JEREMÍAS 52 - Quichua Chimborazo Bible

Judá llajtata Sedequías mandashcamanta(2 R 24.18-20; 2 Cr 36.11-16)

1Sedequiasca, ishqui chunga shuj huatayuj cashpami, Jerusalenpi Judá llajtata mandai callarirca. Paica chunga shuj huatatami, Jerusalenpi mandarca. Paipaj mamaca, Libna pueblomanta caj Jeremiaspaj ushushi Hamutal shutimi carca.

2Sedequiasca, Joacim shinallataj millaita rurashpami, Mandaj Diostaca p'iñachirca.

3Chaimanta yallitaj p'iñarishpami, Mandaj Diosca Jerusalenpi causajcunatapish, Judá llajtapi causajcunatapish paipaj ñaupajmanta llujshichishpa cacharca. Chai q'uipami Sedequiasca, Babilonia llajtata jatun mandajtaca c'ariyarca.

Jerusalenpi causajcunata caldeo soldadocuna mishashcamanta(2 R 24.20–25.7; Jer 39.1-7)

4Babilonia llajtata jatun mandaj Nabucodonosorca, Sedequías paita c'ariyajpimi, Judá llajtata ña iscun huatata mandacujpimi, paipaj tucui soldadocunandij Jerusalenman shamurca. Chai huatapaj chunga quilla, chunga punllapi chayamushpaca, tucui muyundijpi baluarte nishca macanacunata shayachishpami, Jerusalenpi causajcunahuan macanacungapaj shayarircacuna.

5Sedequías Judá llajtata mandacushca chunga shuj huata tucungacamami, chashna Jerusalén muyundijta chapacurcacuna.

6Chai huatapaj chuscu quillapaj iscun punllapimi, Jerusalenpica jatun yaricai tiyarca. Chaipica ima micuna mana tiyarcachu.

7Chaimantami pueblo muyundij jatun pircapica, shuj jutcuta rurarcacuna. Chaimantaca tucui soldadocunami, ishqui pirca chaupipi caj punguta tuta llujshircacuna. Chaita llujshishpaca, caldeo soldadocuna tucui muyundijta chapacujllapitajmi, jatun mandajpaj jardín c'uchu ñanta callpashpa Arabá pambaman rircacuna.

8Shina cajpipish, caldeo soldadocuna catishpami, jatun mandaj Sedequiastaca, Jericó pueblo pambapi japircacuna. Paita japijpica, paipaj tucui soldadocunami shitashpa rircacuna.

9Chaimantami jatun mandajtaca, Hamat llajtapi caj Ribla puebloman Babilonia llajtata jatun mandajpajman aparcacuna. Chaipimi paitaca, ima shina llaquichinata mandarca.

10Babilonia llajtata jatun mandajca, Sedequiaspaj churicunataca, pai ricucujllapitajmi cungata p'itichirca. Judá llajtata mandajcunatapish, Ribla pueblollapitajmi tucuicunata cungata p'itichirca.

11Ashtahuanpish Sedequiastaca ñahuicunallata surcuchishpami, Babilonia llajtata jatun mandajca fierro cadenacunahuan huatachishpa, paipaj llajtaman prezu aparca. Chashnami chai Babilonia llajtapica, huañungacama prezu tiyacurca.

Judá llajtamanta prezu apashcamanta(2 R 25.8-21; 2 Cr 36.17-21; Jer 39.8-10)

12Jatun mandaj Nabucodonosorca, Babilonia llajtataca ñami chunga iscun huatata mandacurca. Chai huatapaj pichca quilla chunga punllapimi, Babilonia llajtata jatun mandajta cuidaj soldadocunata mandaj Nabuzaradanca, Jerusalenman shamurca. Paica chai jatun mandajpaj ñaupajpimi caj carca.

13Jerusalenman pai shamushpaca, Mandaj Diospaj huasitapish, jatun mandajpaj huasitapish, shujtaj huasicunatapishmi rupachirca. Jatun huasicunataca tucuitami ninahuan tucuchirca.

14Cuidaj soldadocunata mandajhuan shamushca tucui Caldea llajta soldadocunaca, Jerusalén muyundij jatun pircatami tucui urmachircacuna.

15Chai q'uipaca, cuidaj soldadocunata mandaj Nabuzaradanca huajchacunatapish, Jerusalén pueblomanta mana llujshishca tucui caishujcunatapish, pueblomanta llujshishpa Babilonia llajtata jatun mandajpaj maquipimi yaicugrijcunatapishmi, Babiloniaman prezu aparca. Tucuicunallatatajmi aparca.

16Cuidaj soldadocunata mandaj Nabuzaradanca, imata mana charij huajchacunallatami uvatapish, shujtaj granocunatapish tarpushpa, chagracunata rurachun saquirca.

17Caldeo soldadocunaca, Mandaj Diospaj huasi ñaupajpi shayaj ishqui jatun pilarcunataca p'aquircacunami. Chaicunaca broncemanta rurashcami carca. Shinallataj broncellamantataj rurashca jatun pailatapish, uchilla tanquecunatapishmi p'aquircacuna. Chashna p'aquishpami tucui chaicunataca, Mandaj Diospaj huasimanta Babiloniaman aparcacuna.

