LEVÍTICO 11 - Quichua Chimborazo Bible

Micuna animalcunamantapish mana micuna animalcunamantapish(Dt 14.3-21)

1Mandaj Diosca Moisestapish, Aarontapish cashna nishpami mandarca:

2“Israelcunataca cashna nishpa mandai: Cai pachapi tiyaj tucui animalcunamantaca, cai animalcunallatami micuna canguichij:

3Tucui animalcunamantaca pallca sillucunata charij, tigrachishpa cashtujcuna cajllapi micunguichij.

4Tigrachishpa cashtuj cajpipish, pallca sillucunata charij cajpipish, caicunataca mana micunachu canguichij. Camelloca tigrachishpa cashtuj cashpapish mana pallca silluta charinchu. Chaimanta mapa animal cashcata yuyanguichij.

5Shinallataj cunupish tigrachishpa cashtuj cashpapish mana pallca silluta charinchu. Chaimanta mapa animal cashcata yuyanguichij.

6Shinallataj liebre animalca tigrachishpa cashtuj cashpapish, mana pallca silluta charinchu. Chaimanta mapa animal cashcata yuyanguichij.

7C'uchica pallca sillucunayuj cashpapish, mana tigrachishpa cashtunchu. Chaimanta mapa animal cashcata yuyanguichij.

8Chashna animalcunapaj aichataca amataj micunguichijchu. Huañushcapipish amataj tuparinguichijchu. Chaicunataca mapa cashcata yuyanguichij.

9Yacupi causaj tucui animalcunamantaca caicunata micunguichij: Mama cuchapi cajta cashpapish, jatun yacupi cajta cashpapish alasyuj, escamayuj cajcunallatami micui tucunguichij.

10Mana alasyuj, mana escamayuj tucui animalcunataca mama cuchapi causaj cajpipish, jatun yacupi causaj cajpipish, uchillacuna cachun, jatuncuna cachunpish tucui chai shina animalcunataca millanana animalcuna cashcata yuyanguichij.

11Chai animalcunaca cancunapajca millananami canga. Chai animalpaj aichataca ama micunguichijchu. Chai animalcuna huañushca aichataca millanguichij.

12Yacupi causaj animalcunataca mana alasyuj, mana escamayujcunataca tucuita millanana cashcata yuyanguichij.

13Alasyuj animalcunapuramantaca cai animalcunatami millanana animalcuna cashcata yuyashpa millanana cashcamanta mana micuna canguichij. Chai animalcunaca caicunami: Aguila, quebrantahuesos, azor,

14gallinazo, milano, chai shina angacunataca ama micunguichijchu.

15Tucui laya cuervocunata,

16avestruzta, lechuzata, gaviotata, tucui laya gavilancunatapish ama micunguichijchu.

17Chushij, somormujo, ibis,

18calamón, pelícano, buitre,

19cigüeña nishca animalcunatapish, tucui laya garzacunatapish, abubilla nishcatapish, murcielagotapish ama micunguichijchu

20Tucui chuspicunataca alasyuj, chuscu chaquihuan purijcuna cajpica millanana cashcata yuyanguichij.

21Ashtahuanpish alasyuj, chuscu chaquihuan purijcuna cashpapish allpapi saltanapaj suni changacunata charijcunataca micunguichijlla.

22Chaicunamantaca caicunatami micuna canguichij: Tucui laya langostacunata, langostín, grillo, saltamonte nishcacunataca micunguichijlla.

23Cai shina caj shujtaj chuspicunataca alasyuj chuscu chaquicunahuan pambata purij cashpaca, cancunapajca millananami canga.

24Cai shinacunapi tuparishpaca mapayashcami saquiringuichij:

Maijanpish chai shina animalcuna huañushcapi tuparijca tutayangacama mapayashcami saquiringa.

25Maijanpish chai animalcuna huañushcapi japirijca, paipaj churanacunata tajshachun. Shina cashpapish paica tutayangacama mapami saquiringa.

26Ima animal cashpapish mana pallca silluyuj, mana tigrachishpa cashtuj cajpica, mapa animal cashcata yuyanguichij. Maijanpish chai shina animalpi tuparijca, mapami saquiringa.

27Shinallataj chuscu chaquiyuj ima animal cashpapish p'acha chaqui shunguhuan purij tucui animalcunataca mapa cashcata yuyanguichij. Chai huañushca animalpi maijanpish tuparijcunaca tutayangacama mapami saquiringa.

