangui!” nishpami caparircacuna.

23Chashna nijpica Taita Diosta jatunyachinapaj randica pairaj jatun tucushcamantami Jatun Diospaj shuj ángel ungüita cujpi Herodesca c'urucuna micushca huañurca.

24Jatun Diospaj Shimita huillajpica crijcunaca achcacunami crircacuna. Yallitaj achcami mirarircacuna.

25Bernabepish Saulopish paicunaman rurachun mingashcata pajtachishpami Marcos nishca Juantapish Jerusalenmanta pushashpa Antioquiaman cutin tigrarcacuna.