1 SAMUEL 7 - Quichua Chimborazo Bible

1Quiriat-jearimpi causajcuna shamushpa Mandaj Diospaj arcata apashpaca Abinadabpaj huasipimi churarcacuna. Chai huasica shuj lomapimi carca. Mandaj Diospaj arcata chai huasipi cuidachunca, Abinadabpaj churi Eleazartami Diospajlla cachun ch'icanchishpa churarcacuna.

Israelcunapaj juezca Samuelmi

2Diospajlla arcata Quiriat-jearimpi churashca punllamantaca, achca punllacunami tucurca. Ishqui chunga huatacunatami chaipi carca. Chaipimi israelcunaca Mandaj Diosmanta achcata huacarcacuna.

3Chaimi Samuelca tucui israelcunataca: “Cancuna tucui shunguhuan Mandaj Diospajmantaj tigrarishpaca, shujtajcunapaj dioscunata, Astarot huarmi diosta cancunapuramanta anchuchishpa tucui shunguhuan Mandaj Diospajlla tucushpa paipajta ruraichij. Chaimi filisteocunapaj maquimantaca quishpichinga” nirca.

4Israelcunaca Baal dioscunata, Astarot dioscunata paicunapaj chaupimanta anchuchishpami, Mandaj Diospajllata rurarcacuna.

5Chaimi Samuelca: “Tucui israelcunata Mizpapi tandachichij. Tucui cancunamanta Mandaj Diosta ñuca mañangapaj” nijpimi,

6israelcunaca Mizpapi tandanacushpa yacuta huishishpa Mandaj Diospaj ñaupajpi tallircacuna. Chai punllaca ayunashpami: “Mandaj Diostaca canta p'iñachishpamari juchallishcanchij” nishpa Samuelca israelcuna mana allita rurashcataca Mizpa pueblopi allichirca.

7Filisteocunaca israelcuna Mizpapi tandanacushcata yachaj chayashpami, paicunata mandajcunaca israelcunata llaquichingapaj huichiyarcacuna. Chaimi israelcunaca filisteocuna llaquichinata manchashpa,

8Samueltaca: “Ñucanchijta filisteocunapaj maquimanta huaquichichun, ñucanchijmanta Mandaj Diosta mañanataca ama shaicushpa mañacuilla” nircacuna.

9Chaimi Samuelca, chuchucujraj bachujta japishpa Mandaj Diosman tucuita cushpa rupachirca. Samuelca Mandaj Diostaca caparishpa israelcunamanta mañajpimi, Mandaj Diosca pai mañashcata uyarca.

10Mandaj Diosman tucuita cushpa Samuel rupachicujpirajmi, filisteocunaca israelcunahuan macanacungapaj chayarcacuna. Ashtahuanpish Mandaj Diosca chai punllaca filisteocunapaj jahuapi yallitaj c'ulun nichishpa paicunata yallitaj manchachijpimi, filisteocunaca israelcuna mishashca saquirirca.

11Chaimi israelcunaca Mizpamanta llujshishpa filisteocunataca Bet-car pueblo uranijcama catishpa huañuchircacuna.

12Samuelca, shuj rumita japishpami Mizpa pueblohuan, Sen pueblohuan chaupipi churarca. Chai rumitaca: “Mandaj Diosca ñucanchijtaca caicamami ayudan” nishpami, Eben-ezerta shutichirca.

13Chaimi filisteocunaca israelcunata manchashpa paicunapaj llajtaman yaicungapajca cutinca ña mana tigrarcacuna. Samuel mandacui tucui punllacunapimi Mandaj Diosca filisteocunataca llaquichishpa charirca.

14Israelcunaca filisteocuna ñaupaman quichushca tucui pueblocunatami, tucuita cutinllataj paicuna japircacuna. Chai pueblocunataca Ecronmanta callarishpa, Gatcamami filisteocunapaj maquimanta israelcuna cutinllataj quichurcacuna. Israelcunahuan amorreocunahuanpish macanacuica ña mana tiyarcachu.

15Samuelca tucui paipaj causaipimi israelcunata pushaj carca.

16Samuelca israelcunapurapi ima allichina tiyashcata allichingapajca Bet-el, Gilgal, Mizpa shuti pueblocunamanmi huatanta rij carca.

17Chaimantaca Ramá pueblopi caj paipaj huasimanmi tigrajlla carca. Paica chaipimi israelcunapurapi ima allichinatapish allichij carca. Chaipica Mandaj Diospaj shuj altartapishmi rurarca.