1Taita Dioslla, ñuca mañashcata uyahuai.
Ñuca rogaricujpica, ama paca tucuhuaichu.
2Uyahuayari, cutichihuayari.
Llaquihuan cashpamari tucui yuyaihuan caparishpa mañani.
3Ñucata p'iñaj rimajpi,
Diosta mana rijsij llaquichijpimari mañapani.
Millaita rurashcacunataca ñucamanmari apachishca.
Huañuchina yuyaihuanmari catirancuna.
4Ñuca shunguca nanaihuanmari.
Huañuna manchaimari ñucataca japishca.
5Manchaihuan cana, chujchuihuan canamari ñuca jahuaman shamushca.
Yallitaj manchaimari ñucataca pilluchishca.
6Chaimi ñucaca: “¡Palomapaj alasta shina maijan ñucaman cujpica, jatarishpa rishpami maipi samarigriman!
7Mai carumanchari miticushpa riman.
Shitashca pambapichari causaiman. Selah
8Jatun acapana shina, yallitaj huairandij tamya shina caticujcunamantaca utcachari miticuiman” ninimi.
9Jatun Dioslla, chingachihuayari.
Paicunapaj rimaicunataca ch'ican ch'icanta rurayari.
Pueblopica llaquichinacui, c'aminacuillatami ricuni.
10Paicunapaj muyundij pirca jahuapica tutai punllami, chapashpa muyuncuna.
Chai pueblopica yallitaj millai, maita mana causaipaj llaquimi tiyan.
11Millaita ruranami paicunapaj chaupipica tiyan.
Umana, shujtajcunata llaquichinaca paicunapaj plazacunapica mana illanchu.
12Ñucataca manapish p'iñajmari llaquichicun.
P'iñaj runa llaquichicujpica, llaquita apaimanllami.
Ñucata mana ricunachij llaquichingapaj jatarishca cajpica, paimantaca miticuimanllami.
13Ashtahuanpish ricuipica can ñucahuan alli apanacujllataj, ñucahuan ishqui purijllataj, ñuca huasi ucupurallataj,
14pi mana yachaipaj cashcatapish sumajta ishquilla parlanacujllataj,
Taita Diospaj huasipipish ñucahuan tandalla sumajta purijllatajmari llaquichicungui.
15Paicunapaj huasicunapi, paicunapaj chaupipica millaimi junda.
Paicunataca huañuica cungaimanta japishca cachun.
Seolmanca causajraj uriyachuncuna.
16Ashtahuanpish ñucaca, Taita Diostamari caparisha.
Mandaj Diosmari ñucataca quishpichinga.
17Chishipish, tutamantapish, chaupi punllapish, mañashami, caparishami.
Paica ñuca
caparishcata uyangami.
18Ñucata p'iñajcunahuan macanacuipica paimari sumaj causaihuan quishpichinga.
Ñucata p'iñajcuna achcacuna cajpipish paimari quishpichinga.
19Ñaupa punllacunamanta huiñaicama causacuj Taita Diosca uyashpa paicunataca utcami llaquichinga.
Paicunallataj Taita Diosman mana cutirishcamanta, paita mana manchashcamantami
chashna ruranga. Selah
20Millai runaca, paillahuantaj sumajta causacujcunata llaquichingapajmi paipaj maquita chutan.
Ari ninacushcatapish
p'aquinmi.
21Pai rimashcacunaca mantequilla shina sumaj cashpapish, paipaj shungupica macanacuna yuyaillami tiyan.
Rimashcacunaca aceitetapish yalli sumajtami nuyuchin.
Ashtahuanpish paica lluchulla espada shinami.
22Cambaj llaquitaca, Mandaj Diosman apachi.
Paica canta charirangami.
Cashcata rurajtaca, llaquita apacuchunllaca mana saquingachu.
23Taita Dioslla, paicunataca chingarinapaj caj jutcuman shitangui.
Huañuchijcuna, umajcunaca paicunapaj chaupi causaillamanpish mana chayangacunachu.
Ashtahuanpish ñucaca quiquinpimari
shunguta churani.
Who We AreWhat We EelieveWhat We Do
2025 by iamachristian.org,Inc All rights reserved.
