MATEO 16 - Quichua Chimborazo Bible

Milagrota rurachun mañashcami(Mr 8.11-13; Lc 12.54-56)

1Fariseocuna, saduceocuna chayamushpaca, Jesús imapi pandarijpica juchachingapaj nishpami, jahua pachamanta cashpaca milagrota rurashpa ricuchi nircacuna.

2Ashtahuanpish Jesusca cashnami nirca, cancunaca tutayacujpica: “Cieloca pucayashcamari: “Cayaca alli punllami canga” ninguichijmi.

3Tutamantaman cielo pucayashca p'uyu tapashca cajpica: “Cunanca tamyangami” ninguichijmi. ¡Mishqui shimi jayaj shungucuna! Cielo ima shina cajta ricushpa, punlla ima tucunataca yachanguichijmi. Ashtahuanpish cai milagrocunaca ima punllapi cashpa ruraricushcataca mana entendi tucunguichijchu.

4Huahua huahua millaita ruraj huainayajcunaca, shuj señalta rurashpa ricuchichunmi mañancuna. Paicunamanca manataj ricuchishcachu canga. Ashtahuanpish profeta Jonás shina tucushcallatami ricungacuna” nishpaca, paicunata saquishpa rircallami.

Fariseocunapaj levaduramanta cuidaringuichij(Mr 8.14-21)

5Yachacujcunaca cucha ch'imba ladomanmi chayarcacuna. Ashtahuanpish tandata apanataca cungashcacunami carca.

6Jesusca:

–Riquichij, fariseocunapaj, saduceocunapaj levaduramanta huaquichiringuichij– nircami.

7Yachacujcunaca:

–Tandata mana apamushcamantami, chashna nin– nishpami paicunapura rimanacurcacuna.

8Chaita Jesús yachashpami:

–Tandata mana apamushcanchijca nishpa ¿ima nishpataj cancunapura rimanacucunguichij? Ashallata crij runacuna.

9¿Manarajchu entendinguichij? Pichca tandamanta, pichca huaranga runacunaman ñuca carajpi, puchushcata mashna canasta jundata tandashcataca ¿manachu yuyaringuichij?

10Canchis tandamanta chuscu huaranga runacunaman ñuca carajpipish, puchushcataca mashna canasta jundata tandashcataca ¿manachu yuyaringuichij?

11Fariseocunapaj, saduceocunapaj levaduramanta huaquichiringuichij nishpaca, tandata mana apamushcamantaca mana nircanichu. ¿Ima nishpataj manaraj entendinguichij?– nircami.

12Jesús chashna nijpimi, tandata ruranapaj levaduramanta mana rimacushcata, ashtahuanpish fariseocunapaj, saduceocunapaj yachachinata mana chasquina cashcata nicushcata entendircacuna.

Pedroca Jesustaca Quishpichij Cristomi cangui nishcami(Mr 8.27-30; Lc 9.18-21)

13Filipo callarichishca Cesarea puebloman Jesús chayacushpami, paipaj yachacujcunataca:

–Runa Aichayujtaca gentecunaca ¿pi cashcatataj yuyancuna?– nishpa tapurca.

14Paicunaca:

–Shujcunaca, Bautizaj Juanmi. Caishujcunaca, Eliasmi. Chaishujcunaca Jeremiasmi, mana cashpaca ñaupa profetacunamanta maijantajshimari yuyachin nincunami– nircacunami.

15Jesusca paicunataca:

–Cancunaca ñucataca ¿pi cashcatataj yuyanguichij?– nijpi,

16Simón Pedroca:

–Canca causaj Diospaj Churi, Cristomari cangui– nirca.

17Shina nijpi Jesusca:

–Jonaspaj churi Simón, chaitaca mana aichayuj, yahuaryuj runachu ricuchishca, ashtahuanpish jahua pachapi caj ñuca Yayami ricuchishca. Chaimanta cushichishcami cangui.

18Ñucapish cantaca Pedromi cangui ninimi. Cai rumi jahuapimi, tandanacushca crijcunataca shayachisha. Hadespaj pungucunapish mana mishai tucungachu.

19Canmanca, jahua pachamanta mandacunpaj llavecunatami cusha. Maijanta cai pachapi can huatajpica, jahua pachapipish huatashcami canga. Maijanta cai pachapi can cacharijpica, jahua pachapipish cacharishcami canga– nircami.

20Chaipimi paipaj yachacujcunataca, Jesusca, Jesusmari Quishpichij Cristoca nishpa pajta piman ninguichijman nirca.

Jesusca pai huañuna cashcata huillashcami(Mr 8.31–9.1; Lc 9.22-27)

21Chashna nishca pachamantami Jesusca, paipaj yachacujcunamanca cashna nishpa huillai callarirca: “Jerusalenmanca rinatajmi cani. Chaipica ancianocunapaj, curacunata mandajcunapaj, mandashcacunata quillcajcunapaj maquipi achca llaquita apashpa huañunami cani. Quimsa punllapica causarishcami cana cani” nircami.

22Jesús chashna nijpi Pedroca, paillata cayashpami:

–Amito, ashtahuanpish can quiquinta llaqui. Chashna tucunataca Dios ama munachun– nishpami ama chashna yuyachun jarcasha nirca.

23Ashtahuanpish Jesusca tigrarishcahuanmi Pedrotaca:

–¡Ñuca ñaupajmanta anchui, Satanás! Ñuca ñitcanami tucungui. Dios imata pajtachisha nicushcataca mana entendi tucunguichu. Ashtahuanpish runacunapaj yuyaillatami entendi tucungui– nircami.

24Chaipimi Jesusca, paipaj yachacujcunataca cashna nirca:

–Maijanpish ñucata catisha nijca, quiquin causaita ama llaquichun. Chacatashca shina llaquita apana tucushpa ñucata catichun.

25Pipish quiquin causaita quishpichisha nijca, chingaringami. Pipish ñucata catishcamanta quiquin causaita chingachijca huiñai causaitami japinga.

26Runaca cai pachapi tucui tiyajcunata japishpapish, paipaj almata chingachishpaca ¿ima allitaj cangari? Paipaj almata quishpichingapajca ¿imatashi cunga?

27Runa Aichayujca, paipaj angelcunandij, paipaj Yayapaj achij nicuj sumaj cashcahuan shamushpaca, cada quiquinmanmi paicuna rurashca shinallataj cunga.

28Runa Aichayuj tucushca mandangapaj shamucujta ricungacama, maijan caipi cajcunaca manaraj huañungacunachu. Chashnatajmi canga– nircami.