1Ña chai cuchata ch'imbashpaca, gadarenocunapaj llajtamanmi chayarcacuna.
2Barcomanta Jesús llujshincami, mapa espíritu japishca shuj runaca Jesusta tupanaman shamurca. Paica panteonmantami llujshishpa shamurca.
3Paica panteonllapimi causaj carca. Cadenacunahuanpish paitaca pi mana huatai tucurcacunachu.
4Tauca cutinmi grillo nishca fierrohuan canichishpa, cadenacunahuanpish huatajcuna carca. Ashtahuanpish cadenacunata, canichishca fierrotapish ñutushpa shitajlla cajpimi, pi mana huatashpa churai tucurcacuna.
5Chai runaca punllapish tutapish urcucunata, panteoncunatami caparirishpa, paillataj rumicunahuan chugririshpa puricujlla carca.
6Jesustaca carumanta ricushcahuan callpashpa shamushpa paipaj ñaupajpi cungurishpaca,
7shinchita caparishpami:
–Jahua pachapi caj Taita Diospaj Churi Jesús ¿imatataj nij shamungui? Taita Diospaj shutipimi rogani. ¡Ñucataca ama llaquichipaichu!– nirca.
8“Mapa espíritu, cai runamanta llujshi” nicujpimi chashnaca nirca.
9Chai runataca Jesusca:
–¿Ima shutitaj cangui?– nishpa tapujpica:
–Achcacuna cashcamanta, Legión shutimi cani– nircami.
10Cai llajtamantaca ama llujshichishpa cachahuaichu nishpami achcata rogarirca.
11Chai urcu c'uchullapimi, canlla cuchicuna puricurcacuna.
12Chaimi supaicunaca:
–Chai cuchicunaman yaicungapaj richun saquihuai– nircacuna.
13Paicuna rogarijpica Jesusca richun saquircallami. Chai mapa espiritucunaca, llujshishcahuan c'uchicunapimi yaicugrircacuna. C'uchicunaca ishqui huaranga shinami carca. Chai canlla cuchicunaca, c'aca quinrita singushpami cuchaman huashicushpa yacupi chingarircacuna.
14Cuchicunata michijcunaca achcata mancharishpa pueblocunaman llajtacunaman callpashpa rishpami tucui imalla tucushcata huillarcacuna. Chaita uyajcunaca ima tucushcata ricungapajmi shamurcacuna.
15Paicuna Jesuspajman chayashpaca, legión nishca supaicunata llujshichishca runataca, sano yuyaiyuj, churanacunatapish churarishca tiyacujta ricushpaca, achcatami mancharircacuna.
16Chai runamanta supaicunata llujshichishcatapish, supaicunaca cuchicunaman yaicujpi cuchicuna imalla tucushcatapish ricujcunami tucuita parlarcacuna.
17Chaita uyashpami, ricunaman shamujcunaca ñucanchij llajtamantaca llujshishpa ripai nircacuna.
18Barcopi Jesús yaicugrijpimi, supai japishca cashca runaca, ñucatapish canhuan pushahuai nishpa rogarirca.
19Ashtahuanpish Jesusca chai runata mana pushasha nishpami:
–Cambaj huasiman rilla. Jatun Dios canta achcata c'uyashpa alliyachishcata cambaj familiacunaman tucuita parlagri– nirca.
20Pai rishpaca Decápolis llajtacunapimi Taita Dios paita c'uyashpa imallata rurashcata parlarca. Chaita huillajpica, tucuicunami mancharircacuna.
Jairopaj ushushimanta yahuar cacharirishca huarmimanta(Mt 9.18-26; Lc 8.40-56)21Jesusca barcopi rishpaca chaishuj lado cucha urillamantajmi cutin tigrarca. Achcacuna shamushpa paipaj muyundijta shayarijpimi, chai cucha urillapitaj Jesusca saquirijpi,
22sinagogapi pushaj Jairo shuti runa shamurca. Ña Jesusta ricushpaca, paipaj chaquiman cumurishpami:
23–Ñuca ushushimi ñalla huañugrin. Pai causachun paipaj jahuapi maquita churashpa alliyachinaman jacupai– nishpa achcata rogarca.
