ISAÍAS 36 - Quichua Chimborazo Bible

Judá llajtaman Senaquerib yaicushcami(2 R 18.13-37; 2 Cr 32.1-19)

1Judá llajtata Ezequías, chunga chuscu huatata ña mandacujpimi, Asiria llajtata jatun mandaj Senaqueribca, Judá llajtapi caj sinchi pircayuj pueblocunapi causajcunahuan macanacungapaj huichiyashpa chai pueblocunataca pai japirca.

2Asiria llajtata jatun mandajca, Rabsaces nishca mandajtami, achca soldadocunahuan Laquismanta Jerusalenman Ezequiashuan macanacuchun cacharca. Pai shamushpami janaj ladoman caj tanqueman shamuj larca c'uchupi carpa huasicunata shayachishpa tiyarircacuna. Chaitami tajshajcunapaj allpaman rina ñan carca.

3Paihuan tupangapajca mayordomo Eliaquimpish, quillcaj Sebnapish, quillcacunata huaquichij Joapishmi llujshircacuna. Eliaquimca Hilciaspaj churimi carca, Joaca Asafpaj churimi carca.

4Paicunatami Rabsaces nishca mandajca:

–Asiria llajtata jatun mandaj cashna nichun cachashcata Ezequiasman huillaichij: ¿Maijanpi shunguta churashpataj canca mana manchanguiyari?

5Canca sumaj shimicunata rimarishcallahuanchu ñucahuan macanacunata yuyangui. Can chashna rimashcaca cambaj shimillapitajmari saquirin. ¿Maijanpi shunguta churashpataj ñucataca c'ariyasha ninguiyari?

6Cantaca Egiptopaj chijtaricuj carrizopi taunaricujtami ricuni. Chai chijtaricuj carrizopi maijanpish taunarijpica, jahuaman pasajtami maquipi yaicunga. Egiptota jatun mandaj faraonpi shunguta churajcunataca tucuicunatami chai shina ruran.

7Canca ñucamanca: Ñucanchijta Mandaj Diospimi shunguta churanchij ninguichijmi. Chashna nishpaca ¿ima nishpataj lomacunapi tiyaj paipaj altarcunata anchuchishpa Ezequiasca judacunatapish, Jerusalencunatapish cai Jerusalenpi tiyaj altar ñaupajllapimi adorana ninyari?

8Cunanca Asiria llajtata jatun mandaj ñuca amohuan shuj ruranata ari ninacui. Can 2.000 caballopi tiyarij soldadocunata charijpica, ñucaca 2.000 caballocunata cusha.

9Egipto llajtapaj carrocunapi, caballopi tiyarij gentecunapi shunguta churashpapish ñuca amopaj soldadocunata mandajpajta rurajllahuanpish mana ch'imbapura shayari tucunguichu.

10Cai llajtata llaquichingapajca, manapish Mandaj Dios cachajpi shamushcataca ama yuyaichu. Mandaj Diosmari ñucataca: Chai llajtaman huichiyashpa tucui chingachi nirca ninmi nigrichij– nircami.

11Shina nijpimi Eliaquimpish, Sebnapish, Joapish Rabsacestaca:

–Cambajta ruraj ñucanchijmanca arameo rimaipi rimahuayari, chai rimaita yachapanchijmi. Ama Judá llajta rimaipi rimahuaichu, tucui cai jatun pirca jahuapi tiyacujcunamari uyacuncuna– nircacuna.

12Shina nijpipish, Rabsacesca: –Ñuca amoca mana cancunaman, cancunapaj amomanchu caitaca huillanaman cacharca. Ashtahuanpish chai jatun pirca jahuapi tiyacujcunamantajmari huillanaman cacharca. Paicunaca quiquin mapallatataj micungapaj, quiquin ishpallatataj cancunandij tucushpa ubyangapajmi tiyacuncuna– nircami.

13Chashna nishpaca Rabsacesca, alli shayarishpa Judá llajtapaj rimaipi sinchita caparishpami:

–Asiria llajtata jatun mandaj imata nishcata uyaichij.

14Asiria llajtata jatun mandajca cashnami nin: Ezequías umashcaca ama caichijchu. Paica ñuca maquimantaca cancunataca mana quishpichi tucungachu ninmi.

15Ezequías cashna nishpa Mandaj Diospi shunguta churachishcapish ama caichijchu. Paica Mandaj Diosca quishpichingatajmi. Cai pueblotaca Asiria llajtata jatun mandajpaj maquipica manataj churangachu ningami.

16Chashna nijpipish Ezequiastaca ama uyaichijchu. Ashtahuanpish Asiria llajtata jatun mandajca cashnami nin: Ñucata rogarishpa ñucahuan alli tucuichij. Chashna cashpaca quiquin uva chagracunamanta, quiquin higo yuracunamantami micunguichij, quiquin pugyucunamantami yacutapish ubyanguichij.

17Cancunata ñuca cancunapaj llajta shinallataj llajtaman pushaj shamungacamami chashna micunguichij chashna ubyanguichij. Ñucaca cancunataca granocunapish, vinopish, micunapish, uvapish, tiyaj llajtamanmi pushasha.

18Riquichij: Mandaj Diosmi quishpichinga nishpa Ezequías ama umachun. Asiria llajtata jatun mandajpaj maquimantaca caishuj llajtacunapaj dioscunaca, mana quishpichi tucurcachu.

19Hamatpaj, Arfadpaj, Sefarvaimpaj dioscunaca ¿maipitaj quishpichircari? Samariata ñuca llaquichicujpica ñuca maquimantaca ¿maipitaj quishpichi tucurcacunari?

20Mandaj Dios ñuca maquimanta cai Jerusalén pueblota quishpichingami nishpa shunguta churachunca, cai pachapi tiyaj dioscunaca ¿maijan diostaj paipaj llajtapi cajcunata ñuca maquimanta quishpichi tucushcari? ninmi– nircami.

21Chashna nijpipish, chaipi cajcunaca imata mana cutichishpa upalla carcallacunami. Jatun mandaj Ezequiasllatajmi: “Ama imata cutichishpa upalla canguichijlla” nishpa mandashca carca.

22Chai q'uipaca mayordomo Eliaquimpish, quillcaj Sebnapish, quillcacunata huaquichij Joapish, churanacunata lliquirishcacuna jatun mandaj Ezequiaspajman shamushpami Rabsaces imallata nishcata tucuita huillarcacuna. Eliaquimca, Hilciaspaj churimi carca. Joasca, Asafpaj churimi carca.