ÉXODO 37 - Quichua Chimborazo Bible

Diospaj carpa huasipi imalla tiyajcunata rurashcami(Ex 25.10-40; 27.1-8; 30.1-10)

1Bezaleelca arcatapish acacia caspillamantatajmi rurarca. Chai arcaca sunimanca shuj metro chunga ishqui chaupi centímetro, anchomanca sujta chunga canchis chaupi centímetro, altomanpish sujta chunga canchis chaupi centimetromi carca.

2Chai arcataca ucutapish jahuatapish alli curihuanmi llihuirca. Muyundij filocunapica curi ribetetami rurarca.

3Chai arcapajca chuscu esquinapajmi curi chuscu argollacunata rurarca. Ishquitaca shuj ladopaj, ishquitaca caishuj ladopajmi rurarca.

4Acacia suni caspicunatapish rurashpami chai jahuataca curihuan llihuirca.

5Chai caspicunataca arcata huandushpa apanapaj churashca argollacunapimi churarca.

6Chai arcapaj propiciatoriotapish sunimanca shuj metro chunga ishqui chaupi centímetrota, anchomanca sujta chunga canchis chaupi centimetrotami alli curita rurarca.

7Martillohuan tacashpa curi ishqui querubincunatapishmi rurarca. Chaitaca arcapaj propiciatorio ishqui ladomanmi churarca.

8Chai ishqui querubincunataca, arcapaj propiciatoriollapitaj tandachishpami rurarca. Shujtaca shuj lado filoman, caishujtaca caishuj lado filomanmi rurarca.

9Chai querubincunataca arcapaj propiciatoriota urilla ricushpa cumulla ch'imbapura tiyacujtami rurarca. Paicunapaj alascunaca arcapaj propiciatoriota llandungapaj jahuata chutashcami carca.

Diospaj ñaupajpi tandata churana mezata rurashcami(Ex 25.23-30)

10Mezatapish acacia caspillamantatajmi rurarca. Chai mezaca sunimanca iscun chunga centímetro, anchomanca chuscu chunga pichca centímetro, altomanca sujta chunga canchis chaupi centimetromi carca.

11Chai mezataca alli curihuanmi tucuita llihuirca. Chai muyundij filopica curi ribetetami rurarca.

12Chai muyundijtaca canchis chaupi centímetro ancho jarcatami rurarca. Chaitapish muyundijtami curi ribeteta rurarca.

13Curi chuscu argollacunata rurashpami, chaicunataca chai meza chaquipaj chuscu esquinapi churarca.

14Chai argollacunataca meza filota jarcashca ucunijllapimi churarca. Chai argollacunaca huanduna caspicunata churachishpa, mezata apangapajmi chashna churashca carca.

15Chai mezata huanduna caspicunatapish acacia caspimanta rurashpami jahuataca curihuan llihuirca.

16Meza jahuapi imallata ruranacunataca: Platocunata, cucharacunata, trinchicunata, cuchillocunata, vasocunatapish ashtahuan alli curitami rurarca. Tasacunaca yacu shinacunata tallinapajmi.

Curi candelerota rurashcami(Ex 25.31-40)

17Chai candelerotaca chaquiyujta, chai troncotapish copacunayujta, manzanacunayujta, sisacunayujta ashtahuan alli curita martillohuan tacashpami rurarca.

18Chaitaca sujta maquicunayujtami rurarca. Chai maquicunaca quimsaca shuj ladoman, quimsaca caishuj ladomanmi carca.

19Cada maquicunatami almendro sisacunatajllayujta, quimsa copacunatajllayujta, shuj manzanatajllayujta, shuj sisatajllayujta rurarca. Caishuj lado maquipipish quimsa copacunatajllayujta, shuj manzanatajllayujta, chai puntapica almendro sisatajllayujtami rurarca. Sujta maquicunapitajmi chashna rurarca.

20Tucuita aparij troncopish almendro sisatajlla chuscu copacunayujmi carca. Shuj manzanatajllatapish, shuj sisatajllatapishmi rurarca.

21Chai troncomanta llujshij quimsa maquicunapica cada maqui puntapimi shuj shuj manzanacunatajlla tiyarca.

22Candelero troncopish, chaimanta llujshij maquicunapish alli curita candelero troncopi shujllata rurashcami carca. Chaicunapi tiyaj manzanacunatajllataca martillohuan tacashpa rurashcami carca.

23Chai maquicunapi tiyaj canchis lamparacunatapish, mecha rupashca ushpata anchuchinacunatapish, chai ushpata tandana platillocunatapish alli curillamantatajmi rurarca.

24Chai candelerotaca chaipi tucui imallata ruranacunandijtaca shuj talento alli curitami rurarca.

Inciensota rupachina altarta rurashcami(Ex 30.1-5)

25Inciensota rupachina altartapish acacia caspitami rurarca. Chai altarca sunimanca chuscu chunga pichca centímetro, anchomanpish chuscu chunga pichca centimetrollatajmi carca. Chuscundij ladomi chai medidallataj carca. Altomanca iscun chunga centimetromi carca. Chai altarpi caj gachucunaca altarhuan shuj shinallata rurashcami carca.

26Chai altar jahuatapish, lado quinricunatapish, gachucunatapish alli curihuanmi llihuirca. Muyundij filocunatapish, curihuanmi ribetirca.

27Chai ribete ucunijllapica ishqui esquinapimi curi argollacunata rurarca. Caishuj ladomanpish chashnallatajmi rurarca. Chaipi caspicunata churachishpa maimanpish apanapajmi chashna rurarca.

28Chai caspicunataca acacia caspimanta rurashpami curihuan llihuirca.

Diospajlla cachun ch'icanchina aceiteta rurashcami(Ex 30.22-38)

29Diospajlla cachun ch'icanchina aceitetapish, mishquijllata ashnaj ashtahuan alli inciensotapishmi rurarca. Chaitaca mishquijllata ashnaj jambicunata ruranata yachaj rurashcatapish yalli mishquijllaman ashnacujtami rurarca.