24Chai runahuan Jesús ricujpica, achcacunami llapirinacushpa caticurcacuna.
25Chaicunapurapica chunga ishqui huatata yahuar cacharirijpi llaquita apacuj shuj huarmipishmi carca.
26Paica jambij doctorcunapajman rishpapish manataj alliyashpami, tucui charishcacunallata tucuchishpa ashtahuan anchayacushcalla carca.
27Jesusmanta parlanacujta uyashpaca, chai tucuicunapaj chaupita rishpami huashamanta Jesuspaj churana puntapi tuparirca.
28Paica: Churana puntapi tuparishpalla alliyanata yuyacushcamantami,
29churana puntapi tuparinca yahuar cachariricushcaca chaquirircalla. Paipaj cuerpotaca llaquichicuj ungüimanta ña alliyachishcatami yacharca.
30Chai q'uipami Jesusca, paipaj alliyachina poder paimanta llujshishcata yachashpa tucuicunapajman tigrarishpaca:
–¿Pitaj ñuca churanapi tuparinchu imamí?– nishpa tapujpi,
31paipaj yachacujcunaca:
–Cai tucui caticujcuna tandarinacushpa llapirinacucujta ricushca jahuachu: “¿Pitaj ñuca churanapi tuparinchu imamí?” nishpa tapungui– nircacuna.
32Ashtahuanpish maijan tuparishcata ricungapajmi, paipaj muyundijpi cajcunata ricucurca.
33Chai huarmica paipi imalla tucushcata yachashcamanta, manchaihuan chujchushpa Jesuspajman shamushpami paipaj ñaupajpi cungurishpa cumurishpaca, ima shina tucushcata tucuita huillarca.
34Chaimi Jesusca:
–Huahua, canca crishcamantami alliyachishca cangui. Sumajta causagrilla, cunanca alliyashcami saquiringui– nirca.
35Jesús rimacujpirajmi, sinagogapi pushajpaj huasimanta maijancuna shamushpaca:
–Cambaj ushushica ñami huañun. Yachachijtaca ama ashtahuan p'iñachichu saquilla– nircacuna.
36Chaita Jesús uyashpami, sinagogapi pushajtaca:
–Ama manchaichu, crinallami cangui– nirca.
37Chaimanta rishpaca pita mana pushasha nishpami, Pedrota, Jacobota, Jacobopaj huauqui Juanllata pushashpa rirca.
38Sinagogapi pushajpaj huasiman Jesús chayashpaca, achcata llaquirishpa yallitaj huacashpa bullacujtami ricurca.
39Huasiman yaicushpaca:
–¿Imamantataj yallitaj bullashpa huacacunguichij? Huambraca mana huañushcachu, ashtahuanpish dormicunllami– nircami.
40Chaipi cajcunaca asircacunami. Jesusca chaipi cajcunataca tucuicunata canllaman llujshichishpami, chai huambrapaj yayandij mamandij, paihuan rijcunandijlla huambra maipi cashcaman yaicurcacuna.
41Chaipica huambrapaj maquimanta japishpami:
–¡Talita cumi!– nirca. (Chashna nishcaca: “Huambra, cantami jatari nini” nisha ninmi).
42Jesús chashna nincami, chunga ishqui huatata charij huambraca, jatarishcahuan purirca. Chaita ricujcunaca yallitajmi mancharircacuna.
43Chai q'uipaca Jesusca caitaca pajta piman huillanguichijman nishpaca huambramanca micunata caraichij nishpami mandarca.
Who We AreWhat We EelieveWhat We Do
2025 by iamachristian.org,Inc All rights reserved.
