GÉNESIS 44 - Quichua Chimborazo Bible

Josepaj copata Benjaminpaj costalpi japishcami

1Chai q'uipami, Joseca paipaj mayordomotaca:

–Cai runacunapaj costalcunapica, mashnata apashcata tucui costalcunapi trigota jundachi. Trigomanta pagashca cullquitapish tucuicunapaj costal shimipi churangui.

2Tucuicunapaj q'uipa huauquipaj costal shimipica ñuca cullqui copata, trigomanta pagashca cullquindij churangui– nijpica, chai mayordomoca José mandashca shinallatajmi rurarca.

3Cayandij tutamantaca Josepaj huauquicunaca caya minchacama nijpica paicunapaj burrocunandij rircallacunami.

4Paicunaca ñami pueblomanta llujshishcacuna carca. Shina cajpipish manaraj achcata caruyajpimi, Joseca paipaj mayordomotaca cashna nirca:

–Chai runacunata catishpa ri. Paicunata cati japishpaca cashna ningui: Cancunapaj allita rurashca jahuamari ñucataca cashna mana allita ruramunguichij. ¿Ima nishpataj ñuca amopaj cullqui copata shuhuamunguichigari?

5Ñuca amoca chai copapimi ubyaj carca. Adivinangapajpishmari chai copataca charirca. ¡Chai copata shuhuamushpamari, jatun mana allita ruramushcanguichij! ningui– nircami.

6Shina nijpi Josepaj mayordomo rishpa cati japishpaca, José imallata nishca shinallatajmi nirca.

7Chaimi paicunaca:

–Ñucanchij amitolla ¿ima nishpataj ñucanchijtaca chashna nihuanguiyari? Cambajta ruraj ñucanchijca manataj chashna rurajcuna canchijchu.

8Ñucanchij costal shimicunapi japishca cullquicunatapish, Canaanmanta apamushpami canllamantaj tigrachircanchij. Chashna cushca jahuaca ¿maitataj cambaj amopaj huasimantaca cullquitapish, curitapish shuhuamunchijman carcari?

9Cambajta ruraj maijanpajpi chai copata japishpaca huañuchihuanguilla. Ñucanchijpish tucuicunami cambajta rurajcuna tucushun– nircacuna.

10Chaimi mayordomoca:

–Cancuna nishcapish allitajmari, shina cajpipish maijan chai copata charicujllami ñucapajta ruraj canga. Caishujcunaca ima juchachina illajllami saquiringuichij– nirca.

11Shina nijpimi, tucuicuna paicunapaj costalcunata uricuchishcahuan cada quiquin pascarcacuna.

12Chaimi mayordomoca punta huauquipaj costalmanta callarishpa mashcashpaca, tucuicunapaj q'uipa huauqui Benjaminpaj costalpi chai copataca japirca.

13Chaimi paicunaca achcata llaquirishpa paicunapaj churanacunata lliquirircacuna. Chai q'uipaca burrocunaman costal granocunata apachishpami, chai puebloman cutinllataj tigrarcacuna.

14Judaca paipaj huauquicunandijmi, Josepaj huasiman yaicurca. Paicuna chayanapajca, Joseca chaipiraj cajpimi, paicunaca Josepaj ñaupajpi pambaman tupajta cumurircacuna.

15Chaimi Joseca paicunataca:

–¿Ima ruranatataj rurashcanguichijchu, imamí? Ñuca shina mandajca imatapish yachai tucuj cashcataca ¿manachu yacharcanguichij?– nirca.

16Shina nijpimi Judaca:

–Ñucanchij amo quiquintaca ¿imatataj nishunri? ¿Ima shinataj mana juchachinayujca ricurishunri? Cambajta ruraj ñucanchij mana alli cashcataca, Taita Diosmi ricuchin. Cunanca ñucanchijpish, copata apacujpish cambajta rurangapaj cambaj maquipimi canchij– nircami.

