1Jatun mandaj Uzías huañui huatami, ñucaca Jatun Diostaca sumaj jatun tiyanapi tiyacujta, paipaj jahua churanaca Diospaj huasi ucupi jundajta ricurcani.
2Paipaj jahuanijpica serafín nishca angelcunami carca. Chai angelcunaca cada shujmi sujta alascunata charirca. Ishqui alascunahuanca paicunapaj ñahuitami taparishca carca, caishuj ishqui alascunahuanca paicunapaj chaquitami taparishca carca. Cutin caishuj ishqui alascunahuanca jahuata volacujmi carca.
3Paicunaca caishuj chaishujmi:
“¡Tucuita Mandaj Diosca, jucha illaj, jucha illaj, jucha illaj Diosmari!
¡Tucui allpapish paipaj achij nicuj cashcahuan jundamari!” nijcunami carca.
4Chashna nishca uyarijpica, Diospaj huasi pungu quisyucunaca chujchurcami, chai tucui huasi ucupica cushnimi jundarca.
5Chaimi ñucaca:
“¡Aij, ñucalla ña huañunimi nircani!
Ñucaca mapa shimicunata rimaj runamari cani.
Mapa shimicunata rimaj runacunapaj chaupipipishmari causani.
Chashna runami ñuca ñahuicunahuantaj Jatun Mandajta ricuni.
Tucuita Mandaj Diostamari ricuni” nircanimi.
6Serafín nishca angelcunamanta shujca altarmanta shuj tenazahuan nina brazusta japishcata, paipaj maquipi apashca ñucapajman volamushpaca,
7ñuca shimipi tupachishpami:
“Riqui, cambaj shimica cai ninahuan tupachishcami.
Canpi ima juchachina tiyashcapish ña p'ichashcami, cambaj juchacunapish anchuchishcami” nirca.
8Chai q'uipami, Jatun Dios rimashcata uyarcani: “¿Pitataj cachashari? ¿Pitaj ñucanchijpaj randi ringari?” nijpimi ñucaca: “Caipimi cani, ñucata cachahuai” nircani.
9Chaimi paica:
“Ri, chai gentecunataca cashna nigri: Alli uyashpapish mana entendinguichijchu, alli ricushpapish ima cashcata mana yachanguichijchu nigri.
10Paicunapaj shungutapish rumiyachi.
Rinrintapish mana uyajta rurai.
Ñahuitapish mana ricujta rurai.
Ñahuihuanpish ama ricuchun, rinrinhuanpish ama uyachun, shunguhuanpish ama entendichun,
ñuca ama alliyachichun ñucaman ama cutirichun chashna rurai” nircami.
11Chaimi ñucaca: “Jatun Dios ¿maicamataj chashna cangari?” nircani. Shina nijpi paica:
“Pueblocunapish urmachishca cangacama.
Chaipi causajcunapish mana tiyangacama.
Huasicunapipish pi mana causaj tiyangacama, allpapish shitashca pamba saquiringacamami chashna canga.
12Mandaj Diosllataj caipi causajcunataca, shujtaj llajtaman cachangacama.
Cai llajtaca tucui shitashca tucungacamami chashna canga.
13Patsajmanta chungapura cai llajtapi saquirishca cashpapish, chaipish chingachishcami canga.
Roble yurata cashpa, encina yurata cashpa p'itijpica, chai troncoca saquirinrajmi.
Chai troncomantami jucha illajcunaca cutin huiñanga” nircami.
Who We AreWhat We EelieveWhat We Do
2025 by iamachristian.org,Inc All rights reserved.
