PROVERBIOS 5 - Quichua Chimborazo Bible

Ama huainayachun cunashcamanta

1Ñuca huahualla, ñuca alli yachaitaca

yuyaita churashpataj uyairi.

Ñuca alli yuyaita cushcaman

cambaj rinrinta mañachiyari.

2Chashnami ñuca cunashcataca huaquichingui.

Cambaj shimihuanpish alli yachanatami

rimangui.

3Shujtaj huarmica mishquijlla

shimicunahuan inquitajmi.

Pai rimashcaca aceitetapish yalli

llambujllami.

4Ashtahuanpish q'uipataca ajenjotapish

yalli jayajmi.

Ishqui filo espadatapish yalli chugrichijmi.

5Paipaj chaquica huañuimanmi uriyacun,

Seolmanmi chayagricun.

6Paica mana shuj ñanllapi purinchu.

Causaiman rina ñanpi mana yuyaita

churashpaca, paipaj causai chashna

cajtaca mana ricunguichu.

7Cunanca ñucata uyaichij, huahuacuna.

Ñuca shimihuan yachachishcataca,

amataj cungarichijchu.

8Chai huarmipajmanca amataj ringuichu.

Pai causacun huasi pungullamanpish

amataj c'uchuyanguichu.

9Chashnaca canta alli nishca canatapish

achca huatacunata trabajashpa

japishcatapish, mana yangamanta millaita

rurajcunaman cunguichu.

10Ñataj shujtajcunata cushichingapajlla

cambaj fuerzata tucuchinguiman.

Cambaj trabajohuan japishcataca,

shujtajpaj huasillapi jundachinguiman.

11Mana uyashpaca, q'uipata cambaj

aicha urmarimujpimi, aij nishpa

shaicujta huacacungui.

12Llaqui japijllapi cashna nicunguiman:

“Ñucallatajmi cunashcataca p'iñashpa,

mana chasquircani.

Jarcashcatapish ñuca shungupica, yanga

cashcatami yuyarcani.

13Yachachijcuna mashnata yachachishpa

cunajpipish, ñucallatajmi mana uyarcani.

Ñucallatajmi mana yuyaita churarcani.

14Ñuca llajtapi causajcunapaj chaupipi,

tandanacushcacunapaj chaupipimari cashna

tucui laya llaqui tucuni” nishpa

llaquiricunguiman.

15Cambaj quiquin pugyullamanta

yacuta ubyangui.

Cambaj pugyu yacullahuan yacunaita

parachingui.

16Cambaj pugyumanta llujshicuj yacutaca,

japishcahuan mai ñancunapi,

plaza pambacunapi ¿jichanguimanllachu imatagari?

17Pugyupish yacupish cambajllami,

amataj shujtajcunapajpish cachun.

18Cambaj pugyullata alli ningui,

huambraraj cashpa cazarashca quiquin

huarmillahuan cushicungui.

19Paica c'uyanajlla llambunajlla sumaj

taruga shina cashca cachun.

Paipaj c'uyaihuanca pilluchishca shina

cambaj tucui causaipi cushichichun.

Paillahuan ugllarinacushpa cushicungui.

20Ñuca huahualla, imamanta mana shujtaj

huarmihuanca churarinachu cangui.

Ñahui mana ricuj shinaca, shujtaj

huarmipaj chuchutaca ama ugllaringuichu.

21Mandaj Diosca ima shina causacujtaca,

tucuicunata ricuracunmi.

Imata rurashpa puricujtapish, paipaj

ñahuica manataj chingachinchu.

22Diosta mana manchaj runataca, pai

millaita rurashcallatajmi llaquipi

urmachin.

Quiquin juchacunallatajmi allita

huatashpa charicun.

23Alli tucuchun rimashcata mana

uyashcamantami huañunga.

Yuyai illaj shina ima millaitapish

rurashcamantami chingaringa.