2 CRÓNICAS 22 - Quichua Chimborazo Bible

Judá llajtata Ocozías mandashcami(2 R 8.25-29)

1Jerusalenpi causajcunaca jatun mandaj Jorampaj randica, paipaj churi Ocoziastami Judá llajtata jatun mandaj cachun churarcacuna. Ocoziasca tucuicunapaj q'uipa churimi carca. Tandanacushca shuhuacuna arabecunahuan shamushpami, carpa huasicunapi tiyacujpi Jorampaj tucui punta churicunata huañuchircacuna. Chaimantami jatun mandaj cachunca, Ocoziasta churarcacuna.

2Ocoziasca, mandai callaringapajca chuscu chunga ishqui huatayujmi carca. Paica shuj huatatami Jerusalenpi mandarca. Paipaj mamaca, Omripaj nieta Ataliami carca.

3Pai cunashpami, Ocoziasmanca Diosta mana manchashpa millaita rurana yuyaita curca. Chaimantami paica Acabpaj familiacuna rurashca millai ñantapish catirca.

4Paipaj yaya huañushca q'uipami, paitaca Acabpaj familiacunaca, mana alli yuyaita cushpa, Diosmanta anchuchircacuna. Chaimantami Ocoziasca, Acabpaj familiata catishpa, Mandaj Diospaj ñaupajpica, paicuna shinallataj millaita rurashpa causarca.

5Ocoziasca paicuna cunashcata uyashpami, israelcunata jatun mandaj Acabpaj churi Joramhuan tucushpa Siria llajtata jatun mandaj Hazaelhuan macanacungapaj Galaadpi caj Ramot puebloman rirca. Chaipimi siriocunaca Joramta chugrichircacuna.

6Paicuna macanacugrijpica, Siria llajta soldadocunami Joramtaca chugrichircacuna. Siria llajtata jatun mandaj Hazaelhuan chai Ramot pueblopi macanacuipi chugrichijpica, Joramca jambiringapajmi Jezreelman tigrarca. Chaimi Jorampaj churi Judá llajtata jatun mandaj Ocoziasca Acabpaj churi Joramta pai ungushca cajpi Jezreelpi ricunaman uriyarca.

Ocoziasta Jehú huañuchishcami(2 R 9.27-29)

7Taita Diosca Ocoziastaca, Joramta ricugri punllami huañuchina cashca carca. Mandaj Diosca Nimsipaj churi Jehutami, Acabpaj tucui familiata huañuchichun agllashca carca. Ocoziasca, Jorampajman chayashcahuanmi Jehuhuan tupangapaj Joramllahuantaj llujshirca.

8Jehuca chai punllaca, Taita Diosllataj huañuchichun mandashcamantami, Acabpaj familiacunata huañuchicurca. Chaita ruracushpaca, Judá llajtapi causajcunata mandajcunahuanpish, Ocoziaspaj familiacunahuanpish tuparca. Tucui chaicunaca Ocoziaspajta rurajcunami carca. Tucui paicunatapishmi huañuchirca.

9Ocoziasca, Samaria pueblopimi miticugrishca carca. Chaimantami mashcashpa japishpaca, Jehupajman pushamushpa chaipi huañuchishpa pambarcacuna. Paipaj abuelo Josafatca mana nij tucushpalla, tucui shunguhuanmi Mandaj Diosta catirca nishpallami, Ocoziastaca pambarcacuna. Chashna huañuchijpimi Ocoziaspaj familiacunamantaca, paipaj randi mandangapaj shujllapish mana saquirirca.

Atalía huarmi jatun mandaj tucusha nishcami(2 R 11.1-21)

10Ocoziaspaj mama Ataliaca, paipaj churi huañushcata yachashpa jatarishpaca, Judá llajtata jatun mandajpaj tucui huahua huahuacunatami chingachirca.

11Chaimi jatun mandaj Jorampaj ushushi Josabetca, jatun mandaj Ocoziaspaj caishuj churicunata Atalía huañuchicujpi Ocoziaspaj churi Joastaca pacalla llujshichirca. Chai huahuataca, huahuata huiñachicuj huarmindijmi ishquitataj jahua altopi tiyaj shuj ucupi pacajpi Atalía huarmica, chai huahuataca mana huañuchirca. Josabetca Ocoziaspaj yaya, jatun mandaj Jorampaj ushushimi carca. Paica Joiada curapaj huarmimi carca.

12Chai huahuaca paita huiñachij huarmindijmi Mandaj Diospaj huasipi sujta huatata pacashca carca. Chai punllacunapimi Atalía huarmi chai llajtata mandacurca.