18Shinallataj Diospajta ruranapaj tiyashcacunataca, jatun mangacunatapish, palacunatapish, rupashca mechacunata anchuchinacunatapish, jatun tazacunatapish, cucharacunatapish, broncemanta rurashca ima shujtaj charinacunatapishmi aparcacuna.

19Shinallataj cuidaj soldadocunata mandajca, inciensota rupachinacunatapish, jatun tazacunatapish, copacunatapish, mangacunatapish, candelerocunatapish, malta tazacunatapish, uchilla tazacunatapishmi aparca. Chaicunaca maijanca curimanta, maijanca cullquimanta rurashcami carca.

20Ishqui jatun pilarcunata, yacuta churana jatun pailata, chai ucupi shayaj bronce huagracunata, caishuj uchilla tanquecunataca, jatun mandaj Salomón causacushpami, broncemanta rurachishca carca. Chaicunami Mandaj Diospaj huasipi tiyacurca. Tucui chaicuna mashna pizashcataca, mana yachai tucuipajmi carca.

21Jatun pilarcunaca ishquindijtajmi altomanca pusaj metro yalli carca. Tucui muyundij anchoca pichca metro, chaupi metrohuanmi carca. Ucutaca t'utullami carca. Chai t'utu pilar bronceca, canchis centímetro racumi carca.

22Chai pilarcuna jahuapi umata shina churashca capitel nishca ishqui jatun bolacunaca, ishqui metro yalli altomi carca. Chaicunapish broncellamantataj rurashcami carca. Chai uma muyundijpica, linchihuan pilluchishcapish, granada nishca muyucunata rurashpa muyundijta huarcushcapishmi carca. Ishquindij pilarcunapaj umacunami chai shinallataj carca.

23Cada filapimi, patsaj granada muyucunata linchipi huarcushca carca. Chaicunamanta chuscuca mana ricunallapi cajpimi, cada uma muyundijpica iscun chunga sujta granadacunalla ricurij carca.

Babilonia llajtaman prezu apashca Judá runacunamanta

24Cuidaj soldadocunata mandajca, curacunata mandaj Seraías curatapish, paipaj q'uipa tucui imapipish ricuj Sofonías curatapish, Diospaj huasi pungupi caj quimsa cuidaj soldadocunapuramanta quimsatapishmi japirca.

25Shinallataj Jerusalenpi causajcunapuramantaca, soldadocunata mandajtapish, jatun mandajhuan alli apanacuj, Jerusalenpi tiyacushca canchis cunaj yuyajcunatapish, macanacunata yachachingapaj chairaj c'aricunata tandachishpa shuticunata quillcajtapish, Jerusalenllapitaj cashca sujta chunga runacunatapishmi japirca.

26Cuidaj soldadocunata mandaj Nabuzaradanca, tucui chaicunata japishpami, Babilonia llajtata jatun mandajpajman Ribla puebloman aparca.

27Hamat llajtapi caj Ribla puebloman chayachijpimi, Babilonia llajtata jatun mandajca, espadahuan huañuchichirca. Chashnami Judá runacunaca, paicunapaj llajtamanta prezu rircacuna.

28Nabucodonosorca, Judá llajtamantaca, tucui caicunatami prezu aparca: Pai mandacui canchis huatapica, 3.023 runacunatami aparca.

29Nabucodonosorllatajmi, pai mandacui chunga pusaj huatapica Jerusalenmantaca, 832 runacunata prezu aparca.

30Nabucodonosor mandacui ishqui chunga quimsa huatapica, cuidaj soldadocunata mandaj Nabuzaradanmi Judá runacunapuramantaca, 745 runacunata prezu aparca. Tucuimantaca, 4.600 runacunatami prezu aparca.

Babiloniapica Joaquinta prezumanta llujshichishpa allipi churashcamanta(2 R 25.27-30)

31Judá llajtata jatun mandaj Joaquinca, Babilonia llajtapica ñami quimsa chunga canchis huatata prezu causacurca. Chai huatami Evil-merodac shuti jatun mandajca, Babilonia llajtata mandai callarirca. Pai mandai callarishpaca, chai huatapaj chunga ishqui quillapaj ishqui chunga pichca punllapimi, Judá llajtata jatun mandaj Joaquintaca carcelmanta llujshichirca. Chaimanta llujshichishpaca, allipimi churarca.

32Paihuanca alli apanacushpami, sumajta rimaj carca. Shinallataj chai Babilonia llajtaman shujtaj llajtacunamanta apashca tucui jatun mandajcunata yalli allipimi churarca.

33Carcelpi churashpa tiyacushca churanata llujshichichunpish, shujtaj alli churanatami curca. Chaimantapachami Joaquinca, chai llajtata jatun mandajllahuantaj punllanta paipaj mezapi micuj carca. Paipaj tucui causaipimi chashna causarca.

34Shinallataj Babilonia llajtata jatun mandajca, Joaquinpaj tucui causaipimi, punllanta ima allicunatapish cushpa alli charirca. Joaquín huañungacamami chashna charirca.