APOCALIPSIS 12 - Quichua Chimborazo Bible

Huarmimantapish dragonmantapish

1Cielopica, mana ricushca shuj jatun mancharinami ricurirca: Intita churarishca shuj huarmimi, luna jahuapi shayacurca. Umapica chunga ishqui luzerocunamanta rurashca coronata churarishcami carca.

2Chai huarmica chichu cashpa huachana ña pajtashcamantami, huachana nanaihuan achca llaquita apashpa capariricurca.

3Shinallataj cielopica mana ricushca shujtaj jatun mancharinami ricurirca: Puca nicuj jatun dragonmi canchis umacunayuj, chunga gachucunayuj ricurirca. Umacunapica, canchis coronacunata churashcami carca.

4Chai dragonca, quimsapi chaupishca shuj parte luzerocunatami, cielomanta allpa pachaman paipaj chupahuan aisashpa shitarca. Chai dragonca huachanachicuj huarmipaj ñaupajpimi, huahua huacharinca huahuata millpungapaj shayarirca.

5Chai huarmica, tucui llajtata fierro varahuan mandana caj shuj c'ari huahuatami huacharca. Chai huahuataca, Diospajmanpish, paipaj jatun tiyarinamanpishmi aparca.

6Chai huarmica, shitashca pambapi Dios allichishcapi miticugrijpimi chaipica 1.260 punllacunacama Dios cuidashca carca.

7Chai q'uipaca, cielopica jatun macanacuimi tiyarca: Miguelmi, paipaj angelcunandij, dragonhuan macanacucurca. Dragonpish, paipaj angelcunandijmi macanacucurca.

8Macanacushpapish dragonca mana mishai tucurcachu. Chaimanta paicunaca cielopica, ña mana ashtahuan chayai tucurcachu.

9Chashnami chai jatun dragontaca, cielomantaca ña shitarca. Paica ñaupa rucu culebrami. Paica diablo, Satanás shutipishmi. Paica, allpa pachapi causajcunata umajmi. Paitami tucui paipaj millai angelcunandij allpa pachaman shitarca.

10Chai q'uipaca cielopica, sinchita cashna caparijtami uyarcani:

“Diospaj ñaupajpi ñucanchij huauquicunata punllapish tutapish juchachijtaca cielomanta ñami shitashca.

Chaimanta cunanmari quishpirinapish ñucanchij Diospaj mandanapish, pailla tucuita rurai tucuj canapish, Cristo mandai tucunapish ña chayamushca.

11Chai huauquicunaca, Ovejapaj yahuarhuan, paipaj shimita huillashcahuanmi diablotaca misharcacuna.

Quiquin causaita mana llaquishpami huañuchingacama huillarcacuna.

12Chaimanta cielopish, chaipi causajcunapish cushicuichij.

Ashtahuanpish allpapi causajcuna, mama cuchapi causajcunaca ¡aij imachari tucunguichij!

Diabloca pai munashcata rurana punllacuna ashalla cashcata yachashpami, jatunta p'iñarishpa cancunapajman uriyashca nijtami uyarcani” nircami.

13Dragonca paita allpa pachaman ña shitashca cashcata ricushpaca, c'ari huahuata huachaj huarmitami p'iñashpa catirca.

14Chaimantami chai huarmimanca, shitashca pambaman culebrapaj ñaupajmanta jatarishpa richun, jatun aguilapaj ishqui alasta curca. Chaipimi quimsa huata chaupicama Dios cuidashca carashca causarca.

15Chaipimi culebraca, chai huarmita yacu apachun, paipaj shimimanta jatun yacu shinata shitarca.

16Chashna rurajpipish, dragonpaj shimimanta shitashca jatun yacutaca allpa chaupirishpa tucui millpushpami, chai huarmitaca quishpichirca.

17Chashna rurajpimi, dragonca chai huarmihuan ashtahuan p'iñarishpa chai huarmipaj saquirishca huahua huahuacunahuan jatunta macanacugrirca. Paicunaca, Dios mandashcata alli cazujcunami. Jesucristomanta huillashcatapish alli catijcunami.