1Mandaj Dios canmi ñuca Dios cangui.
Mancharinacunata quiquin rurashcamantaca
cambaj shutitaca jatunyachishami.
Cambaj shutitaca alabashami.
Ñaupaman quiquin imata ruranata yuyarishcataca chaitatajmi pajtachishcangui.
2Pueblotaca rumi montón shinamanmi tigrachishcangui.
Muyujta pircayuj pueblotapish tucuimi urmachishcangui.
Shujtaj llajta mandajcunapaj mandana huasicunapish ña mana pueblochu canga.
Chaitaca manataj pi cutin shayachingachu.
3Chashna rurashcamantaca c'ari c'ari runacunami cantaca alli ningacuna.
Sinchi pueblopi causaj c'ari c'ari gentecunapish cantaca manchangami.
4Huajchapaj fuerzami cangui.
Ima illajcuna llaquihuan cajpi fuerzata cujmi cangui.
Acapana shamujpi miticunami cangui.
Inti rupachijpi llandujmi cangui.
Millaicunapaj p'iñarica sinchi tamya shamushpa pata quinripi huajtarij shinami.
5Chaquishca pambacunapi inti t'itacuj shinami, jatun tucushca caru llajtamanta cajcunataca cumurichingui.
C'ari tucushcacunataca p'uyu ucupi t'itaihuan retoñashca yurata anguyachij shinami cumurichingui.
6Tucuita Mandaj Diosca, cai urcupimi tucuicunapaj fuerzata cuj shuj jatun micuita ruranga.
Alli aichahuan ñutcundij sumaj jatun micuitami ruranga.
Tucuimanta yalli alli vinohuanmi canga.
7Mandaj Diosca cai urcupimi, tucuicunapaj ñahuita tapashca linsotaca anchuchinga.
Tucui llajtacunapaj ñahuita tapashca linsotapish anchuchingami.
8Mandaj Jatun Diosca, huañuitapish huiñaipajmi chingachinga.
Tucuicunapaj ñahuimantami huiquicunata chaquichinga.
Tucui cai pachapi causaj pai agllashcacunapaj pingai canatami anchuchinga.
Mandaj Diostajmi chashna nin.
9Chai punllapica: “¡Riqui caimari ñucanchij Taita Diosca!
Paitamari shuyarcanchij, paimi ñucanchijtaca quishpichinga.
¡Ñucanchij shuyacushca Mandaj Diosca paimari!
Pai quishpichishcamanta cushicushun yallitaj cushicushun” ningacunami.
10Mandaj Diospaj maquica cai urcupimi samaringa.
Ashtahuanpish Moabitacunataca quiquin llajtallapitajmi sarunga.
Animalcunapaj cacata shitanapi ujshata saruj shinami sarunga.
11Paicunaca chai llaquipica, yacupi huambungapaj huambuj maquicunata chutashpa huambuj shinami maquicunata chutangacuna.
Chashna cujpipish Mandaj Diosca paicuna jatun tucushcatapish cumurichingami.
Imatapish rurai tucuj maquicunatapish yangatami ruranga.
12Mandaj Diosca paicunapaj pueblo muyundij jatun pircacunatapish urmachishpa, cumurichishpami ñutu allpa tucungacama ñutuchinga.
Who We AreWhat We EelieveWhat We Do
2025 by iamachristian.org,Inc All rights reserved.
