PROVERBIOS 13 - Quichua Chimborazo Bible

1Yachaisapa churica, yaya cunashcata

cazunmi.

Ashtahuanpish chanzata ruraj churica,

mashnata jarcajpipish manataj uyanchu.

2Maijanpish allita rimashpaca,

allicunallatatajmi japin.

Ashtahuanpish mana cazujcunaca

llaquitami japingacuna.

3Maijanpish shimi cacharishca

canata huaquichirijca, quiquin

causaitami huaquichin.

Ashtahuanpish shimi cacharishca runaca,

jatun llaquitami japinga.

4Q'uilla runaca imata charisha nishpapish,

manataj japinchu.

Ashtahuanpish tucui yuyaihuan

trabajajcunaca charijyancunatajmi.

5Cashcata rurajcunaca llullaj canataca,

manataj munancunachu.

Ashtahuanpish Diosta mana manchaj runaca,

paillatajmi p'iñai tucushpa pingai tucun.

6Ima pandata mana rurashpa causaj runataca,

cashcata rurashcamari huaquichin.

Ashtahuanpish juchata ruraj runataca,

Diosta mana manchashpa causashcami

llaquiman apan.

7Maijancunaca imata mana charijcunapish

charijcunaman rijchajcunami.

Maijancunaca charij cashpapish,

huajchacunaman rijchajmi.

8Charij runaca imamanta huañuchisha

nijpica, cullquihuanmi quishpirincuna.

Ashtahuanpish huajcha runataca, pi mana

huañuchisha nishpa manchachinchu.

9Cashcata rurajcunapaj luzca, ashtahuan

achijllami tucunga.

Ashtahuanpish mana manchajcunapaj

lámpara ninaca huañungami.

10Jatun tucushcacunaca p'iñanacunllami.

Ashtahuanpish cunashcata chasquijcunaca,

alli yachajcunami tucun.

11Yanga ruranacunahuan charijyajcunaca,

japishcahuanmi tucuchincuna.

Ashtahuanpish trabajashpa japijcunaca

mirachincunami.

12Shuyacushca utca pajtashcaca,

causaita cuj yura shinami.

Ashtahuanpish mana utca pajtajpica,

shungu p'aquirishpami llaquirincuna.

13Imalla rurai nishcata mana cazushpa

p'iñajcunaca, chaillamantatajmi jatun

llaquita apangacuna.

Ashtahuanpish mandashcata cazushpa causaj

runaca, allitamari chasquinga.

14Yachaj runa mandashca shimicunaca,

causaita cuj yacu shinamari.

Huañuna linchipi urmanamanta quishpichijmari.

15Alli yuyaita japishpaca,

c'uyaipi churanmi.

Ashtahuanpish mana cazujcunaca,

llaquitami causancuna.

16Alli yuyaiyuj runaca alli yachaihuanmi

imatapish ruran.

Ashtahuanpish rumi shungu runaca,

yachai illaj cashcatami ricuchin.

17Ima huillanatapish mana alli huillajca,

llaquichishpami saquin.

Ashtahuanpish cashcatataj huillajca,

cushichishpami saquin.

18Cunashcata mana munajca p'iñashcapish,

huajchapishmi tucunga.

Ashtahuanpish alli tucuchun rimashcata

chasquij runaca, alli nishcami tucun.

19Munashcataj pajtashpaca shunguta

cushichinmi.

Ashtahuanpish rumi shungucunaca, millai

ruranata saquinataca mana munancunachu.

20Yachaisapacunahuan tandanacujca,

yachaisapami tucun.

Ashtahuanpish rumi shungucunahuan

tandanacujca, jatun llaquipimi urman.

21Juchasapacunataca llaquicunallami

chaqui huashapi catiracun.

Ashtahuanpish cashcata rurajcunaca,

allicunatami chasquincuna.

22Allita rurashpa causaj runaca,

imalla charishcacunataca huahuacunapajpish

saquincunami.

Ashtahuanpish juchasapacuna charishcacunaca,

cashcata rurajcunapajmi huaquichishca

tiyacun.

23Huajchacunapaj chagraca micunapaj

pajtatami p'ucun.

Ashtahuanpish yachai illaimantami, ima

tandanallatapish mana charincuna.

24Ima cajpipish, alli tucuchun mana

llaquichijca, quiquin churillatatajmi

p'iñan.

Ashtahuanpish c'uyashpatajca, uchillamantapachami

llaquichishpa yachachin.

25Cashcata rurajca micunatapish

pajtatami charincuna.

Ashtahuanpish Diosta mana manchajcunaca,

chushaj huijsami puringacuna.