1 CORINTIOS 6 - Quichua Chimborazo Bible

Crijcunaca mana juicionacunachu

1Cancunapurapi maijancuna sinchi llaquicunata charishpaca chaita allichichunca maitataj manapish cashcata rurajcunapajmanca apanguichigari. Ashtahuanpish jucha illajcuna allichichun paicunapajmanmari apana canguichij.

2Jucha illajcunaca, cai pachataca paicuna ima rurashcata ricuchina cashcataca ¿manachu yachanguichij? Cai pachataca, paicuna imalla rurashcata cancuna ricuchina cashpaca ¿chai uchilla llaquicunatachu mana allichijcuna canguichij?

3Angelcunatapish imalla rurashcata ñucanchij ricuchina cashcataca ¿manachu yachanguichij? Cai causaipi ima llaquicunallatacarin ¿manachu allichi tucunguichij?

4Cai causaipaj imamanta p'iñanacuita charishpaca ¿ima nishpataj tandanacushca crijcunapaj manapish ima cajcuna allichichun paicunapaj ñaupajpi churanguichij?

5Pingachingapajmi cashnaca nini. Huauquicunapura p'iñanacushcata allichingapajca, cancunapurapica ¿manachu shujllapish yachaisapa tiyanguichij?

6Maijan huauqui caishuj huauquita juiciopi churashpaca ¡mana crijcunapaj ñaupajpimi mana allita ruran!

7Cancunapura juiciopi churashpaca, cancunallatajmi llaqui tucunguichij. Llaquichijpipish ¿ima nishpataj chai llaquitaca mana apanguichij? Umashpa shuhuajpipish ¿ima nishpataj mana saquinguichij?

8Ashtahuanpish cancunallatajmari llaquichinacunguichij, umashpa shuhuanacunguichij. ¡Huauquicunallatatajmi chashna llaquichinguichij!

9Millaita rurajcunaca, Dios mandanapica imata mana japina cashcataca ¿manachu yachanguichij? Ama umarichijchu: Apanacushpa causajcuna, rurashcalla dioscunata adorajcuna, huainayajcuna, huarmi shina casha nijcuna, c'aripurallataj siririjcuna,

10shuhuacuna, quiquinpajlla charinata munajcuna, machajcuna, llaqui tucushca canman nijcuna, umashpa shuhuajcunapish Dios mandanapica imata mana japingacunachu.

11Cancunapish maijancunaca chashnallatajmi carcanguichij. Ashtahuanpish Mandaj Jesucristopaj shutipimi, ñucanchij Taita Diospaj Espiritumanta ña maillashcacuna, jucha illajta rurashcacuna, justificashcacuna canguichij.

Cancunapaj cuerpopi Diosta sumajyachichij

12Tucui imatapish rurai tucunimi. Ashtahuanpish tucuita ruranaca manamari allichu. Tucui imatapish rurai tucunimi. Ashtahuanpish ñucata imapish mandachunca, manataj saquishachu.

13Micunaca huijsapajmi, huijsaca micunapajmi. Chashna cajpipish Taita Diosca ishquindijtami chingachinga. Ashtahuanpish cuerpoca mana huainayanapajchu, Mandaj Jesuspajmi, Mandaj Jesuspish cuerpopajmi.

14Mandaj Jesusta causachij Taita Diosmi, paipaj poderhuan ñucanchijtapish causachinga.

15Cancunapaj cuerpocunaca Cristopaj cuerpopaj miembrocuna cashcataca ¿manachu yachanguichij? ¿Cristomanta anchushpachu, huainayashpa causaj huarmipaj cuerpopaj miembrocuna cachun curisha? ¡Chashnaca manataj rurashachu!

16Huainayashpa causaj huarmihuan maijanpish chayarinacujca, paihuan shuj cuerpolla tucushcataca ¿manachu yachanguichij? ¿Manachu Quillcachishcapica: “Ishquindij shuj aichallami tucun” nin?

17Ashtahuanpish Mandaj Jesushuan shujlla tucujca, paihuanca shuj espiritullami.

18Huainayajcunamanta caruyaichij. Maijanpish ima juchata rurashpaca, paipaj cuerpotaca mana imata ruranchu. Ashtahuanpish huainayajca, paipaj cuerpopaj llaquipajllatajmi juchallin.

19Jucha illaj Espiritupaj huasi cashcata, paica cancunapi causacushcatapish ¿manachu yachanguichij? Chaitaca Diosmanta chasquishca cashcamanta, mana cancunapajllatajchu canguichij.

20Achca valijhuan randishcacunami canguichij. Chashna cashcamanta cancunapaj cuerpopi, cancunapaj espiritupi Diosta sumajyachichij, chaicunaca Diospajmari.