JEREMÍAS 46 - Quichua Chimborazo Bible

Egipto llajta llaqui tucunata huillashcamanta

1Mandaj Dios shujtaj llajtacunata llaquichinata Jeremiasta huillachishca shimicunami caipica tiyacun.

2Egipto llajtamantarajmi huillarca. Josiaspaj churi jatun mandaj Joacimca, ñami Judá llajtataca chuscu huatata mandacurca. Chai huatami Egipto llajtata jatun mandaj Necao shuti faraonca, Babilonia llajtata jatun mandaj Nabucodonosorhuan Éufrates yacu c'uchullapi caj Carquemis pueblopi macanacugrirca. Chaipi cajpimi, Necaopaj soldadocunamantaca cashna huillarca:

3“Uchilla escudotapish, jatun escudotapish apashpa, macanacuiman shamuichij.

4Caballocunapi tiyarijcuna, caballocunapi tiyarichij. Umapi churarina fierrota churarichij, lanzacunata p'ichashpa achijllata ruraichij, fierro churanatapish churarichij.

5Mandaj Diosca cashnami nin: ¿Imatataj ricunichu imamí? Mancharishpamari huashaman tigrancuna. C'ari c'aricuna cashca jahuamari, tigrashpallapish mana ricushpa miticunaman callpancuna. Tucui ladomantamari yallitaj manchachincuna.

6Utca callpajpish miticunaman ama callpai tucushca canman, c'ari c'ari cajpish ama quishpiri tucushca canman. Chai Éufrates yacu c'uchupi caj janaj llajtapica, chai soldadocunapurallataj tsagmarishpamari urmancuna.

7Yacu jundai shina huichiyamucujca ¿pitajchu imamí? Paita catimujcunapish yacucuna jundai shinamari cuyurimurcacuna.

8Ñuca huichiyashpaca tucui llajtapimi jundarisha. Pueblotapish, chaipi causajcunatapishmi chingachisha nishpami, Egipto llajtamantaca jatun yacu shina tucuita jicharishpa shamucun. Paita catimujcunapish jatun yacu jundai shinamari shamuncuna.

9Caballocunapi tiyarishcacuna, huichiyaichigari. Carretapi purijcunapish, t'alaj nichishpa callpaichigari. Etiopía llajta soldadocuna, Put llajta soldadocuna, escudota aisaj c'ari c'arimari canguichij, llujshirichigari. Lud llajta soldadocunapish arcocunahuan macanacujcunamari canguichij, llujshirichigari.

10Chai punllaca, tucuita Mandaj Dios llaquichina punllamari canga. Paita p'iñajcunata japishpa llaquichina punllamari canga. Chai janaj llajtapi caj Éufrates yacu uripica, tucuita Mandaj Diosman cushpamari, paicunataca espadahuan huañuchingacuna. Espadaca, paicunapaj yahuarpimari tucui pambaringa.

11Egipto llajtapi causajcunalla, bálsamo aceiteta Galaad llajtamanta apamugrichijlla. Mashna jambicunata apamushpa jambirijpipish, cancunataca manataj alliyachingachu.

12Cancuna pingai tucushcataca, ñami caishuj llajtacunapipish yachaj chayancuna. Shuj soldadoca caishuj soldadohuan tsagmarishpamari, chaillapitaj urmancuna. Chashna llaqui tucujpi cancuna caparirishcaca, tucui cai pachapimari uyarirca” nishpami huillarca.

Nabucodonosorca Egiptopi causajcunahuan macanacushcamanta

13Mandaj Diosca pai ima nishcata huillaj Jeremiastami, Babilonia llajtata jatun mandaj Nabucodonosor shamushpa, Egipto llajtapi causajcunahuan macanacunata huillachun mandarca. Chai shimicunami caipica tiyacun. Paica cashnami huillarca:

14“Egipto llajtapi huillaichigari, Migdol, Menfis, Tafnes shuti pueblocunapi cashna huillashpa yachaj chayachichigari: Allichirishpa shayarichij, cancunapaj muyundijpica ñamari espadahuan tucuchicuncuna.

