2 CRÓNICAS 7 - Quichua Chimborazo Bible

1Salomón chashna mañajpica, jahua pachamantami nina shamurca. Chai ninami Diosman cushca animalcunapaj aichataca tucui rupachirca. Diospaj huasipica, pai Mandaj Diospaj sumaj cashcami jundarca.

2Mandaj Diospaj sumaj cashca Mandaj Diospaj huasipi jundajpimi curacunaca mana yaicui tucurcacuna.

3Ninapish, Mandaj Diospaj sumaj cashcapish jahua pachamanta chai huasi jahuaman uriyamucujtaca, tucui israelcuna ricushpami cungurishpa, rumicunata churashca pambaman tupajta cumurircacuna. Shinallataj Mandaj Diostaca: “Paica allimari, pai llaquij canaca huiñai huiñaipajmi” nishpami adorarcacuna, alabarcacuna.

4Chashna nishpaca jatun mandajpish, tucui israelcunapish paihuan tucushpami, Mandaj Diosman animalcunata cushpa huañuchircacuna.

5Jatun mandajca, 22.000 c'ari huagracunata, 120.000 ovejacunatami Diosman cushpa rupachircacuna. Chashnami jatun mandajpish, tucui israelcunapish Diospaj huasitaca cambajlla cachun nircacuna.

6Curacunaca, paicuna rurana cashcallatatajmi rurarcacuna. Levitacunapish Mandaj Diosta cantangapaj tocanacunapi tocarcacunami. Chai tocanacunataca, jatun mandaj Davidmi rurachishca carca. Chai tocanacunapi tocachishpami Davidca: “Pai llaquij canaca huiñai huiñaipajmi” nishpa, paicunahuan cantaj carca. Tucui israelcuna chaipi shayacujpica, curacunaca levitacunahuan ch'imbapurami trompetacunapi tocarcacuna.

7Salomonca, Mandaj Diospaj huasi ñaupajpi caj patiotapishmi Diospajlla cachun nirca. Chai patiopimi, Mandaj Diosman cushca tucui rupachinatapish, Diosman cushca chasquishca granocunatapish, Dioshuan alli cangapaj cushca huiratapish paiman cushpa rupachirca. Salomón rurachishca bronce altarca Diosman cushpa tucui rupachinatapish, granocunatapish rupachingapajca mana pajtarcachu.

8Salomonca yallitaj achca tandanacushca tucui israelcunahuanmi canchis punllata fiestata rurarca. Paicunaca Hamat puebloman yaicunmanta callarishpaca, Egiptopi caj jatun yacucama causajcunami tandanacurcacuna.

9Punta canchis punllapica, Mandaj Diospaj huasitami Diospajlla cachun nircacuna. Caishuj canchis punllapica, jatun punllacunata yuyarina cashcamantami, chaitapish rurashpa cushicurcacuna. Chai cayandij punllaca, shuj jatun fiestatami rurarcacuna.

10Huatapaj canchis quilla ishqui chunga quimsa punllapica jatun mandajca, tucui israelcunatami caya minchacamachij nirca. Mandaj Diosca Davidpajpish, paipaj churi Salomonpajpish, pai agllashca israelcunapajpish achca allicunata cushcamantami, tucuicuna jatunta cushicushpa paicunapaj huasicunaman tigrarcacuna.

Taita Dioshuan Salomonhuan ari ninacushcami(1 R 9.1-9)

11Salomonca, Mandaj Diospaj huasitapish, pai mandashpa tiyana huasitapish, chai huasicunapi tucui imalla ruranata yuyarishcatapish tucuitami alli rurashpa tucuchirca. Tucuillatajmi alli llujshirca.

12Chai q'uipami Mandaj Diosca, Salomonman tuta ricurishpa cashna nirca:

“Can mañashcataca uyanimi. Cai huasitapish, animalcunata ñucaman cushpa caipi rupachina cachunmi agllarcani.

13Ñuca agllashca israelcunataca mana tamyachishpa, mana cashpaca chagracunata llaquichichun langostacunata cachashachari, mana cashpaca ungüita cachashachari.

14Ñuca agllashcacunamanmi ñuca shutita apachun curcani. Ñuca chai llaquicunata cachashpa llaquichijpica, paicuna mana allita ruracushcata saquishpa tucui shunguhuan nanarishpa ñucata yuyarishpa mañajpica, jahua pachamanta uyashami. Paicunapaj juchacunata perdonashami. Shinallataj paicunapaj allpapi tucui imapish mirachun bendiciashami.

15Cunanmantapachaca cai huasipi mañashcataca uyarashami.

16Cunanca cai huasipi ñuca shuti huiñaipaj cachunmi agllarcani. Ñuca ñahuicunapish ñuca shungupish punllantami chai huasipi canga.

17Canpish cambaj yaya David shinallataj tucui ñuca imalla rurangui nishcacunata rurashpa chaitataj pajtachichun nishpa ñuca mandashcata pajtachishpa pajtachinguitaj nishca shinataj rurashpa ñuca ñaupajpi purijpica,

18israelcunata can mandanataca huiñaipaj cachunmi pi mana cuyuchipajta churasha. Cambaj yaya Davidman: Cambaj huahua huahuapuraca israelcunata mandajca mana illangachu nircanimi. Chai nishca shinallatajmi rurasha.

19Ashtahuanpish ñuca chaitataj pajtachichun nishpa cancunaman cushca mandashcacunatapish mana cazushpa ñucamanta anchurishpa shujtajcunapaj dioscunapajta rurangapaj rishpa paicunata adorajpica,

20ñuca cancunaman cushca allpamantaca israelcunataca anchuchishami Ñucapajlla cachun ch'icanchishca cai huasitapish ñuca ñaupajmanta anchuchishami. Chashna rurajpimi israelcunamantaca tucui cai pachapi causajcunaca yuyachij shimicunata rimashpa asicungallacuna.

21Sumaj nishca cashca cashpapish cai huasica, llaquinayaj siricujta ricushpaca maijanpish chaita pasajca mancharishpami: ¿Ima nishpashi Mandaj Diosca cai llajtatapish, cai huasitapish chashna rurarca? ningacuna.

22Shina nijpica: Paicunapaj ñaupa yayacunata Egiptomanta llujshichimuj Mandaj Taita Diosta saquishpa, shujtajcunapaj dioscunapajman rishpa chai dioscunata adorashpa, chaicunapajta rurashcamantami Mandaj Diosca paicunapaj jahuamanca tucui cai llaquita cachashca ningacunami” nircami.