EZEQUIEL 30 - Quichua Chimborazo Bible

Egipto llajtata llaquichinamanta

1Mandaj Diosca ñucamanca cashnami nirca:

2“Huañujlla aichayuj runalla, cashna huillayari: Mandaj Diosca cashnami nin: Huacaichigari, ¡aij chai punllaca imachari tucunguichij!

3Chai punllaca ñamari pajtamucun. Mandaj Dios llaquichina punllaca, ñamari quichquiyamucun. Chai punllaca p'uyu punllami canga, llajtacunata llaquichina punllami canga.

4Egipto llajtamanca espadami shamunga. Chai espadami paicunataca chugrichishpa urmachinga, imalla charishcacunatapish apangacunami. Huasicunatapish tucuitami chingachinga. Chaita ricushpami, Etiopía llajtapi causajcunaca mancharingacuna.

5Chai punllapica Etiopía shuti, Fut shuti, Lud shuti llajtacunapi causajcunapish, tucui Arabia llajtapi, Libia llajtapi causajcunapish, paihuan tandanacushpa causaj llajtacunapish paicunallahuantajmi chai espadapi urmangacuna” nircami.

6Shinallataj Mandaj Diosca cashnapishmi nin: “Egipto llajtata ayudajcunapish huañungacunami. Jatun tucushpa mandaj Egipto llajtaca Migdol pueblomanta Sevene pueblocamami espadapi huañunga. Mandaj Jatun Diostajmi chashna nini.

7Egipto llajtaca shujtaj llajtacuna shinallatajmi llaquinayaj saquiringa. Chaipi tiyaj pueblocunapish, shujtaj pueblocuna shinallatajmi shitashca saquiringa.

8Egipto llajtapi ninata japichishpa, paita ayudajcunandij tucuita chingachijta ricushpami ñucataca, Mandaj Diostaj cashcataca yachangacuna.

9Egipto llajtata llaquichi punllaca, ñuca ñaupajmantami huillajcunaca jatun barcocunapi rishpa, imata mana manchashpa causacuj Etiopía llajtapi huillashpa manchachingacuna. Egipto llajtata llaquichishcata uyashpaca mancharingacunami. Chai jatun llaqui punllaca, ñallami pajtamucun” nircami.

10Mandaj Jatun Diosca cashnapishmi nin: “Egiptopi imalla tiyajcunataca, Babilonia llajtata jatun mandaj Nabucodonosorpaj maquipi churashpami chingachisha.

11Paimi achca llajtacunamanta tandashca ashtahuan c'ari c'ari, paipaj soldadocunandij rishpa, chai llajtataca chingachinga. Paicunapaj espadacunata huaquichinamanta llujshichishpami, Egipto llajtapi causajcunataca huañuchingacuna. Chai llajtaca huañushcacunahuanmi junda saquiringa.

12Jatun yacucunatapish chaquichishami, chai llajtataca yallitaj millai runacunamanmi cusha. Chai llajtataca, chaipi tucui imalla tiyajcunandijmi caru llajtamanta shamujcunaman tucuchichisha. Caicunataca Mandaj Diosca ñucatajmi chashna nini” ninmi.

13Mandaj Jatun Diosca cashnapishmi nin: “Egipto llajtapi tiyaj rurashcalla dioscunatapish, Menfis pueblopi tiyaj dioscunatapish chingachishami. Egipto llajtata jatun mandajca, mana ashtahuan tiyangachu. Chai llajtapica, jatun mancharinatami rurasha.

14Patros llajtataca chingachishami, Zoán pueblopica, ninatami japichisha. Tebas pueblopi causajcunataca, paicuna imalla rurashcatami ricusha.

15Shinallataj ñuca yallitaj p'iñarishpami, Egipto llajtata torre shina jarcaj Sin pueblotapish llaquichisha. Tebas pueblopi causajcunatapish tucuicunatami tucuchisha.

16Shinallataj Egipto llajtapica, ninatami japichisha. Sin puebloca, manchanayajtami nanachinga. Tebas puebloca, mirga mirgami tucunga. Menfis puebloca, punllantami llaquicunata charinga.

17Avén shuti, Pibeset shuti pueblocunapi causaj q'uipa huiñai c'aricunaca espadapimi huañungacuna, huarmicunaca prezumi ringacuna.

18Egipto llajta jatun tucushpa mandacushcata llaquichicui punllallatajmi, Tafnes pueblopica punllaca tutayanga. Egipto llajtataca, manchanana amsami tapanga. Llajta muyundij pueblocunapi causajcunataca, prezumi apangacuna.

19Egipto llajtataca llaquichishallatajmi. Chashna rurajpimi ñucataca, Mandaj Diostaj cashcataca yachangacuna” ninmi.

20Chunga shuj huata punta quilla callari canchis punllapimi, Mandaj Diosca ñucataca cashna nirca:

21“Huañujlla aichayuj runalla, Egipto llajtata jatun mandaj faraonpaj rigrataca ñami p'aquircani. Chai rigrataca manamari jambicunata churashpa huatashcachu. Chai rigra alliyashpa, espadata sinchita charirachunpish manamari chumbihuan huatashcachu.

22Chaimantami Mandaj Jatun Diostaj cashna nini: Egipto llajtata jatun mandaj faraonhuanca, ñucaca p'iñarishcami cani. Chaimantami paipaj alli rigratapish, p'aquishca rigratapish tucui p'aquishpa, maquipi charicun espadataca cacharichisha.

23Shinallataj Egipto llajta runacunataca, shujtaj llajtacunamanmi caita chaita cachasha.

24Ashtahuanpish Babilonia llajtata jatun mandajpaj rigracunatarajmi sinchiyachishpa, ñuca espadataca paipaj maquipi lutsachisha. Chai espadahuanmi faraonpaj rigracunataca p'aquinga. Chashna chugririshpa huañucushpami, paipaj ñaupajpica manchanayajta huacanga.

25Ashtahuanpish Babilonia llajtata jatun mandajpaj rigracunatarajmi sinchiyachisha, faraonpaj rigracunataca urmachishami. Babilonia llajtata jatun mandajpaj maquipi ñuca espadata lutsachishpa Egipto llajtata llaquichicujta ricushpami, ñucataca Mandaj Diostaj cashcataca yachangacuna.

26Shinallataj Egipto llajta runacunataca, shujtaj llajtacunamanmi caita chaita cachasha. Chaita ricushpami ñucataca, Mandaj Diostaj cashcataca yachangacuna” nircami.