ÉXODO 7 - Quichua Chimborazo Bible

1Chaimi Mandaj Diosca Moisestaca:

–Riqui, cantaca ñucapaj randimi faraonpaj ñaupajpi churani. Can imalla nishcataca cambaj huauqui Aaronmi huillanga.

2Tucui imalla ñuca mandashcataca Aaronmanca canmi huillangui. Israelcunata paipaj llajtamanta richun saquichunca cambaj huauqui Aaronmi faraonhuanca rimanga.

3Ashtahuanpish faraonpaj shungutaca ñucami sinchiyachisha. Ñucallatajmi Egiptopica, milagrocunatapish, jatun mancharinacunatapish ashtahuan mirachisha.

4Chaipipish faraonca cancunataca mana uyangachu. Ashtahuanpish Egipto llajta jahuapi ñuca maquita churashpa yallitaj llaquichishpami, ñuca agllashca israelcunataca soldadocunata shina cada mirgapi churashpa Egiptomantaca llujshichimusha.

5Egipto llajta jahuapi ñuca maquita chutashpa paicunapaj chaupimanta israelcunata llujshichijpimi, egipciocunaca ñucataca Mandaj Dios cashcata yachangacuna– nircami.

6Moisespish, Aaronpish Mandaj Dios paicunata ima shinalla mandashca shinami tucuita rurarcacuna.

7Faraonhuan rimacui punllacunapica, Moisesca pusaj chunga huatata, Aaronca pusaj chunga quimsa huatatami charirca.

Aaronpaj caspimi

8Mandaj Diosca Moisestapish, Aarontapish:

9–Faraón: Shuj milagrota rurashpa ricuchi nijpica, Aarontaca: Culebra tucuchun cambaj caspita japishpa faraonpaj ñaupajpi shitai ningui– nircami.

10Moisespish, Aaronpish faraonpajman rishpaca, Mandaj Dios mandashca shinallatajmi rurarcacuna. Aaronca paipaj caspitaca faraonpaj, paipajta rurajcunapaj ñaupajpi shitajpimi, chai caspica culebra tucurca.

11Chaimi faraonca Egiptopi caj adivinocunata, brujocunata tandachichun cachajpi paicuna shamushpaca brujocuna rurana cashcata rurashpa Moisespish, Aaronpish milagrota rurashca shinallataj rurarcacuna.

12Paicunapaj caspicunata pambapi shitajpica, chai caspicunapish culebracuna tucurcallami. Ashtahuanpish Aaronpaj caspica, paicunapaj caspicunatami millpurca.

13Ashtahuanpish faraonpaj shunguca Mandaj Dios nishca shinallataj rumi tucushpami mana uyasha nirca.

Yacuta yahuarman tigrachishcami

14Chai q'uipami Mandaj Diosca, Moisestaca:

–Faraonca sinchi shungu tucushpami, israelcuna rishun nijpica mana saquisha nin.

15Cayandij tutamantaca faraonpajman ri. Pai jatun yacuman shamucujpica canca culebra tucushca cambaj caspita apashpa chai yacu uripi tupashpa,

16paitaca: Mandaj Dios hebreocunapaj Taita Diosmi ñucataca cambajman cashna nichun cachan: Ñuca agllashcacuna shitashca pambapi ñucapajta ruranaman richun saqui. Ashtahuanpish canca cunancama manamari uyanguichu.

17Mandaj Diosca: Mandaj Diostaj ñuca cashcataca caita ricushpami rijsingui ninmi: Chaimanta cunan ñuca maquipi charicun caspihuan jatun yacupi huajtajpica, chai yacuca yahuarmi tucunga.

18Chai jatun yacupi tiyaj chalhuacunaca huañungami. Chai yacupish ashnacujmi tucunga. Chaimi egipciocunaca millanachishpa chai yacutaca mana ubyangacuna ninmi– nircami.

19Mandaj Diosca, Moisestaca cashnapishmi nirca:

–Aarontaca: Egiptopica jatun yacupish, huaicuta rij yacupish, tandashca tanque yacupish, maillapi yacuta tandashcacunapish, caspimanta, rumimanta rurashcacunapi tiyaj yacucunapish yahuar tucushpa Egipto llajtapica, yahuarhuan junda cachun cambaj caspita japishpa tucui chai yacucuna jahuata chutai ni– nircami.

20Moisespish, Aaronpish Mandaj Dios nishca shinallatajmi rurarcacuna. Aaronca pai charicushca caspihuan faraonpaj, faraonpajta rurajcunapaj ñaupajpi jatun yacuta huajtajpica, tucui chai yacucunami yahuar tucurca.

21Chai jatun yacupi tiyaj chalhuacunapish huañujpi, yacupish yallitaj ashnacuj tucujpimi egipciocunaca mana ubyai tucurcacuna. Egiptopica tucui llajtapimi yahuar tucurca.

22Shinallataj Egipto llajta brujocunapish, brujocuna rurana cashca shina rurashpaca, Moiseshuan, Aaronhuan milagrota ruraj shinallatajmi rurarcacuna. Chaimi faraonpaj shunguca Mandaj Dios nishca shinallataj rumi tucushpa mana uyarca.

23Moisespish Aaronpish milagrocunata rurashcaca, faraonpajca ima mana cashca shina cajpimi paipaj huasiman rircalla.

24Chai jatun yacumantaca mana ubyai tucushpami, egipciocunaca tucuicuna yacuta ubyangapajca jatun yacu urindijta pugyucunata allarcacuna.

25Mandaj Dios jatun yacuta yahuarman tigrachishcaca canchis punllacunami tucurca.