28Huañushca animalta japirijca, paipaj churanacunata tajshachun. Paica tutayangacamami mapa saquiringa. Chaicunataca mapa cashcatami yuyana canguichij.

29Huijsahuan llucashpa purij animalcunataca: Comadrejata, ucuchata, tucui laya sapocunata,

30erizota, cocodrilota, paluta, lagartijata, camaleontapish mapa animalcuna cashcatami yuyana canguichij.

31Huijsahuan llucashpa purij animalcunataca, tucui chai animalcunatami mapa cashcata yuyana canguichij. Maijanpish chai animalcuna huañushcapi tuparijcunaca, tutayangacama mapami saquiringa.

32Chai animalcuna huañushca ima charinacuna jahuapi urmajpica, tucui chaicunaca mapami saquiringa. Caspimanta rurashca ima charinacuna cajpipish, churanacuna cajpipish, cara cajpipish, costal cajpipish, trabajanapaj ima charinacuna cajpipish chai animal huañushcapi tuparishca cajpica, chaicunataca yacupi satishpa churanguichij. Chaicunaca tutayangacama mapami saquiringa. Chai q'uipami ima mapa illaj saquiringa.

33Allpa mangapi chai animal huañushca urmajpica, chai manga ucupi tucui imalla tiyajcunandijmi mapayanga. Chai allpa mangataca p'aquinami canguichij.

34Chai mangapi tiyaj yacu ima micunapi jicharijpica, chai micunaca tucuimi mapayanga. Chai mangapi ima ubyana tiyashca cashpapish mapallatajmi saquiringa.

35Chai huañushca animal imapi cashpapish urmajpica chaica mapami saquiringa. Hornopi cashpa, yanuna tullpapi cashpapish urmajpica chaicunataca ñutuchun. Chaicunaca mapacunami canga. Chaimanta mapa cashcatami yuyana canguichij.

36Shina cajpipish allpamanta llujshicuj yacupi cashpapish, pugyu yacupi cashpapish urmajllapimi mana mapa canga. Ashtahuanpish chai huañushca animalpi imapish tuparijcunaca mapami canga.

37Maijan chai animalcuna huañushca, tarpunapaj caj muyupi urmajpica chaica mana mapayangachu.

38Ashtahuanpish chai muyupi yacuta churashca cashcapi chai huañushca animal urmajpica, chai muyuca mapa cashcata yuyanguichij.

39Micunapaj caj maijan animal huañujpi, chaipi tuparijca tutayangacama mapami saquiringa.

40Huañushca animalpaj aichata micujca paipaj churanacunata tajshachun. Paica tutayangacamami mapa saquiringa. Huañushca animalta llujshichijpish, paipaj churanacunata tajshachun. Paipish tutayangacama mapami saquiringa.

41Huijsahuan llucashpa purij tucui animalcunaca millananacunami. Chaicunataca mana micunachu canguichij.

42Huijsahuan llucashpa purij animalcunata, chuscu chaquiyuj animalcunata, mana cashpaca ashtahuan chaquiyuj animalcunataca ama micunguichij. Chaicunaca millanana animalcunami.

43Cancunaca llucashpa purij maijan animalcunahuan ama mapayaichijchu. Chaicunahuan ama mapayaichijchu. Chaicunamantapish ama mapayaichijchu.

44Ñucaca Mandaj cancunapaj Diosmi cani. Chaimanta cancunapish tucui mapamanta anchurishpa, ñuca jucha illaj caj shinallataj cancunapish, ima jucha illajlla canguichij. Cancunaca huijsahuan llucashpa purij animalcunahuanca ama mapayachinguichijchu.

45Ñucaca Mandaj Diosmi cani. Cancunapaj Dios cangapaj, Egiptomanta cancunata llujshichimujmi cani. Ñuca ima jucha illaj caj shinallataj cancunapish ima jucha illajllami cana canguichij” nircami.

46Tucui cai mandashcacunaca, tucui animalcunamanta, alasyuj animalcunamanta, cuchapi causaj animalcunamanta, huijsahuan llucashpa purij animalcunamanta,

47maijanlla mapa animal cashcata, maijanlla mana mapa animal cashcata, maijanlla animalcunata micuna cashcata, mana micuna cashcata yachachunmi chashna mandarca.