17Chaimi Joseca:

–Maitataj chaitaca rurashari. Maijanmi copata apacushpa japi tucurca chaillami ñucapajta ruraj canga. Caishujcunaca ima manchai illajlla cancunapaj yayapajman tigraichijlla– nirca.

Judaca Benjaminta cacharichun Joseta rogashcami

18Judaca Josepajman c'uchuyashpami:

–¡Aij, ñuca amitolla!, canca faraón shinallatajmari cangui. Cambajta ruraj ñucami, can amitollahuan parlasha nini. Cambajta ruraj ñucahuanca nina sindirij shinaca amataj p'iñaripangui.

19Can ñuca amitomi cambajta ruraj ñucanchijtaca: ¿Cancunaca yayata charinguichijchu, mana cashpaca shujtaj huauquita charinguichijchu? nishpa tapurcangui.

20Chaimi ñucanchijca can ñucanchij amomanca: Yayatapish charinchijmi. Paica ña yuyajmi. Ñucanchij yaya ña yuyaj cajpi huacharishca, tucui ñucanchijpaj q'uipa huauquitapish charinchijmi. Paipaj quiquin mamamanta shuj huauquica ñami huañurca. Chaimanta pailla cajpi yayaca, paitaca achcatami c'uyan nircanchijmi.

21Chaimi cambajta ruraj ñucanchijtaca: Ñuca paita ricungapaj pushamugrichij nircangui.

22Chaimi ñucanchijca can ñucanchij amotaca: Paica yayata saquishpaca, mana shamui tucunchu. Pai shamujpica yayaca huañungamari nircanchij.

23Shina nijpipish cambajta ruraj ñucanchijtaca: Tucuicunapaj q'uipa huauqui cancunahuan mana shamujpica, ñuca ñahuipica amataj ricuringuichij nircanguimari.

24Chaimi ñucanchij yayapajman chayashpaca, can ñucanchij amo imalla nishcata tucuita parlarcanchij.

25Ñucanchij yayaca: “Granocunata randinaman cutinllataj richij” nircami.

26Chaimi ñucanchijca ñucanchij yayamanca: Ñucanchij q'uipa huauqui Benjamín ñucanchijhuan mana rijpica mana rishunchu. Paita mana pushashpaca, chai amopica mana ricurigri tucunchijchu nircanchij.

27Chaimi cambajta ruraj ñucanchij yayaca: Ñuca huarmi Raquelhuanca ishqui churicunallata charishcataca cancunallataj yachanguichijmi.

28Shuj churica ñuca ñaupajmanta rishpa chingarijpi cunancama mana ricushpami paitaca sacha animalcunami ñutushpa micushca canga yuyani.

29Cunanpish Benjaminta cancuna pushashpa ricujpi ima llaquipish tucujpica, ñucaca yuyaj cashcamanta seolman utca rijpica cancunapaj jahuami canga nircami.

30Cunanca cambajta ruraj ñuca yayapajman tigrajpi Benjamín mana ñucahuan chayajpica, paica Benjaminhuan yallitaj amañado cashcamanta,

31Benjaminta mana ricushpaca huañungamari. Cambajta ruraj ñucanchij yaya ña yuyaj cashcamanta Benjaminmanta llaquirishpa seolman utca rijpica, cambajta ruraj ñucanchijpaj jahuamari canga.

32Ñuca yayapaj ñaupajmantaca Benjamintaca cambajta ruraj ñucamari cashna nishpa pushamurcani: Benjamintaca ñucatajca tigrachimushatajmi. Paita mana tigrachimushpaca, cambaj ñaupajpica tucui causaipimi juchachishca casha nircanimi.

33Chaimanta Benjaminpaj randi ñucanchij amo cambajta rurachunca ñucata saquichishpa, Benjamintaca huauquicunahuan tigrachishpa cachachunmi rogapani.

34Ñucaca ñuca yayapajmanca Benjamín illajllaca maitataj tigrashari. Ñuca huauqui illajlla tigrajpi ñuca yaya llaquinayaj tucujtaca mana ricugrisha ninica– nircami.