MIQUEAS 6 - Quichua Chimborazo Bible

Mandaj Dios israelcunata rimashcamanta

1Cunanca Mandaj Dios ima nishcata uyaichigari, paica cashnamari nin: “Cancuna millaita rurashcacunataca urcucunaman huillaichigari. Cancuna huillashcacunataca lomacunami uyanga.

2Cai pachapi tiyaj, pipish mana cuyuchipaj urcucuna, Mandaj Dios p'iñarishpa rimashcata uyahuaichigari. Mandaj Diosca pai agllashca israelcunahuan p'iñarishcamantami, paicunataca rimacun.

3Ñuca agllashcacunalla, ¿imata rurashpataj p'iñachircaniyari? Cancunata llaquichishca cajpica, rimaichigari.

4Ashtahuanpish Egipto llajtapi huatashca shina causacujtaca ñucamari llujshichircani. Cancunata pushamuchunca Moisesta, Aaronta, Mariatami cacharcani.

5Ñuca agllashcacunalla, Moab llajtata jatun mandaj Balac imallata cunashcata alli yuyarichigari. Shinallataj Beor runapaj churi Balaam imallata cutichishcatapish alli yuyarichigari. Sitim pueblomanta Gilgal puebloman imapaj ch'imbashpa rishcatapish alli yuyarichigari. Mandaj Diosca cashcata ruraj cashcatami rijsinguichij” ninmi.

Mandaj Diosca imallata rurachun mañashcamanta

6Mandaj Diospaj ñaupajpica ¿imahuantaj ricurigrishari? Jahua pachapi causaj Taita Diostaca ¿imahuantaj adorashari? Paihuan alli tucungapajca, ¿shuj huatayuj bizicunatachu paipaj ñaupajman apashpa, paiman cushpa tucui rupachisha imatagari?

7¿Mandaj Diosca huaranga huaranga carnerocunata, mana cashpaca, 10.000 larca junda aceiteta cujpichu ñucahuanca alli tucunga imatagari? ¿Ñuca paita mana cazushpa yallitaj p'iñachishcamanta, ñuca tucui causaipi juchata rurashcamantaca, ñuca punta churita cushpa huañuchijpica, chasquingachu imatagari?

8Huañujlla aichayuj runalla, paica canmanca imalla alli cana cashcataca ñamari huillarca. Mandaj Diosca cantaca caillatamari rurachun mañan: “Imatapish cashcata ruraj cachun, c'uyaj cachun, llaquij cachun, cambaj Taita Diospaj ñaupajpi llaquirishpa cazuj cachunmi munan.

9Mandaj Diosca pueblopi causajcunataca cayacunmari. Canta manchanaca alli yachaj canami. Maijantapish pai llaquichijpica cazuichigari.

10Diosta mana manchaj runapaj huasica millaita rurashcamanta japishcacunallahuan jundamari. Paica mana alli pizaj medidacunallatami charin.

11Mana alli pizaj balanzapi pizashpa c'atujcunatapish pizana bolsacunapi umashpa c'atujcunatapish ¿ima shinataj perdonashari?

12Achcata charijcunaca imatapish shuhuashpallami charijyarcacuna. Chaipi causajcunaca llullashpallami rimarcacuna. Paicunaca umangapajllami shimi llujshincuna.

13Chaimantami cantaca chugrichishpa irquiyachircani. Cambaj juchacunamantami llaquinayajta saquircani.

14Micushpapish mana sajsanguichu, yaricaillahuantajmi saquiringui. Ima charinacunata tandachishpapish, mana pacai tucunguichu. Imata pacajpipish, canta p'iñajcunamanmi cushpa cachasha.

15Tarpushpapish, mana imata tandanguichu. Olivo granota capishpapish, mana chai aceitehuanca churaringuichu. Uvata capishpapish, vinotaca mana ubyanguichu.

16Canca Omri mandashcacunallatami cazurcangui. Acabpaj familiacuna imata rurashcatami catircangui. Paicuna mandashcacunatapish, cunashcacunatapishmi rurarcangui. Chaimantami cantaca llaquinayajta saquisha. Caipi causajcunapish chanzata rurashpa asinami cangacuna. Chaimanta ñuca agllashcacunapaj llaquitami apanguichij” ninmi.