15Cancunapaj jatun torreca ¿imamantataj urmanri? Mandaj Dios t'angashpa shitajpica, mana sinchita shayashpa urmanllamari.

16Ñaupashpa callpacuj urmajpica, tucuicunami jahuanpi urmancuna. Chaimantaca: Jatariyari, ñucanchij llajtaman callpashunri. Ñucanchijta mishajcunaca espadahuan caticunca, ñucanchij huacharishca llajtaman tigrashunri nishpami caparincuna.

17Chaipica: Egipto llajtata jatun mandaj faraonca manaraj punlla chayajllapi c'ari tucujmari carca, cunanca tucurishcamari nishpapishmi caparircacuna.

18Tucuita Mandaj shuti Jatun Mandajca cashnami nin: Ñuca causaj Diostajmi cashna nini: Tucui urcucunata yalli jatun Tabor urcu shina jatunmi shamunga. Mama cucha uripi ricurij Carmelo urcu shina jatunmi chayamunga.

19Egipto llajtapi causajcunalla, cancunaca prezu rinapajmi tiyacunguichij. Chai punlla apanapajca, p'anguijlla charinacunata ruraichij. Menfis puebloca shitashcamari saquiringa. Tucui urmachishca, shuj runallapish illajmari canga.

20Cunanca Egipto llajtaca, sumaj malta bizi shinamari. Shina cajpipish, janaj llajtamantaca tucuchijmari shamucun.

21Cullquiraicu chai llajtata cuidajcunapish, huirayashca bizicuna shinami. Shina cashpapish paicunata llaquichina punlla chayamujpi, jatun llaquipi cashpaca pi mana shayaringachu. Tucuicunami miticunaman callpangacuna.

22Paicunata p'iñajcunaca yurata urmachijcuna shinami, hachacunahuan shamungacuna. Huaicashpa chashna chayamujpica, culebra shina silbarishpami callpangacuna ninmi.

23Mandaj Diosca cashnapishmi nin: Huañuchinaman shamujcunaca, langosta c'urucuna shina mana yupaipaj, yallitaj achcacunami canga. Paicunami mana pi yaicui tucuipaj jatun sachaman yaicushpa, tucui yuracunata urmachingacuna.

24Chashnami Egipto llajtapi causajcunaca pingai tucungacuna. Janaj llajta runacunapaj maquipimari churashca canga ninmi.

25Tucuita Mandaj, israelcunapaj Diosca cashnami nin: Ñucaca Tebas pueblopi caj Amón shuti diosta llaquichigrini. Faraontapish, pai mandacun Egipto llajtatapish, chaipi causajcunapaj dioscunatapish, paicunapaj jatun mandajcunatapish llaquichigrinimi. Faraontaca, tucui paipi shunguta churajcunandijmi llaquichisha.

26Babilonia llajtata jatun mandaj Nabucodonosormi, paicunata p'iñashpa huañuchingapaj shamunga. Paipaj maquipipish, paita servij mandajcunapaj maquipipish churashpami tucuchisha. Shina cashpapish q'uipataca, ñaupaman shinallatajmi cai llajtapica causangacuna ninmi Mandaj Diosca.

Mandaj Diosca israelcunataca quishpichishami nishcamanta(Jer 30.10-11)

27Jacobopaj huahuacunalla, ama manchaichijchu. Cancunaca ñucata servijcunami canguichij. Israelcunalla, cancunaca ama manchaihuan caichijchu. Ñucamari cancunataca carupi cajpipish quishpichisha. Cancunapaj huahuacunataca, prezu causacun llajtacunamanta tigrachimushami. Chashna tigrachimujpica Jacobopaj huahuacunaca samaringacunami, achca allicunatapishmi charingacuna. Paicunataca pi mana manchachingachu.

28Jacobopaj huahuacunalla, cancunaca ñucata servijcunamari canguichij, ama manchaichijchu. Ñucamari cancunahuan casha. Ñuca llujshichishpa cachajpi, cancunata apashca llajtacunata tucuchishpapish, cancunataca mana tucui chingachishachu. Ashtahuanpish cancunataca llaquichina shinallatami llaquichisha. Shina cashpapish, cancunataca llaquichinatajmi cani ninmi Mandaj Diosca” nircami.