1Chuscupaj q'uipa ángel trompetapi tocajpica, cielomanta shuj luzero allpa pachaman urmajtami ricurcani. Paimanca ucujta jutcupaj pungu llavetami curca.
2Chai ucujta jutcupaj punguta pascajpica, jatun hornomanta cushni llujshicuj shinami cushni llujshirca. Chai jutcumanta cushni llujshishpaca, intitapish huairatapishmi amsayachirca.
3Chai cushnimantaca, langostacunami allpa jahuaman llujshirca. Chai langostacunamanca cai allpapi tiyaj escorpioncuna shina cani tucunatami curca.
4Paicunataca cai allpapi tiyaj q'uihuacunata, ima verdijllacunata, ima yuracunatapish ama imata rurachun, shinallataj Diospaj sellota paicunapaj frentepi mana charijcunallata llaquichichunmi mandarca.
5Paicunataca mana huañuchishpa, pichca quillacama canishpa huanachichunllami mandarca. Chaimi langostacunaca escorpión canij shina canishpa huañunata nanachishpa llaquichirca.
6Chai punllacunapi chai runacunaca, huañunatami yuyangacuna. Ashtahuanpish mana ima shina huañui tucungachu. Paicuna huañusha nijpipish, huañuica manataj japingachu.
7Chai langostacunaca, jatun macanacuiman rinapaj allichishca caballocuna shinami carca. Umacunapica, curi coronacuna shinata churashcacunami carca. Paicunapaj ñahuicunapish gente ñahuicuna shinami carca.
8Ajchapish huarmipaj ajcha shinami carca. Quirucunapish, leoncunapaj quirucuna shinami carca.
9Pechopish huashapish fierro churana shinami carca. Paicunapaj alaspish, achca caballocuna carretacunata aisashpa jatun macanacuiman ricuj shinami huajiarca.
10Chupacunapish escorpioncunapaj chupa shina tujsinayujmi carca. Chai chupacunapica, pichca quillacama gentecunata llaquichi tucunatami charircacuna.
11Chaicunataca ucujta caj jutcuta mandaj angelmi mandacurca. Chai angelpaj shutica, hebreopica Abadón ninmi, griegopica Apolión ninmi.
12Punta aij nicushca llaquica ñami tucurin. Chashna cajpipish, chaipaj q'uipa ishqui aij nina llaquica shamungarajmi.
13Pichcapaj q'uipa ángel trompetapi tocajpica, Diospaj ñaupajpi tiyacuj curi altarpaj chuscu gachucuna chaupimantaca sinchita caparishpami,
14pichcapaj q'uipa ángel trompetata charicujtaca cashna nirca: “¡Éufrates jatun yacu c'uchupi huatashca caj chuscu angelcunata cachari!” nircami.
15Chai chuscu angelcunataca, cai pacha quimsapi chaupishca shuj parte gentecunata huañuchichunmi cacharirca. Chai angelcunaca chai horas, chai punlla, chai quilla, chai huata pajtajpi chashna huañuchichunmi allichishca carca.
16Caballocunapi tiyarishca soldadocunaca, 200millonmi cashca, nijtami ñucaca uyarcani.
17Ñucaca muscuipi shina ricushpaca, caballocunatapish chaipi tiyarishcacunatapishmi ricurcani. Caballocunapi tiyarishcacunaca pechota taparina fierro churanataca nina shina pucajlla, zafiro shina azul-lla, azufre shina quillujllata churarishcatami ricurcani. Caballocunapaj umacunaca leoncunapaj uma shinami carca. Paicunapaj shimimantaca ninapish, cushnipish, azufrepishmi llujshicurca.
18Chai caballocunapaj shimimantaca nina, cushni, azufremi llujshirca. Chai quimsa llaquicunahuanca, quimsapi chaupishca shuj parte gentecunami huañurca.
19Caballocunaca chashna llaquichi tucunataca shimipi, chupapimi charircacuna. Paicunapaj chupacunaca culebra shina umayujmi carca. Chaicunahuanmi llaquichircacuna.
20Cai tucui llaquicunata apacushpapish mana huañujcunaca, paicuna millaita ruracushcata saquishpa Diosman mana cutirircacunachu. Ashtahuanpish supaicunata, curimanta, cullquimanta, broncemanta, rumimanta, caspimanta rurashcalla dioscunata adoranatapish mana saquircacunachu. Chaicunaca mana ricui tucunchu, mana uyai tucunchu, mana puri tucunchu.
21Chaicunaca, huañuchij canata, brujiaj canata, huainayaj canata, shuhuaj canatapish mana saquircacunachu. Diosmanca manataj cutirircacunachu.
Who We AreWhat We EelieveWhat We Do
2025 by iamachristian.org,Inc All rights reserved.