1Ñuca almaca Taita Diosllapimi samarin.
Ñuca quishpirinaca Taita Diosmantami shamun.
2Ñuca jatun rumica paillamari.
Ñucata quishpichijca paillamari.
Paica ñuca paca tucunamari.
Ñucaca lluchcarishpapish mana urmashachu.
3¿Maicamataj shuj runata llaquichingapaj tandanacushpa jataringuichigari?
Llapina yuyaillamari tandanacunguichij. Huishtu pata, urmanalla pirca urmaj shinamari llapina yuyailla puricunguichij.
4Jatun canamanta urmachingapajllami tandanacushpa jatarincuna.
Llullatami c'uyancuna.
Shimihuanca allimi cangui nijtucuncunami.
Ashtahuanpish shungupica,
llaqui tucushca canman nincunami. Selah
5Ñuca almaca Taita Diosllapimi samarin.
Pai yuyailla canaca Taita Diosmantami shamun.
6Ñuca jatun rumica paillamari.
Ñucata quishpichijca paillamari.
Paica ñuca miticunami mana lluchcarishachu.
7Ñuca quishpirinaca Taita Diospimi.
Ñuca jatunyanaca Taita Diospimi.
Ñuca paca tucuna sinchi rumica Taita Diospimi.
Ñuca miticunaca Taita Diospimi.
8Gentecuna, paillapi shunguta churaichigari.
Tucui causaipi paillata shuyaichigari.
Tucui shunguhuan paipaj ñaupajpi mañaichigari.
Taita Diosca ñucanchij paca tucunamari. Selah
9Alli yuyarijpica huañujlla runacunaca huaira shinallami.
Charijcuna cashpapish mana charishca shinallatajmi.
Ishquindijtataj balanzapi pizajpica chai shinallatajmi.
10Llaquichinacuillapica ama shunguta churaichu.
Shuhuashcallapica ama yanga jatun tucuichu.
Charinacunata jahuanpi jahuanpi mirachishpapish ama chaipi shunguta churaichu.
11Shuj cutinca Taita Diosca rimarcami:
Ishqui cutinca cashna nijtami uyarcani:
“Tucuita rurai tucuj canaca Taita Diospajmi.
12Llaquij canapish, Jatun Dios quiquinpajmari.
Quiquinmari tucuicunaman japina cashcataca cungui.
Ima shina rurashca shinatajmi cungui” nircami.
Who We AreWhat We EelieveWhat We Do
2025 by iamachristian.org,Inc All rights reserved.
