1Yachaica pai causanapajca, sumajta
labrashca canchis pilarcunahuanmi
huasita shayachirca.
2Jatun micuipajca, animalcunata huañuchircami.
Mezatapish sumajta allichishpami,
vinotapish chagrushpa churarca.
3-4Chaimantaca paipaj huiñachishcacunatami,
pueblo muyundij ashtahuan jatun pircacuna
jahuamanta cashna caparichun cacharca:
“Yachai illajcunapish, alli yuyaita
mana charijcunapish caiman shamuichij.
5Cancunapaj ñuca allichishca micunata
micuj shamuichij.
Ñuca sumajta chagrushca vinota ubyaj shamuichij.
6Yachai illaj canataca ña saquichigari.
Alli yuyaita japishpa, sumajta causana
ñanpi yaicuichij” nishpami caparincuna.
7Mana cazushpa asijta alli tucuchun
rimajca, pingai tucungapajllami riman.
Diosta mana manchajcunata jarcajca,
mapayangapajllami jarcan.
8Ama p'iñai tucungapajca, mana
cazushpa asijtaca, alli tucui nishpa
ama rimanguichu.
Ashtahuanpish yachaisapa runa pandaricujpi,
paita jarcangui.
Paica canta c'uyangamari.
Yachajman yuyaita cui, paica ashtahuan
yachajmi tucunga.
9Yachaisapa runata yachachijpica,
ashtahuanmari yachaj tucunga.
Cashcata rurajman yachachiyari,
paica ashtahuanmari yachanga.
10Alli yachaipaj callarica,
Mandaj Diosta manchanami.
Ima jucha illaj Diosta rijsinaca,
alli yuyaimi.
11Ñuca yachachishcata yuyaipi
charishpami, unita causangui.
Uni huatacunahuanmi cambaj causaica miranga.
12Can allita yachashcaca, cambaj
allipajllatajmi.
Mana cazushpa asishpapish,
canllatajmi llaqui tucungui.
13Ch'ahuanyashca huarmica shimi cacharishca,
yachai illaj upa huarmimi.
14Paipaj huasica tucuicuna ricunallapimi.
Chai huasi pungupimi shuj sumaj
tiyanapi tiyarin.
15Chaipimi imata mana yuyashpa,
ñanta alli ricujcunata cayashpa tiyan.
16Yachai illajcunataca: “Caiman
shamuichij” ninmi.
Alli yuyaita mana charijcunataca:
17“Shuhuashca yacuca mishquimari,
pacallapi tandata micunaca manataj
amipajmari” ninmi.
18Ashtahuanpish chaiman rishcamanta,
taucacuna huañushcataca mana yachancunachu.
Pai cayashcacunaca, Seol ucupimi.
Who We AreWhat We EelieveWhat We Do
2025 by iamachristian.org,Inc All rights reserved.
