1Jatun Dioslla, ñucataca huaquichihuayari.
Canpimari shunguta churani.
2Ñuca almalla, Mandaj Diostaca cashnami nircangui:
“Canca ñucata Mandajmi cangui, can illajllaca ñucapajca ima alli mana tiyanchu”.
3Cai allpapi caj dioscunaca imatapish rurai tucunmi nincunami.
Ñucaca cashcata rurajcunahuan cashpami cushicuni.
4Shujtaj diosta adorangapaj callpashpa, chai dioscunapajta rurashcamantaca nanaicunami jahuanpi shamunga.
Ñucaca chai diosmanca mana ima animalpaj yahuarta cushpa tallishachu.
Chaicunaca diosmi ninatapish manataj nishachu.
5Mandaj Dioslla canmantami tucuita charini.
Canmi ñuca cushicuna cangui.
Ñuca causaipish tucui imapish cambaj maquipimari.
6Ñuca japina cashcata cungapaj cordelta shitajpica alli allpallatami rirca.
Ñuca japina cashcaca tucuimanta yalli allimari urmashca.
7Ñucata cunaj Mandaj Diostaca alli nicushallami.
Tuta cajpipish ñuca yuyaita yachachicunguillami.
8Ñucaca tucui imapipish Mandaj Diostami puntapi churani.
Chaimanta pai ñuca alli ladopi cajpi, pi mana cuyuchingachu.
9Chaimantami ñuca shunguhuan cushicuni, ñuca almahuan cushicuni.
Ñuca cuerpopish ima manchai illajlla samaringallami.
10Ñuca almataca Seolpica mana saquinguichu.
Cambajlla caj ñuca aicha ismuchunpish mana saquinguichu.
11Ñucamanca causaiman apaj ñantami ricuchingui.
Cambaj alli ladopica huiñaita sumajmari.
Cambaj ñaupajpica cushicucunallami canga.
Who We AreWhat We EelieveWhat We Do
2025 by iamachristian.org,Inc All rights reserved.
