OSEAS 10 - Quichua Chimborazo Bible

1Israelcunaca p'angasapa uva yura shinami.

Paicunapajlla achca granota p'ucuchijcunami.

Yallitaj achca grano p'ucujpica chai shinallatajmi altarcunatapish ashtahuan mirachircacuna.

Paicunapaj allpa yallitaj achca granocunata p'ucujpica, paicunapaj dioscunatapish ashtahuan allicunatami rurarcacuna.

2Paicunapaj yuyaica caiman chaiman tucucujmi.

Chaimanta cunanmi paicuna ima shina cashcataca ricuchigrin.

Mandaj Diosca paicunapaj altarcunatami ñutunga.

Rurashcalla dioscunatami chingachinga.

3Chaipimi paicunaca: “Ñucanchijca Mandaj Diosta mana manchashcamantami, jatun mandajtaca mana charinchij.

Cunanca jatun mandaj tiyashpapish ñucanchijmantaca imata mana rurai tucungachu” ningacunami.

4Imata pajtachingapaj ari ninacushpa pajtachishuntajmi ninacushpapish yangallami chashna nincuna.

Chaimi paicunata llaquichinaca, yapushca pambacunapi ajenjo sisacuj shina sisanga.

5Samariapi causajcunaca, Bet-avenpi caj bizi dioscuna chingarijpimi mancharingacuna.

Chai bizi diosta jatunyachishpa cushicuna chingarijpimi, chaita adorajcunapish, chaimanta cushicuj curacunapish llaquirishpa huacangacuna.

6Chai bizi diosca, Asiriaman apashcami canga.

Jatun mandajmanmi cunga.

Efrainca pingaichishcami canga.

Israelca mana allita ruranata yuyarinacushpa rurashcamanta pingaichishcami canga.

7Samariaca paipaj jatun mandajndijmi chingaringa.

Yacupi espuma huambuj shinami ringa.

8Avén pueblo lomacunapi tiyaj altarcunataca chingachingami.

Israelcuna juchallishpa caticunallataca anchuchingami.

Altarcuna tiyanacunapica, casha yuracuna, casha q'uihuacunami huiñanga.

Chaipimi paicunaca urcucunataca: “¡Ñucanchijta tapahuaichij! Lomacuna: ¡Ñucanchij jahuapi urmahuaichij!” ningacuna.

9Israelcuna, Gabaapi millaita ruranata callarishcamantaca caicama chai shinallatajmari juchallicunguichijlla.

¡Chaitaca ruracunguichijllamari!

Yallitaj millaita rurajcunataca Gabaapi llaquichij llaquillatajmi llaquichinga.

10Paicunata ñuca llaquichinalla tucujpica, shujtaj llajtacunami tandanacushpa jataringacuna.

Paicuna yallitaj millaita rurashcamantaca cashnami llaquichishca canga.

11Efrainca trillanata yachachishca vaquilla cushijlla trillaj shinami carcangui.

Chashna cashca cajpipish cunanca chai sumaj cungapica yugotami churagrini.

Judaca yapungami, Jacobca rumicunatami huajtanga.

12Cancunaca cancunapajca cashcata ruranata tarpuichigari.

Llaquishcata cozichaichigari.

Allpataca allichichigari.

Mandaj Diosta mashcana punllapimari canguichij.

Pai shamushpa cashcata ruranata yachachina punllacama allichirichigari.

13Ashtahuanpish cancunaca Diosta mana rijsinatami allichircanguichij.

Yallitaj millaitami cozicharcanguichij.

Llullatami micunguichij.

Cancunapaj quiquin causaipi shunguta churashcamanta, cancunapurapi caj achca c'ari c'aricunapi shunguta churashcamantami chashna tucunguichij.

14Cancunapurapica jatun bullami jataringa.

Sinchi torrecunapish tucui chingachishcami canga.

Jatun mandaj Salmán, Bet-arbel pueblota chingachishca shinami canga.

Macanacui punllapi mamacunata, huahuacunata mirga mirgata rurashpa chingachishca shinami canga.

15Cancuna yallitaj millaita rurashcamantaca Bet-elpica chashnami llaquichisha.

Israel llajtata jatun mandajca pacarinapajca chingachishcami canga.

Manataj jataringapajmi chingachishca canga.